KL

DK

Arctic Winter Games qitinnermik, erinarsornermik qummoroortarnermillu aallartinneqartoq

Timersoqatigiit Kalaallit Nunaat ippassaq unnukkut Canadami AWG-p ammaanersiorneqarnerani peqataapput. Taakku timersornerni tallimani kulturikkullu takutitsinerni sapaatip akunnerata tulliani peqataassapput.

Randi Zeeb Sigurdsen 16-inik ukiulik Ikerasaameersoq erfalasulisarpoq.
Hanna Hviid Hanna Hviid Tusagassiortoq
Saqqummersinneqarpoq

“Kalaallit Nunaat!”

Kalaallit timersortartut ukioq manna Arctic Winter Gamesimi ammaanersiornermi ingerlaaqatigiinnermi taamatut suaartarput.

16-inik ukiulik Randi Zeeb Sigurdsen Ikerasaameersoq sallersaalluni erfalasulisarpoq. Taanna issittormiut pinnguaataannik timersortartuullunilu AWG 2024-mi ingerlanneqarmat two-foot high kick-imi portunerpaamik pissippoq.

ARCTIC WINTER GAMES 2026

Arctic Winter Games Whitehorsemi Canadamiittumi ukioq manna ingerlanneqarpoq. Unammiuaarnerit ukiut allortarlugit ingerlanneqartarput.

Kalaallit Nunaat issittormiut pinnguaataanni, eqqillit pinnguaataanni, sulorarnermi, nerrivimmi arsaararnermi snowboardimilu unammeqataassaat. Taamatuttaaq kulturilerisut Kalaallit Nunaanneersut peqataapput.

Timersortartut 59-it Kalaallit Nunaannit peqataapput. Eqqillit pinnguaataannik timersortartut 16-it, Issittormiut pinnguaataannik timersortartut 18-it, sulorartartut arfineq-pingasut, nerrivimmi arsaarartartut arfineq-pingasut, snowboardertartut sisamat kulturilerisullu tallimat peqataapput.

Nunatta saniatigut timersoqatigiit Alaskameersut, Alberta Northimeersut, Yukonimeersut, Northwest Territoriesimeersut, Nunavutimeersut, Nunavik-Quebecimeersut Sapmimeersullu peqataapput. Rusland Ukrainemi sorsunneq aallartimmalli peqataaqqusaanngilaq.

Timersuutit katillugit 20-it unammissutigineqarput.

Taassuma tunuani timersuutortartut 58-it, ukioq manna Timersoqatigiit Kalaallit Nunaannut ilaasut, ingerlaarput. Isiginnaartunit qiimmattaatigineqarlunilu ersaattaanneqarput.

AWG ukioq manna Canadami Whitehorsemi ingerlanneqassaaq, kalaallillu timersortartut sapaatip akunnerata tulliani issittormiut pinnguaataanni, eqqillit pinnguaataanni, sulorarnermi, nerrivimmi arsaararnermi snowboardernermilu unammissapput. Taamatuttaaq kulturilerisussat Kalaallit Nunaanneersut peqataapput.

Ammaanersiorneq ippassaq unnukkut ingerlanneqarpoq.

Timersoqatigiit Kalaallit Nunaat tamarmik ammaanersiornermi peqataapput.

„Sumit sanaajugatta“

Timersoqatigiit Kalaallit Nunaata saniatigut timersoqatigiit Alaskameersut, Alberta Northimeersut, Yukonimeersut, Northwest Territoriesimeersut, Nunavummeersut, Nunavik-Quebecimeersut aamma Sapmimeersut peqataapput. Timersoqatigiit arfineq pingasut tamarmik Shipyards Parkimut apuummata ammaanersiorneq oqalugiarnernik, qitinnermik erinarsoqatigiinnillu Canadap inuiattut erinarsuutaanik erinarsortitsinermik aallartinneqarpoq.

Taamatuttaaq Canadap ministeriunera Mark Carney videokkut inuulluaqqusilluni AWG-mi timersortartut tamaasa ingerlalluarnissaannik kissaappai. Ukioq manna qulequtarineqartoq tassaasoq „Sumit sanaajugatta“ eqqaavaa, tamannalu tulluartuusoraa.

Naggataagut qummoroortartoqarpoq, taamaalillunilu ukioq manna Arctic Winter Games aallartippoq.

AWG Yukonimi illoqarfiit pingaarnersaanni Whitehorsemi kingullermik ingerlanneqarmat ukiut 14-it qaangiupput. 2020-mi unammiuaarnerit illoqarfimmi tassani ingerlanneqartussaagaluarput, coronali pissutigalugu taamaatiinnarneqarput. Taamaammat AWG-p Yukonimi ingerlateqqinneqarnera ersarissumik nuannaarutigineqarpoq.

randi zeeb sigurdsen arctic winter games kalaallit nunaat timersoqatigiit timersorneq whitehorse

Atorfiit tamaasa takukkit

PODCASTI

Powered by Labrador CMS