Imerniartarfimmi qarasarsorneq

Inuit ilaasa misilitsinnerit nuannarinngilaat - allalli nuannarilluinnarpaat.

Tamanna Nuummi qaammat kingulleq sisamanngornermi — ullormi ilinniartut amerlasuut nasartaaffianni - unnukkut erseqqippoq. Misilitsinnermi naammassimmat ilinniarnertuunngorlaat arlallit imerniartarfimmut Daddy'simi Nuummiittumeerrapput.

Tassanimi sisamanngornerit tamaasa imerniartarfik nalorsittaarigaangat misilitsissinnaasarput.

Periuseq pisariitsunnguuvoq. Peqataasut iligiikkaarlutik nalunaassapput, apeqqutillu arlallit eqqortumik akiniartussaavaat - iligiillu pikkorinnerpaat imigassamik kimittuumik puiaasamik Daddy’s-imi imigassaminnik eqquissapput.

Nalorsittaarineq nalorsittaarisumit aqunneqartarpoq – sisamanngornermilu Inuk Stender Jensenip, nammineerluni apeqqusiorsimasup, kikkut ajugaanersut aalajangerlugillu naggataatigut ajugaasup eqqugaanik tunniussisuullunilu tulliusumut pingajuusumullu pisissutissanik tunniussissaaq.

Siullermik kissassertoqassaaq

Unnuk taanna nalunaaqutaq arfineq-pingasunut aallartittussaapput, peqataasulli amerlanersaat siusinnerusukkut takkullutik immiaaqqamik ataatsimik marlunnilluunniit kissassaasersimapput. Eqimattatut arfineq-pingasut pallillugit ilaasoqarluni peqataasoqarsinnaavoq.

Apeqqutit pappialanngorlugit agguaanneqartut akineqarnerisa nalaanni ini nipaallisarpoq, akissutilli tunniunneqarnerisa kingorna unamminerup immikkoortuata tullianut ingerlaqqinnginnermi qiimmaqqittoqartarpoq.

Sapaatip akunnerani tassani inuiattut ullorsiortoqartussaammat Kalaallit Nunaat sammineqarluarpoq. Siullermik unamminerit immikkoortui sisamat ingerlanneqarput, tamarmik immikkut qulinik apeqquteqartarput, peqataasullu minutsini 15-ini akissuteqarsinnaatitaapput. Apeqqutit ilaatigut nunatsinni politikkimut, kulturimut pinngortitamullu tunngapput – naggataatigullu nipilersuutinik appittoqaraangat unammisut erinarsuutit aqqi, kikkut nipilersortuunersut qangalu saqqummersimanersut eqqoriartassavaat.

Akunnerup ataatsip ingerlanerani apeqqutit 40-t akineqareersut nipilersuutillu tallimat eqqoriarneqareersut Inuk Stender Jensen ajugaasut toqqartinnagit pointinik kisitsilluni nerrivimmut ingippoq.

Sisamanngornermi unnukkut iligiit „No Pizza Here“, imerniartarfinni nalorsittaarinernut peqataasartut ilisimasaqarluartullu, ajugaapput.

- 2024-mi pissartanngorniunnermi ajugaavugut, Milo Gudmundur oqaluttuarpoq.

- Taamanimiilli tujuuluaqqagut atulerpagut. Iligiit atiat serveritsinnit, ilaatigut qarasaasiakkut pinnguaammik Counterstrikemik pinnguarfigisartakkatsinneersuuvoq.

- Sisamanngornerit tamaasa peqataasarpugut. Nalinginnaasumik minnerpaamik inuit quliusarpugut, iligiinnilu ataatsini annerpaamik arfinerq-pingasunik ilaasoqarsinnaammat iligiinnut tallimanut arfinilinnulluunniit inuttalinnut agguataartarpugut.

Ajugaaniarlutik peqataasartut

- Peqataanitsinni ajugaanissarput pingaarnertut siunertarineqartoq qularutissaanngilaq, taamaalillutami unnuk taanna imigassatsinnik eqquisinnaavugut imaluunniit sapaatip-akunnerata naanersiornissatsinnut toqqorsinnaavarput – Daddy’s-imiinnaq imeqqusaavarput anillaassinnaanagulu, Milo Gudmundur nassuiaavoq.

Imerniartarfimmi nalorsittaarineq ukiuni kingullerni nunarsuaq tamakkerlugu nuannarineqarlualerpoq. Tuluit Nunaanni pilersimasoq ’Pubquizimik’ taaguuteqarnerata ersersippaa, Barnabylu inuusuttuusorli nuannarineqalereersimavoq.

Barnaby pillugu aallakaatitassiat nangeqattaartut siulliit ilaanni imerniartarfinni unammineq ima pimoorunneqartigaaq allaat nakuusertoqarlunilu toqutsisoqarluni.

Nuummili suli taama pimoorussitigisoqanngilaq. Tassanimi nuannisarnissaq pingaarnerpaavoq.

- Ajugaaffiginiarsarisartakkatsinnik unammisartorpassuaqarmat unammillernartortaa nuannisarnissarpullu pillugit peqataasarpugut. Illaruaatiginnissinnaatitaaneq aamma kajumissuseqalersitsisarpoq, Milo Gudmundur naqissusiivoq.