ARCTIC WINTER GAMES
Kalaallit Nunaanniit unammisartut stick pull-imi unammiuaarnermi siuttuupput
Nunatsinnit Dene Gamesimi unammiarngaartut unamminerminni ujaminnapput, siornatigullu pissartaasoq kuultinnaqqippoq.
Angutit stick pullimik unammineranni pissartaareersoq kuultinnappoq.
Assi: Hanna Hviid
Arctic Winter Gamesimi ukioq manna unamminerit ataasinngornermi aallartipput, Team Kalaallit Nunaallu sukataarluinnarlutik unammipput – arlalinnillu ujaminnallutik, ingammik stick pullimi.
Ukiut marluk matuma siorna Minik Møller Platou angutit stick pull-imi unammineranni kuultinnappoq. Maannalu kuultinnaqqippoq.
- Soorunami kuultinnannissara illersortariaqarpara, Minik Møller Platou unamminerup naligiiffiungaartup kingorna tulluusimaarluni Sermitsiamut oqarpoq.
Dene Gamesimi stick pull unammissutaavoq, unamminermi qisumineq orsuarternikoq unammisunit noqquruunneqartarpoq.
- Tupaallappunga, ilimagisimanngilarami ajugaaffigeqqissallugit, Minik Møller Platou oqarpoq nassuiaallunilu unammineq ilungersunarsimasoq.
Dene Gamesimi unammiuaarnerit nalaanni nillialluni illersuineq ileqquuvoq, timersoqatigisartakkaminit tapersersorneqarnertik qujamasuutigingaarsimallugu Minik Møller Platou oqaluttuarpoq.
- Ajugaanissamut iluaqutigaara, oqarpoq
Unammisartut pikkorissut tupigusuutigai, isumaqarporlu Dene Gamesimi unamminerit tulliuttut ilungersunarnerujumaartut.
- Ilimagilluinnarpara tulliani Arctic Winter Gamesertoqarpat suli nukittunerujumaartut, ajugaarusussaqaammi, oqarpoq.
Danny Clasen angutit U18-it unammineranni kuultinnappoq.
Minik Møller Platou killitsissimasoq ajugaanermi kingorna sungiusaasuminik pakkussivoq.
Assi: Hanna Hviid
Perngaammik unammisoq sølvinnattoq
Aamma arnat stick pull-imi ujaminnapput. Paninnguaq Qvist arnani unammiuaarnerni ammasuni siullerpaamik kuultinnappoq.
Ullormili tassani siusinnerusukkut arnat U18-it stick pull-imik unammineranni Aviana Kristiansen siullermik sølvinnappoq, misileeqqinnerminilu ajugaaniutivinnissamut peqataasinnaalerpoq.
Sapiilluinnarluni akiuuppoq sølvinnallunilu. Tamatuma kingorna, timersortartoq inuusuttoq nuannaarpasingaartoq, Sermitsiap oqaaseqartinniarlugu ornippaa.
Ajugaaniutivinnermi qanoq misigisimanersoq aperineqarami Aviana Kristiansen ima akivoq:
- Pissanganaqaaq.
Aviana Kristiansen AWG-mi unammeqataaqqaarpoq, Dene Gamesimilu unamminerni arlalinni peqataassaaq, tamannalu qilanaaraa.
- Sapinngisara tamaat sukataassaanga, oqarpoq.
Kristine Sigurdsen arnani inersimasuni bronzennappoq.
Uani takuneqarsinnaapput kalaallit tallimat stick pullsimi ujaminnataasut.
Assi: Hanna Hviid
Kalaallit Nunaat two-foot high kickimi sølvinnappoq
Dene Gamesimi nipituumik nilliasaqattaarfiusoq Arctic Sportimik unammiffik nipaannerujussuuvoq. Unammiuaarnerit nalaanni isiginnaartut amerlanertigut nipaqarneq ajorput, timersortartoq nammineq ersaattaaqqusilerpat aatsaat ersaattaattoqalersarluni.
Team Kalallit Nunaat Arctic Sportimi unamminermi ataasinngornermi angusarissaarluarmat ersaartaatigineqarpoq.
Unamminerit aallartillugit arnani angutinilu triple jumpimi Petra Amossen Abia Zeebillu bronzennapput.
Taava arnat angutillu U17-it two-foot high kick unammissutigaat, tassa pissilluni isikkanik marlunnik puisip amianik arsaq tukiniarlugu pissittarneq.
Randi Zeeb Sigurdsen aamma Inunnguaq Amossen matumani malinnaavigineqarluarput.
Inunnguaq Amossen teknikkimigut takutitsilluarpoq 228,6 centimeterimik takissusilimmik tukersilluni sølvinnakkami.
Randi Zeeb Sigurdsen unamminermi aallartilluarpoq, 177,8 centimeterimulli tukeriarnermini qitimigut annerpasilluni tukeriakkani uniorpaa – tassa 2024-mi AWG-mi rekordiminit 190,5 centimeterinit 10 centimeterinik annikinnerusumut tukeriarnermi unittariaqalerluni. Yukonimeersoq kuultinnattup arsamik 187,9 centimeterimik takitigisumik nivinngarneqarsimasoq tukerpaa, taamaammallu rekorti qaanginngilaa, Randi Zeeb Sigurdsenillu suli rekordini attappaa.
Unnummi tamatumani Inuuteq Josefsen angutit ammasumik unammineranni head pull-imi kuultinnappoq.
