Angutit qiterlerminnermi unammiuaarneranni Kalaallit Nunaat pissartanngorluni, tulliulluni pingajuullunilu ajugaasuuvoq

Edvard Kruse Angunnguaq Mathiassenilu allequttami issiallutik qiterlitik nissiitigalugit illakusupput.

Timersoqatigiit taakkua marluk Arctic Winter Games 2026-mi angutit qiterlerminnermi ammasumik unammineranni kuultinnanniutissapput. Erneq Nielsen bronzennareerpoq.

Qiterlerminnermi timersortartut assammik talerperlermik qiterlitik noqquruuttarpaat, kinalu tigummilluarnerusinnaanersoq unammissutigisarpaat. Saamimmik talerpimmillu unammisarput.

Angunnguaq Mathiassen sisamanngornermi unamminermi Edvard Krusemit saamimmik talerpimmillu ajorsartinneqarpoq, Edvard Kruselu kuultinnappoq.

Timersoqatigiit Kalaallit Nunaanneersut pingasut ajugaasunut qaqisarfimmut qaqisussanngorput.

Takusaq tamanna sungiusaasup Alfred Lindenhannip nuannaarutigaa.

- Angusat nuannaarutigeqaakka. Angussallutigit aamma ilimagisimavarput. Anfusarissaarluarnerpaanissatsinnut sukataarnikuuvugut, taanna oqarpoq.

Kristine Sigurdsen arnani qiterlimminnermut ammasumik unammisitsinermi kuultinnappoq, Danny Clasenilu angutini 18-it inorlugit ukiulinni bronzennalluni.

Kukkulaannguaraanni ajorsartoqartartoq

Qiterlerminnermi assaat nukittusariaqarlutillu unammeriaaseq unammillernartuummat timersortartut ajoqusinnginnissaannut periusissanut malittarisassat sukannersuupput.

Nukissalli annerpaartaa timersortartut ulluinnarni inuuneranneersuuvoq, Alfred Lindenhann oqarpoq.

- Timersortartut sungiusarnerisa annerpaartaat inuttut ataasiakkaatut ingerlanneqartarpoq. Angutit aalisartuupput. AMerlanerit nunaqarfimmiuupput. Taamaammat nukittuunik assaqarput.

- Periutsit annerusumik ilinniartarpaat. Aallaqqaammut qiterlerminneq ilinialeqqaaratsigu tamanna ajornartorsiutaavoq. Kukkusaqaagut. Maanna tamanna ilikkarsimavarput, oqarpoq kukkulaannguaraannilu ajorsartoqarsinnaasoq tikkuarlugu.

Eqqillit pinnguaataanni unamminerit kingulliit tallimanngorpat ingerlanneqassapput, tassani timersortartut orpissuarmik unammissapput, tassa napparujussuaq akerliusup unammiffianut ajattarlugu. Timersoqatigiit Kalaallit Nunaat eqqillit pinnguaataanni sapaatip akunnera tamaat ingerlalluarsimasut Alfred Lindenhann isumaqarpoq, aqagulu ujaminnaqqinnissartik naatsorsuutigaa.