Ameraliup kangerluarni sarfalerineq VM-imut sungiusaatigigaa

Jens Bjerge, triatlonimi unammisartoq Nukissiorfinnilu ingerlatsinermik sulialik, aappassaanik Iron Man VM-imi Hawaiimi peqataavoq.

Kalaallit Nunaanni kisiartaalluni taamaaliorpoq.

- 14-issaannik Ironmanimi peqataanera tulluusimaarutigeqaara, arpannernillu unititsinikuunngisaannarpunga, Jens Bjerge AG-mut oqarpoq nangillunilu:

- Arpanneq taama ilungersunartigisoq naammassillugu nuanneqaaq.

Kangerlummi sungiusarneq

Ironman tassaavoq 3,8 kilometerimik nalunneq, 180 kilometerimik sikkilerneq kiisalu 42,2 kilometerimik arpanneq.

Naammassiniassagaanni piareersarneq annertooq sooruna pisariaqarpoq, unamminissallut tungaanut Jens Bjerge ilaatigut nalinginnaanngitsumik sungiusariaaseqartariaqarsimavoq.

Nukissiorfimmi sulinerminut atatillugu aasaq manna Ameraliup kangerluani innaallagissap aqqutaani piffissaq sivisooq atorsimavaa, tassani kangerluk akimut ikaarlugu kabeli sillimmataasoq iluarsartuullugu.

- Qaqqap qaani 500 meterisut qutsitsigisumi innaallagissiorfiup avannarpasissuani najugaqarpugut, kangerlullu sinerlugu umiaasaararsorluta. Oqimaatsorujussuarnik tigummillunga majuussuillungalu aqqussuisarpunga, Jens Bjerge oqaluttuarpoq.

- Timi atorlugu ullormut sivisuumik sulinertalerujussuupput. Taamaattorli ilaanni arpattarnissamut piffissaqartarpunga, Jens Bjerge oqaluttuarpoq.

Unammineq ataqqineqarluartoq

Triatlonertartut angusinnaasaanni Hawaiimi VM-ertoqarnerani peqataaneq tamanit annerpaavoq, Jens Bjerge oqarpoq.

- Nalunaaginnarlutit peqataasoqarsinnaanngilaq, oqarpoq.

Unamminissamut 2015-mi siullermeerluni annguppoq. Ukiut aqqanillit qaangiummata ukioq kingulleq 60-iliinerminut atatillugu imminut unammillerluni annguteqqippoq.

- Naggammik misileeqqikkusullunga Iron Manip Københavnimi ingerlanneqarnerani ajugaasut qaqisarfiat angoriarpara, oqaluttuarpoq.

Ukioqatigisamilu akornanni ajugaasup tulliatut inissippoq, taamaalillunilu ukioq manna VM-imut qaaqqusaalluni.

- Naaggaarsinnaanngisaannarpunga

Iron Man timikkuinnaq sakkortuunngilaq.

Imminulli kajumissaarsinnaaneq uniinnannginnissarlu pisariaqarput.

Nalornineq imminulluunniit nalligineq allaat takkukkaluaraangata, Jens Bjerge nassuiaavoq.

- Ullormi unammiffimmi imminut aperiuaannarpunga sulerinerlunga, oqarpoq.

Unamminerullu kingorna sikkilini tuniniarniarlugu eqqarsaatigigaluarpaa, isumaqarami maanna unissalluni.

- Angerlaakkakkuli maanna nuannaarpunga. Soorunami arlaannik pisoqarumaarpoq … Naaggaarsinnaanngisaannarpunga!