Nunarsuarmi pitsaanerpaamik inissittoq: Kalaallip two foot high kickip rekordi ukiuni 32-ni qaangerneqarsimanngitsoq qaangeraa

Ullumikkut oqaluttuarisaanermi pingaaruteqartumik pisoqarpoq - eqqortumilli oqassagaanni pisut arlallit oqaluttuarisaanermi ilanngupput.

Petra Amossen Uummannameersoq arnat two foot high kickimi unammineranni rekordiliivoq, rekordileeqqaaginnanngilaq, namminerli angusani marloriarluni aamma qaangerpaa. Paasisat naapertorlugit two foot high kickimi Petra Amossen nunarsuarmi pitsaanerpaamik angusaqarpoq.

Rekordi siulleq 195,58 cm-iuvoq 1994-imilu anguneqarsimalluni.

Petra guldinnaannanngilaq, rekordiliivorli. Siullermik arsaaraq amermik sanaaq 198,12 cm qutsitsigisumiittoq isimmippaa. Taava 200,66 cm-isut kingornalu 203,2 cm-isut qutsitsigisumiittoq aamma isimmillugu.

- Nuannaarpunga. Nassuiaruminaappoq qanoq misiginera maannakkut. Unamminermi periarnialeraangama periartarnittut ingerlaannarnissara isumanniitissimavara. Nuannaarpunga, Petra Amossen oqarpoq.

Kingullermik rekordiliisimasoq isiginnaaqataasoq

Nicole Johnsen Alaskameersoq, ukiut 32-t matuma siorna rekordiliisoq unammiuaarnerni aamma malinnaavoq.

Taanna nuannaarpoq naammagisimaarlugulu rekordip maanna qaangerneqarsimanera, rekordimmi qaangerneqartariaqarput.

- Taama pisoqarnissaa utaqqisimavara, taanna Sermitsiamut oqarpoq.

Petra rekordileereerluni arsaaraq 205,74 cm-isut qutsitsigisumiittoq isimmeriaraluarpaa, iluatsinnaguli.