Kalaallit taekwondo-rtartut nunanut allanut unammisartui Kretami EM-ernissamut piareeqqasut
Timersortartut tallimat – siorna angusarissaarnerup kingorna ujaminnaqqinnissartik neriuutigalugu - Kalaallit Nunaat sinnerlugu peqataassapput
Inukkuluk G. Lennert siorna Thessalonikimi Grækenlandimiittumi nunat tamalaat pissartanngorniunneranni inersimasuni tul-imi bronzennappoq, maannalu taekwon-do-rtartut allat sisamat peqatigalugit EM-imut peqataassaaq.
Assi: Greenland Taekwon-Do Federation - Facebookimi qupperneranit
Kalaallit taekwondortartut Kretamut, sapaatip akunnerani matumani marlunngornermiit arfininngorneq ilanngullugu Europami pissartanngorniuffiusussamut, apuussimalerput.
Nunanut allanut unammisartut piareersarnissamut piffissaqarluarsimapput, pingaartumik tul-imik unammisartut sapaatip-akunnerani kingullermi kattuffiup aaqqissugaanik ataatsimoorussamik sungiusarnermikkut pikkorinnerulerput.
Kalaallit Nunaat tul-imi frikampimilu ukioq manna tallimanik peqataatitaqarpoq. Inukkuluk G. Lennert aamma Angutinnguaq J. Nielsen inersimasuni tul-imi unammissapput, Arnaaluk Frederiksen inuusuttuni unammeqataassaaq. Maasi Davidsen 78 kilo ataallugu oqimaassusilinni frikampimi unammissaaq, Lars Lennert Abelsenilu 35-t sinnerlugit ukiulinni tul-imi unammissalluni.
Siorna EM-ertoqarmat kalaallit Angutinnguaq Nielsen aamma Lars Lennert Abelsen bronzennapput – angusallu ukioq manna ingerlateqqinniarlugit neriuuteqarput.
Malittarisassat nutaat iluaqutaasinnaasut
Pissartanngorniunnissamut piareersarneq nunanut allanut unammisartunut sungiusaasoq Louis Nielsen naapertorlugu siunertaqarluarpoq, tassanilu ilaatigut nunani tamalaani piumasaqaatinut naleqqussartoqarpoq.
- Timersortartut EM-imut sungiusarluarsimapput, ukiullu affaani kingullermi unamminermi periusinut unamminernullu naleqqussarput. Tamanna siuariarfigaarput. Ukioq manna EM-imi unammineq malittarisassat nutaat malillugit ingerlanneqarpoq, taamaammat unamminerit qanoq ingerlassanersut pissanganassaaq. Qularnanngilluinnarporli timersortartut Kalaallit Nunaannut sinniisuujumallutik sapinngisaminnik iliussasut, Louis Nielsen oqarpoq.
Unammiuaarnerit saniatigut GTF-ip siulittaasua Vivi G. Lennert Europami kattuffiup ataatsimeersuarneranut peqataassaaq.
Inersimasut inuusuttullu nunanut allanut unammisartut Elite Sport Greenlandimit aningaasalersorneqarput
