Nuummi Eqaarsaartartut Ilulissani eqaarsaartitsisut

Nina Vedel Nuummi Eqaarsaartartuneersoq ukioq manna sinerissami eqaarsaartitsisussat novembarip aallartinnerani Ilulissaniimmata peqataavoq. 

Eqaarsaarnerup illoqarfimmi innuttaasunut, atuartunut meeqqanullu ilisaritinnissaa siunertaavoq. Nuummi Eqaarsaartartut sungiusaasutut ikiortinik ilitsersuisunillu sinerissami illoqarfinnut soorlu Maniitsumut, Tasiilamut Sisimiunullu 2021-mili aallartitsisarpoq – Sisimiunilu tamanna allaat eqaarsaarnermut peqatigiiffimmik pilersitsinermik kinguneqarpoq. Sungiusaasutut ikiortit qulit, Nuummi Eqaarsaartartuni ilitsersuisut marluk aamma Ollerup-Abroadimit ilitsersuisut marluk, tamarmik eqaarsaarnermik nuannarisaqartut, ukioq manna sinerissamut angalapput. Sinerissamut angalasut pingasunngornermi novembarip tallimaani Ilulissanut tikipput, tassani timersortarfimmi takornariartinneqareerlutik illoqarfiup atuarfiini ilinniartitsineq aallartippaat. Sungiusaasutut ikiortit, namminneq 7.-10. klassimi atuartuusut, ilinniartitsipput, ilitsersuisullu inersimasut ikiuutaasarput.

- Ilulissani ilinniartitsisunit atuartunillu tikilluaqquneqarpugut, allaallumi atuartut ilaat periarfissaqaraangamik eqaarsaarnermi sungiusaqataaqqittarput, Nina oqaluttuarpoq.

Atuartitsineq naammassimmat sineriammi angalaqataasut Ilulissat Timersortarfianni, meeqqanik soqutiginnittunik ulikkaaqqasumi, sungiusaapput.

- Ilulissani meeqqat aamma timersoqataajumammata piffissap ilaani trampolinimut tulleriiaartut pingasoriaammik amerlipput, Nina oqarpoq.

Ilulissani eqaarsaarneq pillugu ilisimasat annertusarnissaat, ataqatigiinnerup nukittorsarneqarnissaa sungiusaasutullu ikiortit ilinniartitsisutut piginnaanngorsagaanissaat angalanermi siunertaavoq. Sineriammut angalaqataasut Nuummut utereerput, Ollerup-Abroadimili ilitsersuisut Johanne aamma Olav eqaarsaarnermi sammisat ingerlateqqinniarlugit illoqarfimmilu eqaarsaarnermut ingerlatseqataasinnaasunik piumassuseqartunik ujarlerniarlutik decembarip aallaqqaataata tungaanut Ilulissaniissapput.