Hjulmandip kalaallit arnat arsaattartut tapersersorpai

B67-ip U15-ini niviarsiaqqat arsartartui, Hjørringimi Dana Cupip ammaanersiorneqarnerani marlunngornermi peqataanerminni tupaallatsinneqarput.

Inuusuttut unammiuaarnerannut atatillugu nunanut allanut arsaattartunut siusinnerusukkut sungiusaasup Kasper Hjulmandip aningaasaleeqataasartut Vip’illu, "Arsaanneq tupinnartuliornikkut anguneqarsinnaasoq“ pillugu oqalugiarami, oqalugiarnini nalinginnaasumik 15.000 koruuninik akeqartippaa.

Ammaanersiornermi qaaqqusanut immikkut tupaallatsitsilluni Kasper Hjulmand mikrofoni tiguaa, oqarlunilu niviarsiaqqat taama amerlatigisut arsaattarnerat nuannaarutigalugu.

Tusarliussaq tamanna erseqqissarniarlugu, Hjulmandip Manumina niviarsiaqqat arsaattartuini B-67-imeersoq oqaluttarfimmut qaaqquaa, 15.000 koruuninillu niviarsiaqqat arsarnermut sammisassaqarniarnerannik atugassaannik tunissuteqarfigalugu.

Kalaallit Nunaannut attuumassuteqartoq

Kasper Hjulmandip kalaallit arnat isikkamik arsaattartuinut tapersersuinera nalaatsornerinnaanngilaq. Meeraallunimi Nuummi najugaqarpoq – Kalaallit Nunaannilu aningaasaqarnermut isumaginninnermullu Naalakkersuisuusimasoq Maliina Abelsen ullumikkut aapparalugu.

- Nalunngilara nunami angisuumi ingerlatsiniarneq qanoq unamminarsinnaatiginersoq, angalanerlu akisoorujussuusoq ilisimavara. Niviarsiaqqat maanga unammiartorniarlutik aningaasarpassuarnik sipaartariaqarsimapput. Arsaanneq kisiat pinnagu aammali Kalaallit Nunaanni niviarsiaqqat arsaattartut – tapersersorusuppakka. Eqqaamasariaqarparpullu tamatta nunamut nuannersumut qanimut attuumassuteqarnerput, Kasper Hjulmand aviisimut Nordjyskemut oqarpoq.

Hjørringimi Dana Cupimi holdit 1000-init amerlanerusut nunanit 45-neersut 20.000-nik arsaattartullit, nannaartorinnittorpassuillu ukiut tamaasa ulluni tallimani katersuuttarput.

Cuppi kalaallit arsaattartunut immikkuullarilluinnarpoq, unamminerit tamarmik ivigaaqqanik arsaattarfiusumi nunanit tamalaat akornanni unammiffigineqartartuni ingerlanneqartarpoq.

Iligiit tamarmik sungiusaammik unamminissaat, minnerpaamik pingasoriarlutik pingaarutilinnik unamminissaat kiisalu Dana Cupimi unammersuarnermi playoff-imi unamminissaat qulakkeerneqartarpoq. 15-it inorlugit ukiulinnut unammineri minutsinik 20-nik marloriarlutik sivisussuseqartarput, angajulliunerusullu minutsinik 25-nik sivisussuseqartumik marloriarlutik unammisarput.

Hjørringimiitillutik arsaattartut atuarfinni najugaqartarput – Vendsysselimilu atuarfiit tamangajammik atorneqartariaqartarput inuusuttut bussinut ilaallutik arsaattarfinnut assigiinngitsunut ingerlaartinneqartussat inissaqartinniarlugit.