Isikkamik arsaalluni silami pissartanngorniunnerit aallartilluartut

Kalaallit Arsaattartut Kattuffiat (KAK) ukiormanna silami isikkamik arsaallutik unammersuartitsineri aallartillugit, sapaatip akunnerata siuliani ukioqatigiiaat 15 ataallugit ukiullit, sapaat juunip aqqarnat ilanngulugu Aasianni nunatsinni pissartanngorniupput.

Meeqqaniit inersimasunut silami isikkamik arsaalluni nunatsinni pissartanngorniunnissamut aaqqissuussassat sumiiffinni assigiinngitsuni ingerlanneqassapput.

Arnat isikkamik arsaallutik nunatsinni pissartanngorniunnissaat qulakkeerniarlugu Nuummi timersoqatigiiffinneersut ataatsimut iligiillutik unammersuarnermut peqataasinnaanissaat qulakkeerniarneqarpoq. Nunatsinni isikkamik arsaallutik silami pissartanngorniunnissat naggaserlugit, angutit augustip pingajuaniit qulingiluaat ilanngullugu unammissapput.

Nivissat nukappissallu pissartanngorniuttut

Silami isikkamik arsaalluni pissartanngorniunnerit aallartillugit, nivissat aamma nukappissat U-15-nik taaneqartartut Aasianni nunatsinni pissartanngorniullutik ulluni makkunani unammersualeruttorput.

- Silami isikkamik arsaalluni nunatsinni pissartanngorniunnerit aallartillugit 15 ataallugit ukiullit U-15-nik taaneqartartut ulloq 7 juli Aasianni timersoqatigiiffik T-41 aaqqissuisoralugu, silami arsaallutik pissartanngorniullutik aallartipput, Kenneth Kleist, KAK-imi siulittaasoq oqarpoq.

Arnat unammersuarnissaat qulakkeerniarneqartoq

Nunatsinni pissartanngorniulluni unammersuarnerit ingerlanneqarsinnaapput unammersuarnermut timersoqatigiiffiit imaluunniit iligiit peqataasut ikinnerpaamik sisamaagaangata. Unammisussat iligiit naammatsinniartarneri ukioqatigiiaanni assigiinngitsuni ukiuni kingullerni unammillernarsimavoq.

Maannalu arnat unammersuarnissaat qulakkeerniarlugu Nuummi timersoqatigiiffiit akimorlugit iligiinnik pilersitsilluni peqataatitsinissaq misissorneqarpoq.

- Byholdimik taasara, taanna pillugu KAK-mi naapittussaavugut, taavalu arnat arsaattartut angalarusuttut immaqa arsaakkusuttut klubit marluk ataatsimoorusussinnaanersut KAK-mi unammersuarnermut suleqatigiissitap, misissorpaa NÛK, GSS aamma B-67-siunatik Nuuk Holdiullutik, Nuummiit holditut unammersuariarsinnaanissaat anguniarneqarpoq, Kennet Kleist oqarpoq.

Nunatsinni arnat isikkamik arsaattartut siuarsaavigineqarnerisa malitsigisaanik, nunanut allanut unammisartut KAK-imit ukkatarineqarnertik tunngavigalugu, unammersuartarnissaat pingaaruteqartoq oqaatigineqarpoq.

- Arnat arsaattartut tamarmik pingaaruteqarpoq takutitsissallutik landsholdinut imminnut piukkukkunik nunatsinni pissartanngorniunnermut peqataanissaat, soorunami takutikkiartorlutik. Taamaammat aamma arnat landsholdi sumut killinneri landstrænerip Danny Jungip tamaasa nalilersortussaagamigit, Kenneth Kleist oqarpoq.

Arnat nunanut allanut unammisartut Savalimmiunut unammiartornissaat aamma aappaagu Islands Games-imut peqataanissaat pilersaarutaasoq KAK ilanngullugu paasissutissiivoq.

Angutit unammersuarnissaat

Nunatsinni angutit isikkamik arsaallutik sapaatip akunnera 32-mi (3. August - 9. August, 2026, aaqq.) Maniitsumi pissartanngorniunnissaat ingerlanneqassaaq.

Peqataasussanut nunap immikkoortuini sapaatip-akunnera 27-mi anngunniunnerit ingerlanneqassapput, anngunniunnermi annguttut nunatsinni pissartanngorniunnermut peqataassapput.

Nunatsinni angutit unammisaqattaartarneri amerlineqarnissaat KAK-imit sulissutigineqarpoq, isikkamik arsaattartut siammasinnerusumik ineriartortinneqarnissaat tassani siunertaralugu.

- Siulersuisut kissaatigigamikku peqatigiiffiit nunaqarfimmiittut illoqarfik mikinerusuniittut unammisaqattaarnermi peqataasaqqilernissaat. Unammisaqattaarnerillu assigiinngitsut suminngaanniit aallartissappat, byturnerinngeqqaartarnissaat piumasaqaataalissanersoq siulersuisut aalajangiiffigissavaat, Kenneth Kleist oqarpoq.

Nammineq kajumissutsimik suliaqartut

Nunatsinni unammersuarnerniik sumiiffinni timersoqatigiiffinni nammineq kajumissutsimik suliaqartut kivitsisuusarput, massakkumullu unammersuarnerni aaqqissuisuusussat nammineq kajumissutsimik suliaqartussanik amigaateqarnerinik tusagaqartoqartarnani.

- Uagut KAK-imiit naatsorsuutigisarparput nammineq kajumissutsimik suliaqartussat naammattut pigineqarmata nunatsinni pissartanngorniutsitsinissamut timersoqatigiiffiit qinnuteqartartut, Kenneth Kleist oqarpoq.

Timersoqatigiiffiit nunatsinni pissartanngorniunnissanik aaqqissuisut kattuffimmit tapersersorneqarput.

- KAK-iminngaanniit malinnaaffigineqarluarumaarpusi taavalu neriuppugut nuannisarluarumaartusi arsaattunillu nuannersunik isiginnaarluarumaartusi, Kenneth Kleist naggasiivoq.