Ilulissani imaani nalunnguarrattoqalersoq

Kalaallit Nunaanni imaani nalunnguarranneq siullerpaaq, Ilulissani arfininngornermi ingerlanneqassaaq. Peqatigiiffik aaqqissuisuusoq, Siku Svøm, taama nalunaaruteqarpoq. Taassuma Avannaata Kommunia aaqqissuussami suleqatigaa.

Ilulissani mittarfiup ungasinngisaani, Itisuarsummi, nalunnguartoqassaaq. Kikkulluunniit peqataarusuttut peqataasinnaasut, nalunnguarnerlu nalunaaqutaq 11.00-mit 15.00-mut ingerlassasoq nalunaarutigineqarpoq. 

Atisanik naluutinik naluusiinnarluni nalunnguarnissami takissutsit assigiinngitsut naammassineqarsinnaasut tassaapput 25, 50, 100 imaluunniit 250 meterit. Imaq gradinit tallimanit nillerneruvoq. 

- Kalaallit Nunaata imaani sikulimmi nalunnermut orniginartumik ornittagassanngortinnissaa aamma imaani isumannaallisaaneq pillugu ilisimasaqarnerup annertusarnissaa siunertaavoq. Tamatumani takutinniarneqarpoq nillertumi imaani inuit amerlasuut isumaqarnerattut minutsit 1–2 kisimik pinnagit sivisunerusumik aniguinissamut periarfissaqartoq.

- Peqataasussat ilagaat Danmarkimi qaffasissumik unammisartuusoq Henry Stokholm, ukioq manna aallartilaartoq imaani nalunnermi kilometerinik sisamanik naloreerluni nunarsuarmi imaani sikulimmi nalunnerit takinersaasa pingajuannik angusaqartoq, peqatigiiffiup, Siku Svøm-ip, ingerlatsisua, Bo Krüger oqarpoq.

Aaqqissuisut Iluliarmiut takornariallu soqutiginnillutik peqataanissaat kissaatigaat.