Randi Zeeb Sigurdsen kultinnannini upperiuminaatsippaa

Whitehorsemi St. Francis atuarfiani arnat U17-it kneel jumpimi ujaminnattut pingasut suaarutigineqarput.

Randi Zeeb Sigurdsenip 16-inik ukiullip Ikerasammeersup ajugaasutut aqqa suaarutigineqarmat inuttaa tupalluni qiviarpoq.  Tamatuma kinguninngua timersortartoq inuusuttoq pissippoq unammiaqatimilu ilaat eqillugu.

Kneel jump Arctic Sprortimi timersuutaavoq timersortartut natermut seeqqorsinnarlutik, siumut sapinngisaq tamaat ungasinnerpaaq tuffiginiarsaralugu pissittaartarnerat, tukkaagamillu napparissusertik attanniartussaallugu. Kina ajugaanersoq paasiniarlugu pissinnerat qanoq takitiginersoq uuttortarneqartarpoq.

Randi Zeeb Sigurdsen unamminermini imminuinnaq malinnaaffigaaq.

- Eqqissisimaniarlungalu imminut piumaffigivunga, tassami pingaarnerpaaq tassaavoq imminut piumaffigisinnaanissaq. Naak pitsaanerpaaffissanniinngikkaluarlunga, nuannaaqaanga, oqarpoq.

Qitermigut ajornartorsiuteqarnera teknikkimut akornutaasoq

Randi Zeeb Sigurdsen pingajussaanik AWG-mi peqataavoq. Timersortartoq inuusuttoq taanna Arctic Sport iluani piginnaasaqarluarpoq, ingammik unamminerni assigiinngitsuni high kick-inik taaneqartartuni.

Two-foot high kickimi ataasinngormat unammeqataavoq, taanna 2024-mi pikkoriffigigaarlugu arnat U17-ini 190,5 centimeterimik qutsitsigisumut pissilluni rekortiliivoq.

Ataasinngormalli taama pisoqanngilaq. 177,8 centimeterimik qutsitsigisumut pissilluni normu 4-nngorpoq. Aallaqqaammut ingerlalluarpoq teknikkikkullu angusarissaarluni, unamminerulli ingerlanerani malugineqarsinnaavoq qitimigut anniartoq.

- Ingerlalluaraluarpunga, qitikkulli anniarnera pissutigalugu teknikkera ajorseriarpoq. Taama inissinninnut nikalluallallungalu pakatsivunga. Qiterlunnera akueriinnarpara. Siunissamilu iliuuseqarnerujumaarlunga, oqarpoq.

Randi Zeeb Sigurdsenip unammiuaarnissat suli allat sapaatip-akunnerani matumani ingerlatissavai, imminullu piumaffiginiarpoq. Taamaakkaluartoq unammiaqatimi takorluugai anguneqarnissai qilanaarai.