Nunakkut arpatsitsineq nutaaq Kalaallit Nunaata nunarsuarmi tusaamasaanerulernissaanut iluaqutaassaaq

Kalaallit Nunaanni misigisassarsiorluni takornariartitsineq siuarsarniarlugu, nunarsuarlu tamakkerlugu arpattartut akornanni nunarput ilisimaneqartinnerulersinniarlugu soqutigisaqaqatigiit nutaat iliuuseqarput. Assut Adventures Nuuk Five Peaks Mountain Challengemik siullermeerluni aggustip aallaqqaataani arpatsitsissaaq – taannalu Kalaallit Nunaanni siullerpaamik UTMB Index-imi arpannermik aaqqissuussaavoq.

Arpannermi Nuup eqqaani qaqqat tallimat – Quassussuaq, Ukkusissaq, Isikkivik Kuanninnguillu – aqqutigineqassapput 25 kilometerinik isorartutigisumik 2.000 meterillu missaannik portussuseqartut arpaffigineqassapput. Aammattaaq arpattartut pisuttuartartullu Nuuk Trail 10K-mi, 10 kilometerisut isorartutigisoq 700 meterinillu portussuseqartoq, peqataaffigisinnaavaat.

Arpannermi nunat tamalaat akornanni pitsaassuseq anguniarneqartoq

Assut Adventures-imik ingerlatsisut tassaapput arpattartut misilittagaqarluartut pingasut, taakkualu Nuuk Five Peaks ukiuni arlaqanngitsuni nunanit tamalaanit ornigarneqarsinnaalernissaa kissaatigaat.

- Arpatsitsineq pitsaalluinnartoq nunat tamalaat akornanneersunit unammissutigineqarsinnaasoq pilersissavarput. Arpannerup ingerlaarfiata nalunaaqutsersorneqarnerata pitsaanerulersinnissaa sulissutigigipput, Nuummiorpassuit maluginiarpaat. Aamma arpanneq ataatsimut isigalugu tamakkiisumik misigisaqarfigineqarsinnaanissaa, unnukkut nereqatigiinnermik ajugaasunillu akissarsisitsisoqarneranik aaqqissuussinikkut anguneqarnissaa anguniarparput, Erna Broberg Assut Adventures-imik piginnittut pingasut ilaat oqaluttuarpoq.

Aaqqissuisut naapertorlugit nunat tamalaat akornannit peqataaffigineqartumit arpatsitsinerni aaqqissuussinernilu misilittakkat aallaavigalugit arpannissaq aaqqissuunneqarpoq.

- Nunat tamalaat akornanni arpannerni peqataaffigisimasatsinnit misilittakkatta saniatigut aamma aaqqissuussarpassuarnit pissarsiavut atortarpavut, Patrick Bech oqaluttuarpoq. Taanna Kalaallit Nunaanni isorartuunut arpattartunut pikkorissunut ilaavoq aggustip aallaqqaataanilu arpannermik aqutsisuulluni.

Taassuma naqissuserpaa ukiumut pissarsiassat, kisiisa pinnagit anguniagaqarluni.

- Ilisimavarput ukiuni siullerni misilittakkanik, najukkami attaveqaatinik ineriartortitsineq, nunarsuarmilu allanit takuneqarsinnaalerneq pingaaruteqartoq. Qujanartumik tapersersorneqarluarpugut, taakkualu aaqqissuussap periarfissaqarluarnera takusinnaavaat, anguniagarpullu piviusunngortinniarlugu sapiissuseqarlutik suliniuteqarput: Visit Nuuk, Grønlandsbankens Erhversfond, Greenland Brewhouse aamma AirGreenland.

Nunaqavissut peqataanissamut kajumissaarneqarput

Nunarsuarmit tamaneersut peqataatinnissaat anguniagaagaluartoq, aaqqissuussisup naqissuserpaa nunaqavissut aamma arpannermi peqataasinnaasut. Arpattartut misilittagaqarluartut timigissartartullu peqataasinnaapput, aqqut Five Peaks 25 kilometerisut isortartussusilik imaluunniit aqqut naatsoq 10 kilometerisut isorartussusilik toqqarsinnaavaat.