Karaatertartut Islandimiinnerminni nutaanik piginnaasaqalertut

Nuuk Shotokan Karate Do-meersut Islandimi sungiusaqataasarnerat ukiuni 15-ini kingullerni ileqquuvoq.

Timersoqatigiiffik eqimattanik ukiut tamaasa angalatitsisarpoq, taakkua teknikkimit pitsanngorsarnissaannut sungiusarnermik aamma assigiinngitsunik ukiullit piginnaanillit ataqatigiinnerulernissaannik ikiorneqartarput.

Ukioq manna angalaneq aamma taamaappoq — angalanerup tamatuma peqatigiiffiup ineriartorneranut qanoq pingaaruteqartiginera erseqqinnerusumik uppernarsarneqarpoq.

Sensei Amosimit sakkortuumik sungiusarneqarneq

Nuuk Shotokan Karate Do-meersut Islandimut angalagaangamik tamatigut nuannersunik misigisaqartarput - ukiormanna Sensei Richard Amosimik sungiusarneqarneq, Shotokan-karate-mi ilisimaneqarluartoq misilittagaqarluartorlu, immikkut ittuuvoq. Sensei Amos ileqqorissaarnermik, aqutsilluarnermik nunarsuarmi ilisimaneqarluartoq, ulluni arlalinni sungiusartitsivoq, tassani teknikkit tunngaviusut aammalu nukittussuseq eqqarsartaatsikkut misilinneqarlutik. Teknikkit tunngaviusut, kihon-imik (基本) taaneqartartut, karatertarnermi tamani tunngaviupput aammalu sakkortuumillu sungiusarneqarlutik. Taamatuttaaq peqataasut kata-mik (形) taaneqartartoq misileraaffigaat, periutsit aalajangersimasut inunnik arlariinnik saassunneqarnermi qanoq atorneqarsinnaanerannik takutitsisut. Kata aqqutigalugu teknikkit ingerlaavartut sungiusarneqartarput, eqqoqqissaartumik aammalu eqqarsartaatsikkut eqeersimaarnermik nukittorsaatigineqartartoq. Meeqqanik inersimasullu karatemik Mikkel Bendixeni sungiusaasup angalaneq inuttut ineriartornissamik, teknikkinillu piginnaasanik ineriartortitsinissamik periarfissiilluartoq isumaqarpoq.

- Teknikkikkut immikkuualuttut — piffissamik eqqortumik atuineq, oqimaaqatigiissaarineq timimillu aqutsilluarneq  pingaartinnerullugit ukkataraakka. Teknikkinik atuinermi paasinnissinnaassusera annertunerulerpoq, taakkualu sungiusaaninni atorsinnaasunngorlugit timersoqatigiiffitsinni sulininnut tunngatilugu angerlaatissavakka, Mikkel angalanermini misilittakkanik ilisimasanillu nutaanik aallersimasoq taama oqaluttuarpoq.

Siunissami timersullammanngortussat

Meeqqat angalanermi maluginiarneqarluarsimapput. Ileqqorissaartuunerat, tunniusimanerat ilinniarusussuseqarnerallu tupinnartuuvoq. Sungiusarnerit piffissaliunneqartut kisiisa pinnagit nalinginnaasumit sivisunerusumik sungiusartarput, tamatumalu kingunerisaanik teknikki pitsaanerusoq angusaqarfigalungulu pinertusaarsinnaanerulerput. Meeqqat sungiusarnermi imminnut tapersersoqatigiittarlutillu kajumissaareqatigiittarnerat Mikkelip maluginiarpaa  – tamannalu ataqatigiinnermik nukittuumik pilersitsinissamut pingaaruteqarpoq.

-  Peqataasut aatsaat taama piumassuseqartigipput, ingammik meeqqat akornanni ineriartornissamut  piumassuseqarnerunerat ukioq manna ersarippoq. Siunertaqarluartumik suliniarnissaq namminerlu ineriartornissaminnut akisussaaffeqalerunnerat ersarippoq, Mikkel tulluusimaarluni oqaluttuarpoq.

Peqatigiinneq kulturikkullu misigisat

Teknikkimik pitsanngorsaaneq sungiusarnermi matumani kisimi pineqarnani – aammali silarsuup ilaanik nutaanik misigisaqarnissamut ataatsimoornerullu nukittorsaanissaanut periarfissiivoq. Misigisassarsiortitsinermi misigisat annerit alutornarluinnartoq Lava Show ilagaat, Den Gyldne Cirkelimut ilisimaneqarluartumut nunap iluaniit tatsini kissartuni Secret Lagoonimi kinisimaarneq. Mikkel Bendixenip erseqqissarpaa sungiusarnerup nalaani peqataasut ulluinnarniit allaanerulluinnartumik karatemik ilikkagaqarsinnaanerat. Tamatuma saniatigut misilittakkanik nutaanik isumassarsitinneqarlutillu sungiusarnermi inuttullu ineriartornermi atorsinnaasaminnik pissarsisarput.

- Taamatut sungiusarneq peqataasut ulluinnarni sungiusarnerminnit allaanerulluinnartumik karatemiinnaanngitsoq sammisaqarnissamut periarfissaqalersippai, aammattaaq misilittakkanik nutaanik sungiusarnermi inuttullu ineriartornermi iluaqutaasunik pissarsisitsisarpoq, nassuiaavoq.

Ataatsimuussuseq sungiusartarfimmiinnaanngitsoq nukittorsarneqarpoq. Ataqqinninneq, tapersersoqatigiinneq suleqatigiinnerlu sungiusarnermi  aamma sammisassaqartitsinikkut misigisassarsiortitsinikkullu sunniuteqartut Mikkelip maluginiarpaa.

- Ataatsimoorneq angalanermi pitsaalluinnarpoq. Sungiusarnermi ataqqinninneq tapersersuinerlu ukioqatigiiaat assigiinngitsut piginnaanerillu apeqqutaatinnagit ersersinneqartarput, sungiusarnerup avataatigut aamma taamaappoq sammisaqarnertigut ataqatigiinnermik ineriartorfiusumik, Mikkel qungujulluni oqarpoq.

Ileqqoq ingerlaqqittoq

Nuuk Shotokan Karate Do nunanit tamalaanit peqataaffigineqartunik sungiusaanermik ukioq manna ileqqutoqqaminnik ingerlatitseqqittuarpoq. Peqataasut misilittagaqalerlutillu piginnaanngorsarput,  aammattaaq sungiusarnerup saniatigut inuttut ineriartornermut iluaqutaasumik.

- Islandimi angalasarnivut timersoqatigiiffitta ukiumoortumik aalajangersimasumik sammisassat ilaattut ingerlatiinnarnissaa, sungiusaasullu sungiusaqatigisatta suleqatigiinnarnissaat, Mikkel Bendixen oqarpoq, taassumalu ileqqutoqqat ingerlateqqinneqarnissaat naleqangaartutut isigaa.

Ukiumi angusat pitsaasut misigisallu nuannerluinnartut tuermioralugit Islandimut angalasartup ingerlateqqinnissaa timersoqarigiiffimmut Nuuk Shotokan Karate Do-p ullorsiutaanut ilanngunneqaqqinnissaa pinngitsoorneqarsinnaanngilaq. Inersimasut meeqqallu sungiusartartunut angalaneq timersoqatigiiffiup teknikkikkut inuttullu ineriartornermut attuumassuteqarluinnartippaa – ileqqoq pinngitsoorneqarsinnaajunnaarnikoq