Asii Parkenimi arsarluataarpoq

Arfininngorneq oktobarip pingajuat. Parkenimi unammiffissaminni ivigaaqqanut tummarami Asii K. Berthelsen-ip malugisaa siulleq tassaavoq, isiginnaartut nippaateriivillutik illersukkaminnik qiimmassaallutik nipaat.

Isiginnaartut issiasarfiinut qissimippoq. Pisarnertut sumiissusersiniagai siulliit tassaapput ilaquttani, aappani ikinngutinilu. Tamatumuunali nassaarineq sapileqqaarpai.

Sumi tamani inuppassuaqarpoq.

Isiginnaariat 8.000-it arsaattarfissuarmut tassunga ornigussimapput F.C. Københavnimi arsaattartut arsaannermi akerarinerpaasatoqqatik Brøndby-meersut unammisussaammatigit, Asiilu siornatigut taamak inoqartigisumi arsaatinngisaannarnikuuvoq.

- Takorusutakka inuppassuit akornanni sumiissusersinissaat ajornakusuulaarpoq. Misigisaq immikkuullarissuuvoq, taanna nuannaarluni qungujulallunilu oqaluttuarpoq.

Arsaattarfissuarmut pereernerup kinguninngua unamminermi dommerip siggartaat siggarlugu unammineq aallartisippaa. Asii mål-issutaasussamik iliminut arsamik tunniussivoq, ajutoornermi kingorna siullerpaamik unammeqataavoq unamminerlu naammassereermat unamminermi tassani arsarluarnerpaatut toqqagaalluni. FCK 2-1-mik ajorsaqqarpoq. Taamaattorli Asiimut misigisaq allaavoq: Tassami arsartartutut uterpoq.

Ajoquserneq takkummat

Qaammatialuit matuma siorna misigissuseq allarluinnaavoq. Asii K. Berthelsen assut qilanaarsimavoq piffissami ukioq manna arsaaffiusumi siullermi FCK-p A-Ligami unammisaqattaarnissaanut. Unammisaqattaarnerit siulianni nukittulluni unammisaqattaaqataareerluni naatsorsuutigisimavaa unammeqataasassalluni aammalu iligiinni aalajangersimasumik inissisimalluni peqataasarnissani qulakkiissallugu.

Taamaattorli taamani A-liga-mi unamminerit pingasut ingerlareersullu ajoquserpoq. Sungiusarnerit ilaanni arsamik arsaarinneriartussaavoq. Pisoq pinerata nalaani soorpianngitsutut misinnaqqaariarluni, tamatuma kingorna singernermigut anniartalerpoq, tamatumalu malitsigisaanik arsaq iluamik isimmissinnaajunnaarpaa.

- Sungiusarnermi ajoqusernera annertuutut misinnanngikkaluarpoq, kisiannili ajoqusernerma kingorna arsaq iluamik isimmissinnaajunnaarpara. Arsarlu isimmissinnaasariaqarpoq arsaattartuussagaanni, taanna qungujulluni oqaluttuarpoq, ajoqusernerullu taassuma pilersitaanik qaammatip aappaa avillugu arsaqataasinnaanikuunngilaq.

Asiimut unammisarnerminik pingaartitsisuusumut piffissaq ajoquserfik pitsaanerpaanngilaq. Tassami FCK-p Danmarkimi pitsaanerpaat akornanni inissinniarsarinerani, sinaaniit isiginnaaginnartariaqartarsimavai, piffissami tassani arsallaqqinnerpaat akornanniittussaalluni takutitserusuffiani.

- Inuttut ajornerusumik nalaataqarsinnaarpianngilanga napparsimaneq ajoquseqqanerlu tassani aqqusaarakkit.

Tamatuma pinerata nalaani aamma pereersimasut kingumut eqqarsaatigeqqajaasimavai, tassami siuliani annertunerujussuarmik ajoquseqqanikuugami. Taamanikkut ukiup aappaa avillugu ajoqusernerup malitsigisaanik uninngasariaqarsimavoq. Eqqarsaatiminilu aarleqqutigisimavaa tamanna nalaateqqissanerlugu?

Nittartakkakkut nutaarsiassalerisut aaqqissuisoqarfiata aallartitaata arlaleriarluni Asii oqaaseqartinniartaraluarpaa ajoquseqqanini qanoq misigineraa. Arsaqataasinnaannginnerup malitsigisaanik pakatsisimaneq. Sivisuumik arsaqataasinnaanngeriataarsinnaanermut aarleqqutigisat, isigisinnaallugillu ilini arsaaffissamut isaasut nammineq peqataanani.

Taamaattorli misigissutsinut taamaattunut uterteqqinneqarusunngilaq.

Apeqqutigigaluaraangatsigit tigussaasunut uteqqittarpoq. Timimut sungiusaasumut. Sungiusaqqinnermut. Tullissaani nammineq iliuuserisinnaasaminut. Ajoqusernerup qaangerniarnerani pisussat tulleriiaarlugit aqqusaarsimasat oqaluusererusunneruai misigissutsikkut isumaliutigisimasinnaasat pinnagit.

- Iluaqutaanngilarmi eqqarsaannassalluni, unammineq una peqataaffigisinnaagaluarpara, unamminermilu uani ilikka ikiorsimasinnaagaluarpakka, Asii poortuinani oqarpoq.

Asiip uummataa unammiumatooq aqqutissiuussissaaq

Pitsaanernut anngunniarneq FCK-mut imaannaanngissimaqaaq. Iligiimmi allattorsimaffimmi ilungersunartorsiornerit akornanniipput, taamaammallu aamma ajorsarnerit arsaattartoqatigiit atisanik taarsiisarfiannut nassarneqartarput.

- Ingerlallualeraangatta, atisanik taarsiisarfitsinni oqilisimaartarpugut. Ingerlalluanngikkaangattalu, tamanna akunnitsinni nuanniitsumik malunnartarpoq.

Taamaakkaluartoq Asiip piffissat angusarissaarfiunngitsut uninngaannarfiginiartanngilai. Soorlu aamma ajoquseqqanermi nalaani arsanngiffeqarsimanermisut iliuuserisinnaasat oqaluusererusunneruai.

Aammali suliassarpassuaqarput. Arsaattartut ilissat nutaat takkuttarput, arsaqatigiittussallu imminnut ilikkarniarnerminnut piffissamik atuisarput, tamatumalu ilutigisaanik nutaamik sungiusaasoqalersimanerup malitsigisaanik arsariaatsimik nutaamik iligiit sungiussiniartussaallutik.

Sungiusaasup nutaap spanskiusup siuliminut sanilliullugu pimoorussinera siumullu isiginerusumik periaaseqarnera malunnarpoq. Tamannalu Asiip iluarivaa. Tassami teknikkikkut pisinnaasani nalunngilluaraluarlugit, nammineq isummani naapertorlugu allamik aamma pissuteqarpoq arsaattartutut siuariartornerminut.

- Arsaannermi unammeqataangaangama misigissutsikka tamakkeeqqasarput aammalu 110 procentimik tunniusimasarpunga. Teknikkikkut pisinnaasakka ajunngillat, taamaattorli unammerusussuseqartuunera pissutaaneruvoq unammisartutut siuariartorninnut.

Unammerusussuseqartuuneralu atorfissaqartinneqarpoq. Arsaannernimi peqataasussatut toqqagaanissaq pillugu iligiit akornanni unammineq annertunerulernikuuvoq arsaattartut nutaat ilissatut takkunnikuummata, FCK-llu pointit atorfissaqartippai. Taamaattorli Asiip upperivaa nammineq aammalu iligiit suli tunniussassaqarluartut, aamma iligisat nutaat iligiinni inissinnarneranni arsariaatsillu nutaap atorneqaleriartornerani.

- Isumalluarpunga, naatsorsuutigaaralu pointinik pissarsiumaartugut, aamma unamminernit qulinit kingullernit pitsaanerusumik angusaqarnissarput upperaara.

Målersimasut akornanni allattorsimaffimmiikkusuppoq

Imminut pineqartilluni iligiinni inissisimanini, tamaviaarutigisimasanilu tigummiinnassallugu Asiip pingaartippaa. Tamatumalu tullerisaanik pikkoriffigilluinnakkani iluatsikkusuppaa: iliminut mål-ernissamut periarfissanik tunniussisarneq.

- Arsaattaleramali mål-eriarnissamut amerlanertigut tunniussisartuujuaannarnikuuvunga.

Tamannalumi Brøndby-mut unamminerminni takutippaa, tassami tunniussinerisa ilaat iliata mål-lerneranik kinguneqarpoq. Taamaattorli isertitseriartussanut tunniussisarnerit anguniakkamini killiffigiinnanngilai. Namminermi arsamik isertitsisarnini akulikinnerulersikkusuppai.

- Soorunami neriuutigaara, suli amerlanerusunik isertitsisarnissara. Tamannalu tassaaginnarpoq arsartarninni aallunnerusassara.

Qaammatialuit matuma siorna arsaaffiup sinaaniit singernermigut akornusernikuulluni ilini arsaattut nammineq peqataanani isiginnaaginnartariaqarsimavai. Maannali unamminissap tullissaa aallussinnaalerpaa, tunniussinerit isertitsissutaasut – immaqalu aamma nammineq isertitsinissani unamminermi tullermiissaaq.