Aputeqanngitsumi sisorarluni festivalerneq?

Sisorartartut, sungiusaasut kajumissutsiminnillu suliaqartartut nunamit tamarmeersut, Sisimiuni 2025-mi decembarip qulingannit 14-iannut Lârsêraq Skifestivali peqataaffigissavaat – pisussami ukiuunerani nuannersunik sisoraatinik ujakkaartarnermi ataatsimoortarnermik nersuiniarfiusussami. 

Festivalimi sammisaqartitsisoqassaaq peqataasunut tamanut, ujakkaartarlutik aallarteqqaartunit misilittagartuunut, aamma sungiusaasunut pikkorissartitsisoqassalluni, sammisaqaqatigiittoqassalluni sisoraatit sisoraatinillu pujassaasarneq sammineqassallutik kiisalu ataatsimoornerpassuarnik misigisaqarfiusinnaassalluni.

Apummi piginnaanerit ineriartortinnissaannut, nutaanik ikinngutitaartornissamut Nunattalu ukiuunerata alutornartup sisorarnermut soqutigisanik avitseqatigiissutiginissaanut periarfissatsialaavoq. Naak Nunatta ukiukkut aputeqartarnera tusaamaneqarluaraluartoq, ukioq manna ajoraluartumik aputeqannginnera suli utaqqisitsivoq. Taamaakkaluartoq festivalernissaq taamaatiinnarneqanngilaq.

Festivalernissamut ukiornissaa utaqqineqartoq

Sisimiuni sisorarluni festivalertoqangajalerpoq, ilungersunartorli ataaseq suli atuulluni: Suli aputeqanngilaq. Festivalimut ataqatigiissaarisup Martin Møllerip, aamma ujakkaarnermi nunanut allanut unammisartuni sungiusaasuusup, ullualuinnaat qaangiuppata festivali aallartittussaagaluartoq, suli aputeqannginnera uivilissutiginngilaa.

- Siornatigut taamaalinerani aputeqannginneranik eqqaamasaqanngilanga. Tamanna ernumanalaarpoq, sulili upperaara piffissaagallartillugu apiumaartoq. Tasersuaq sikusinnaassappat apilaarsinnaassappallu taava ajornavianngilaq, Martin Møller eqqissisimalluni oqarpoq.

Ukioq manna immikkut ittumik ilungersunartorsiorpoq. Nunarsuup kiatsikkiartornera sunniuteqarmat, ukiuunerata qanoq innissaa maanna eqqoriaruminaallisimavoq. Neriuuteqarporli – nassuerutigaluguli siunissami festivalertitsisarnissat allatut aaqqissuunneqartariaqalersinnaanerat.

- Sisorarnermi festivalertitsisarnerput siornatigut februaarimi aaqqissuuttaraluaratsigu, immaqalu piffissaq taanna pitsaanerpaagaluarluni. Taamaanngippat piareersarluarnerusariaqassaagut. Takusartakkama ilagaat apummik siornameersumik toqqorsisoqartartoq aatsinnaveersaarneqartumik, taamaalilluni ujakkaartarneq aallartinneqarsinnaaniassammat, naak ukiornissaa utaqqinarsisimagaluartoq. Aputiliuutit aamma periarfissaapput, oqarpoq.

Ukioq mannali apummik toqqortaateqartoqaranilu aputiliuutinik piareersimasoqanngilaq. Martin Møllerip neriuutigisaa kisimi atuuppoq, tassa sila allanngorumaartoq apiumaartorlu, tassami festivali decembarip qulinganni aallartissinnaassappat aputeqarnissaa pisariaqartinneqarmat. Apinngitsuussappat tamanna piviusuussaaq iliuuseqarfigineqarsinnaanngitsoq, Martinilli ukioq takkukkumaartoq upperilluinnarpaa. Silassamik ilimasaarutit qujanartumik ilimasaarutigaat, decembarip aallartilaarnerani apingaatsiassasoq, Sisimiunilu amerlaqisut apinissaa neriuutigilluinnarpaat.

Festivali nuannisarfiusoq ataatsimoorfiusorlu

Lârsêraq Skifestival ukiualuit matuma siornagut kingullermik ingerlanneqarpoq, taamaattumillu ukioq manna festivalertoqarnissaa immikkut pissanngatigineqarluni. Meeqqanut inuusuttuaqqanullu amerlasuunut pisussaq qilanaarineqarluarpoq, peqataasussatullu 50-it nalunaareersimallutik – amerlanerit Sisimiuni, Nuummi Aasiannilu sisorartartut peqatigiiffiinneersut. Peqataasussat amerlanersaat 16-it inorlugit ukioqarput, naatsorsuutigineqarlunilu festivalerneq misigisassarpassuaqartitsissasoq nuannersunik ikinngutitaartortoqarluassasorlu. Lârsêraq Skifestivalip ujakkaarnermik aaqqissuussisarnernit allanit allaanerussutigigaa, unamminerit takisuunillu ujakkaarnerit pinnagit pinnguarneq ataatsimoornerlu sammineqartarmata. Sukkaniuttoqarani peqataasut nuannersunik sammisaqarlutillu sisoraatinik pinnguassapput. Tamannalu kikkunnit tamanit aallunneqarsinnaalluni silamilu sammisaqarnermik nuannisarnerussalluni. Martin Møllerip soqutiginnilluinnarluni festivalip siunertaa ima oqaatigaa.

- Meeqqat inuusuttuaqqallu sisoraatinik sisorarnermi nuannersunik pinnguarnissamillu misigisaqarsinnaanissaat kissaatigaara. Festivali illaqatigiinnissamut pinnguaqatigiinnissamullu periarfissaassaaq – unamminerit pinnagit ataatsimoornissaq nuannisarnissarlu pingaarnerussapput. Neriuppunga meeqqat inuusuttuaqqallu peqataasut, peqataanertik nuannersumik eqqaasarumaaraat, Martin Møller qungujulalluni oqarpoq.

Festivalimi sisoraatinik ujakkaarneq unamminertut isiginagu, pinnguarnertut peqataatitsilluartutullu isigineqartarnera pissutigalugu meeqqanit inuusuttuaqqanillu nuannarineqarluartarpoq. Taamatut isiginnittaaseqarneq pissutigalugu Lârsêraq Skifestival immikkut ittuuvoq kikkut tamarmik peqataaffigisinnaasaat – qanorluunniit ujakkaallaqqitsigineq misilittagaqarnerlu apeqqutaatinnagit. Festivalip qanilliartornerani apiumaartoq neriuutigiinnarneqarsinnaavoq. Martin Møllerip peqataasussarpassuillu ukiornissaa suli upperilluinnarpaat – immaqalu tamannarpiaq pissutigalugu utaqqineq neriuuteqarluarnerlu festivalimik alutornarnerulersitsipput.