Marika Magnussen Sasja Joelsen Hendriksenilu, sisoraatinik oqilaniuttartut, inuusuttuaqqat 2026-mi Lillehammerimi nunarsuarmi pissartanngorniuunnissaannut anngupput.
Kalaallit Nunaat 2013-imili inuusuttuaqqat nunarsuarmi pissartanngorniunneranni peqataasimanngimmat tamanna sisoraatinik oqilaniunnermi oqaluttuarisaanermi pingaarutilimmik pisoqarneranut takussutissaavoq.
Marika Magnussen Sasja Joelsen Hendriksenilu, sisoraatinik oqilaniuttartut, inuusuttuaqqat 2026-mi Lillehammerimi nunarsuarmi pissartanngorniuunnissaannut anngupput.
Kalaallit Nunaat 2013-imili inuusuttuaqqat nunarsuarmi pissartanngorniunneranni peqataasimanngimmat tamanna sisoraatinik oqilaniunnermi oqaluttuarisaanermi pingaarutilimmik pisoqarneranut takussutissaavoq.
Marika Sasjalu maanna Norgemi Meråkerimi najugaqarput, taannalu Norgemi sisoraatinik oqilaniuttarfiit tusaamaneqarnerpaat ilagaat. Tassani ilinniarnertik sisoraatinik oqilaniunnermik aallussilluarnermut ataqatigiissippaat, marluullutillu suleqatigiilluarnerat iluatsilluarnerannut aalajangiisuusimavoq. Nunani tamalaani unammiuaarnerni angusarissaarnerat tunniusimanerup, ilungersornerup tapersersorneqarlunilu sungiusarsinnaanerup qanoq kinguneqarsinnaaneranik ersersitsivoq.
Inuusuttut taakkua marluk ukioq manna Gålå Norges Cupimi unammeqqaarnermi kingorna anngussimanerat maluginiagassaavoq. Tassani ajugaasumit annerpaamik 20 procentinik kinguaqqanermut piumasaqaat ataatingaatsiarlugu marluullutik angusarissaaramik inuusuttuaqqat nunarsuarmi pissartanngorniunnissaannut toqqaannartumik anngupput. Marika Magnussen ajugaasumiit 9,9 procentinik kingulliusoq Sasja Joelsen Hendriksen 15,9 procentinik kinguaqqavoq. Nunani tamalaani inuusuttuaqqat sisoraatinik oqilaniunneranni angusaq asseqanngilluinnartoq, piginnaaneqarnerannut angusaqarusussusaannullu ersiutaasoq.
Sisoraatinik oqilaniuttartut inuusuttunik piginnaanilinnik ukiuni kingullerni pingaartitsinera kinguneqarluartoq sisoraatinik oqilaniuttartut kattuffianni siulittaasup Marie Fleischerip erseqqissarpaa.
- Marikap Sasjallu angusarissaarnerat tulluusimaarutigeqaarput. Taakkua tunniusimalluni sulinerup, peqatigiiffimmit pitsaasunik avatangiiseqarnerup sungiusaanermilu atugassarititaasut pitsaasut qanoq kinguneqarsinnaanersut takutippaat. Inuusuttut allat ataatsit marlulluunniit januaarimi anngunniunnissani anngussinnaassasut neriuutigaarput, tassami anngunniarluni oqilaniuunnerit suli arlalit pisussaapput. Upperaagut, Marie Fleischer oqarpoq.
Nunanut allanut unammisartunut sungiusaasoq Martin Møller aamma taama isumaqarpoq, sisoraatinik oqilaniuttartut taakkua marluk qasusuillutik suliniuteqarnerat nersorpaa.
- Tamanna kalaallit sisoraatinik oqilaniuttarnerannut pingaaruteqarluinnarpoq. Marika Sasjalu Danmarkimi/Kalaallit Nunaanni Meråkerimullu noorernermik kingorna tamaviaarsimapput. Aalajaannermik, inersimalluarnermik ineriartorumassuseqarnermillu sapaatit akunneri tamaasa takutitsisimapput. Tulluusimaarutigeqaakka. Aamma januaarimi anngunniunnerit kingulliit inaarsarneqalerpata ataatsimik marlunnilluunniit amerlanerusunik peqataatitaqarsinnaassalluta neriuppugut, nunanut allanut unammisartunut sungiusaasoq oqaluttuarpoq.
Anngunneerat Marikamut Sasjamullu alloriarnerujussuuginnaanngilaq, aammali sisoraatinik oqilaniuttartunut tamanut alloriarnerujussuuvoq.
