KAK allaffeqarfimmini nukittorsaavoq

Sulisut nutaat taakku KAK-p allattoqarfiani suliassat ersarinnerusumik agguataarneqarnissaannik isumaginnittuussapput, taamaalilluni KAK klubbinik, meeqqanik inuusuttunillu, nuna tamakkerlugu unammisartunik, ilinniartitsinernik aammalu Kalaallit Nunaanni isikkamik silami aammalu futsalimik arsaannermik ineriartortitsilluni aallussinerulersinnaalissaaq.

Taamak ilisimatitsipput Kalaallit Arsaattartut Kattuffiat (KAK) tusagassiuutitigut nalunaaruteqarlutik.

Atorfinitsinneqartut inuit marluk tassaapput Esther Brandt Arens aamma Eva Davidsen. Esther Brandt Arens ukiorpassuarni allaffissornermik suliaqarnermik, HR-imik, aqutsinermik, ilinniartitaanermik aammalu suliffeqarfiit kattuffiillu ataqatigiissaarneqarnerisa ineriartortinneqarneranik misilittagaqarpoq. Taanna ilinniartitaanermut pisortatut sulereerluni kattuffimmi atorfinippoq.

Eva Davidsen allaffissornermik, aningaasanik aqutsinermik. Missingersuutinik nakkutilliinermik, ilaasortanik kiffartuussinermik, HR-imik aammalu ataqatigiissaarinermik misilittagaqarpoq. Taanna ilaatigut Kalaallit Nunaanni Eqqartuussivinni aamma SIK-mi atorfeqarsimavoq, KAL ilisimatitsivoq.

KAK-p siulittaasua, Kenneth Kleist, nassuiaavoq, suliassat amerliartortutut suliarineqarnissaannut kattuffik nukinnik amerlanerusunik pisariaqartitsisoq:

– KAK maanna annertuumik ineriartorpoq, tamannalu suliassanik amerlanerusunik aammalu piumasaqaatinik annertunerusunik nassataqarpoq. Taamaattumik allattoqarfiup nukittorsarnissaa pisariaqartissimavarput, aaqqissuussisinnaasunik aammalu akisussaaffimmik tigusisinnaasunik sulisoqalerluta. Esther aamma Eva assigiinngitsunik piginnaasaqarput, taakkulu imminnut pitsaasumik tapertariipput, KAK-ip siulittaasua Kenneth Kleist oqarpoq.