Angutit nunanut allanut unammisartut inuusuttullu Parisimi unammersuarnernut anngunniullutik 2026 aallartippaat

Johannes Grothip, angutit nunanut allanut unammisartuisa sungiusaasuat, aamma angutit inuusuttut Parisimi pissanganartumik piareersaatitut unammiuaaqataallutik ukioq aallartippaat. Unammiuaarnerit januaarip arfernganniit qulinganut 2026-mi ingerlanneqarput. Angutit nunanut allanut unammisartuinut inuusuttunullu unammiuaarneq pingaarutilimmik misilittaataassaaq, tassanilu unammisartut VM-imut maajimi anngunniunnissarsuarmi kikkut piareernersut takutinnissaanut immikkut ittumik periarfissaqassapput.

- Assorsuaq pissanganassaaq kikkut Parisimi sassarsinnaanersut. Angutit inersimasut inuusuttullu inissaminnik imminnut unammillertussaapput, uanilu piareersarnermi arsartut kikkut nunarsuatsinni pissartanngorniunnissamut anngunniunnermi piareeqqanerlutik takutitsinissaminnik periarfissinneqassapput. Aamma arsartartuuteqarpugut maannakkut peqataanngitsut, taakkuli suli anngunniunnissamut periarfissaqarput. Taamaattumik arsartut tamaviaartariaqarput, TAAK-mit tusagassiuutitigut nalunaarummi Johannes Groth oqarpoq.

Parisimi angusaqarluarnissaq kisimi pineqanngitsoq nunanut allanut unammisartunut sungiusaasoq oqarpoq.

- Arsartut tamaviaartinneqarneranni misilittassavagut, taktikip tungaatigut arsartariaasitsinnullu sungiusassavagut, taamaasilluta inersimasut inuusuttullu pitsaanerpaamik piareersartillugit. Uani unammiarnitsinni anngunniunnissamut alloriarneq pingaarutilittut taasariaqarpoq, nassuiaavoq.

Parisimi unammiuaarnerit naammassippata USA-mut unammiartornissaq ukkatarineqalissaaq, tassani angutit nunanut allanut unammisartut maajimi VM-imut anngunniutissapput, angutillu inuusuttut ukiup ingerlanerani anngunniunnissamut piareersassallutik.