Maannamut angusat: Timersoqatigiit Kalaallit Nunaat AWG-mi ima ingerlapput
Issittormiut eqqilillu pinnguaataannik timersortartut aallartilluarput. Nerrivimmi arsaararnermi kalaallit aamma ujaminnattarput.
Petra Amossen arnat two-foor high kickimi unammineranni nunarsuarmi AWG-milu marlunngormat rekordiliivoq.
Assi: Hanna Hviid
Arctic Winter Games 2026-mi ullut aappaat naammassivoq, timersoqatigiillu Kalaallit Nunaat ujaminnattaqattaareerput. Qassiuppalli?
Timersortartut maannamut kuultinik qulinik, sølvinik sisamanik bronzenillu arfineq-marlunnik – katillugit 21-nik – ujaminnapput.
Pingaartumik Issittormiut eqqillillu pinnguaataannik unammisartut ingerlalluarput, aammali nerrivimmi arsaarartartut ujaminnattarput.
Sulorarnermi sapaatip-akunnerani matumani kingusinnerusukkut pissartanngorniuttoqassaaq, snowboardernermilu normu 4-nngortoqarlunilu normu 5-nngortoqarpoq. AWG arfininngorpat tungaanut ingerlanneqassaaq, tassanilu naggataarnersiortoqassaaq.
Maannamut ujaminnattaat 21-t ima agguataarneqarput:
Kuultinnattut
Inuuteq Josefsen angutit ammasumik unammineranni (issittormiut timersuutaanni) head pull-imi kuultinnappoq.
Paninnguaq Qvist arnat ammasumik unamminerani eqitami (eqqillit pinnguaataanni) kuultinnappoq.
Minik Platou angutit ammasumik unammineranni eqitami (eqqillit pinnguaataanni) kuultinnappoq.
Danny Clasen angutit 18-it inorlugit ukiullit akornanni eqitami (eqqillit pinnguaataanni) kuultinnappoq.
Marlulissat Arnartaq Brønlund aamma Nunni Kleist Brønlund arnat 15-it inorlugit ukiullit nerrivimmi arsaarartartut iligiiaarlutik unammineranni kuultinnapput.
Inuk Mozfeldt aamma Minik Poulsen angutit 15-it inorlugit ukiullit nerrivimmi arsaarartartut iligiiaarlutik unammineranni kuultinnapput.
Uiloq Dahl aamma Uiloq-Amaliannguaq Jakobsen arnat 18-it inorlugit ukiullit nerrivimmi arsaarartartut iligiiaarlutik unammineranni kuultinnapput.
Randi Zeeb Sigurdsen arnani 17-it inorlugit ukiullit kneel jumpini (issittormiut pinnguaataanni) unamminermi kuultinnappoq.
Majka Qvist arnani ammasumik unamminermi snow snake-mi (eqqillit pinnguaataanni) kuultinnappoq.
Petra Amossen arnani ammasumik unammisitsinermi two-foot high kick-imi (issittormiut pinnguaataanni) kuultinnakkami taamaalilluni nunarsuarmi AWG-milu rekordiliivoq.
Nerrivimmi arsaarartartut pingasunik kuultinnallutillu ataatsimik sølvinnattut.
Sølvinnattut
Inunnguaq Amossen angutit 17-it inorlugit ukiullit akornanni two-foot high kickimi (issittormiut pinnguaataanni) unammineranni sølvinnappoq.
Aviana Kristiansen arnat 18-it inorlugit ukiullit akornanni eqitami (eqqillit pinnguaataanni) sølvinnappoq.
Ulloriaq Kreutzmann aamma Aningaaq Løvstrøm angutit 18-it inorlugit ukiullit nerrivimmi arsaararnermi iligiiaarlutik unammineranni sølvinnapput.
Edvard Kruse snow slakemi (eqqillit pinnguaataanni) angutit ammasumik unammineranni sølvinnappoq.
Kalaallit tallimat eqitami ujaminnattut uani takuneqarsinnaapput.
Assi: Hanna Hviid
Bronzennattut
Petra Amossen arnani triple jumpimik (issittormiut pinnguaataat) ammasumik unammisitsinermi bronzennappoq.
Abia Zeeb angutit triple jumpimi (issittormiut pinnguaataanni) ammasumik unammisitsinermi bronzennappoq.
Kristine Sigurdsen arnani eqitami (eqqillit pinnguaataanni) ammasumik unammisitsinermi bronzennappoq.
Brian Tobiassen angutit 17-it inorlugit ukiullit kneel jumpimi (issittormiut pinnguaataanni) unammisitsinermi bronzennappoq.
Aviana Kristiansen arnat 18-it inorlugit ukiullit snow snake-mi (eqqillit pinnguaataanni) unammisitsinermi bronzennappoq.
Lars Muumu Jeremiassen angutit two-foot high kickimi ammasumik unammisinneqarneranni bronzennappoq.
Minik Møller Platou angutit snow snake-mi (eqqillit pinnguaataanni) ammasumik unammisitsinermi bronzennappoq.
Issittormiut pinnguaataannik unammisartut sungiusaasortik isiginnaartullu ilagalugit.
Assi: Hanna Hviid
