UNNIA
Futsalimi nunanut allanut unammisartut Kroatiami nunat tamalaat unammiuaarneranni peqataasut
Siulittaasup Kenneth KleistipKalaallit Nunaata angutit futsalimi nunanut allanut unammisartuisa nunani tamalaani pissartanngorniunnermi peqataanerat nuannaarutigaa.
Assi: Oscar Scott Carl
Kalaallit Arsaattartut Kattuffianni (KAK) siulittaasup Kenneth Kleistip kalaallit angutit futsalimi nunanut allanut unammisartuisa nunani tamalaani unammiuaarnermi Futsal Week January Cup 2026-mi, Kroatiami Labinimi januaarip 22-anit 25-anut 2026-mi ingerlanneqartussami peqataanissaat nuannaarutigaa. KAK nalunaarpoq.
Nunat arfineq-pingasut unammiuaarnermi peqataapput, Kalaallit Nunaallu nunani tamalaani unammisartunik unamminermut misilittagaqarlualernissaanik sungiusaataalluassaaq. Nunanut allanut unammisartut unammineq ammarlugu Rumaniamiunut januaarip 22-ani unammissapput.
Elite Sport Greenlandip tapiissuteqarneratigut peqataanissaq piviusunngortinneqarpoq, Grønlandsbankenilu futsalimi pingaarnertut aningaasaliisuuvoq nunatsinnilu timersornerup ineriartortinneqarnerani suleqataalluni.
- Nunat tamalaat akornanni sungiusarluni unammineq ineriartornissatsinnut aalajangiisuuvoq. Elite Sport Greenlandimit Grønlandsbankenimillu tapersersorneqarnitsinni unammisartugut unammiuaarnernut ataasiakkaaginnaanngitsunut misilittagaqalersinnaapput. Tamanna Kalaallit Nunaanni futsalimi siunissaq ungasinnerusoq eqqarsaatigalugu sulinitsinni alloriarneruvoq pingaarutilik, KAK-p siulittaasua Kenneth Kleist oqarpoq.
Unammiuaarneq Futsal Weekip pisortatigoortumik kanaliini toqqaannartumik malinnaaffigineqarsinnaavoq.
