KAK sungiusaasunik ilinniartitsisoq

Patrick Frederiksen, Malik Mikaelsen, Rass Abelsen, Mikki Brønlund, John Pedersen aamma Alex Hermansen – Kalaallit Nunaanni futsalimi sungiusaasut tunniusimanerpaat arfinillit – sapaatip akunnerata naanerani kingullermi Nuummi pikkorissarput. Taakku B1-imik pikkorissarneq naammassivaat, taannalu nunatsinni sungiusaasunngorniarnerup pitsaassusaa qaffassarniarlugu pikkorissarnermi nutaami marlunnik immikkoortortalimmi angusaqarfiusumi siullersaavoq.

KAK-p futsalimi sungiusaasunik pikkorissaasarnera timersornerup ilinniartitsinerullu pitsaassutsimik nukittorsarneqarnissaanik suliniuteqarneranut ilaavoq. Sungiusaasartut arfinillit taakkua Kalaallit Nunaanni futsalimik sungiusaasut siunissamilu piginnaanillit ineriartortinnissaannut pingaaruteqarluinnarput.

KAK illoqarfinni qulingiluani 2025-mi pikkorissartitsisareerpoq, ilinniaqqikkusussuserlu malunnaatilimmik qaffariarsimavoq. Klubbini sungiusaasut tamarmik ulluinnarni unammisarfimmi atukkaminnut naleqqussartumik sungiusaasartutut ilinniagaqarnissaat anguniarneqarpoq.

- Soqutiginninneq aatsaat taama annertutigaaq, sungiusaasuvullu akisussaafferujussuarmik tigusipput. Siunissami sungiusaasussat ilusilersorpaat, taamaalillutillu siunissami futsalimi unammisartut ilusilersorlugit, KAK-mit oqaatigineqarpoq.

Sungiusaasut ilinniartitsisutut atuutiinnanngillat, aammali siunnersuisartutut, kulturimik ingerlatitseqqiisutut maligassiuisutullu sulisarput. Sungiusartut tamarmik isumassarsisittarnissaat, sungiusarfissaminnik toqqissisimanartunik pilersitsisinnaanissaat kajumissaarisinnaanerallu suliassaraat, kiisalu sungiusarnermi unamminermilu atortussanik tigussaasunik tunisisussaapput.

KAK-p sungiusaasunik ilinniartitsinissamik suliniuteqarnera aamma nukittuunik sungiusaasoqalernissaq kattuffiup siulersuisuinit tapersersorneqarpoq. Tamanna aningaasaliinertut pitsaasutut isigineqarlunilu Kalaallit Nunaanni timersornerup siunissaq ungasinnerusoq eqqarsaatigalugu ineriartornissaanut aalajangiisuulluinnarpoq.

Ineriartornermi tamatumani KAK-p siunissami futsalip meeqqat atuarfianni timersornermik ilinniartitsinermut ilanngunneqarsinnaanera periarfissatut isigaa. Kattuffimmiit kommuunit ilinniarfiillu tamanna pillugu oqaloqatigineqarnissaat, politikkikkut allaffissornikkullu tapersersorneqarpat, piareersimaffigineqarpoq.

KAK-p ilinniartitsisunik pikkorissartitsinerit marluk ukiup naannginnerani aallartissavai, taakkulu futsalimi ilinniartitsisunik nukittunerusunik aamma piginnaaneqarnerusunik pilersitsissapput.