Inuusuttut ujakkaarnermi ukioq manna angusarissaarnerpaasut

Sasja Joelsen Hendriksen, Marika Magnussen, Elias Nordahl aamma Qunaaq Jensen Lillehammerimi inuusuttut nunarsuarmi pissartanngorniunneranni 1,4 kilometerimut sprinterluni umammiuaarnermi aallartilluarput.

Taakkua sisamaallutik ukiumi matumani timersorfiusumi sapinngisartik tamaat unammeqataapput, taamaattumillu nunanit tamalaanit unammiffiit sakkortunerpaat ilaannit unammeqqaarnertik naammagisimaarsinnaalluarpaat.

Marika Magnussen iligiinni angusarissaarnerpaavoq, peqataasut 79-iusut akornanni normu 46-nngorpoq. Taanna kvartfinalimut anngunnissamut sekundinik arfineq-marlunnik kigaanneruvoq, taamaalillunilu kalaallini qallunaanilu iligiinni nukappiaqqani niviarsiaqqanilu ullormi tassani angusarissaarnerpaatut inissilluni.

Timersoqatigiit unamminerup nalaani tapersersorneqarluarput, Nunatsinniillu tapersersuisut 25-t missaanniittut – ilaqutaasut, sisorarnermi ikinngutit GIF-imiillu aallartitat – ujakkaartartunut kaammattuilluarput.

Ujakkaartartut pingasut 20 kilometerimut pingasunngornermi ingerlaassapput, Qunaaq Jensenili tallimanngorpat 10 kilometerimut ingerlaassalluni. Ukioq manna namminneq inuttut aatsaat taama angusarissaartigalutik juniorit pissartanngorniunnerini tunngavissaqarluarput.