Sisorartartut ineriartortinniarlugit ukiuni marlunni isumaqatigiittut

Kalaallit inuusuttut ujakkaartartut sisamat ineriartornissaat nunanilu tamalaani unammiuaarnernut peqataasalernissaannut periarfissaat pitsanngorsarneqarusuppoq. Elite Sport Greenland aamma Sisorartartut Kattuffiani Ujakkaartartut ataatsimiititaliaat ukiuni marlunni atuuttussamik isumaqatigiissuteqarput.

Isumaqatigiissut malillugu inuusuttut ujakkaartartut sisamat ukiukkut unammiuaarfiusuni marlunni ineriartortinneqartassapput. Unammisartutut sungiusaatigalugu kateritsitsisarnikkut aamma nunani allani sungiusarfiit suleqatigalugit nunani tamalaani unammiuaarnernut peqataatitsisarnikkut piginnaasanik ineriartortitsinissaq ingerlanneqassaaq.

Inuusuttut sisamat ineriartortinneqassasut

Elite Sport Greenlandip paasissutissiinera naapertorlugu isumaqatigiissummi inuusuttut ujakkaartartut sisamat massakkut Norgemi ilinniartut pineqartut tassaapput Arika Magnussen, Qunaaq Jensen aamma Elias Nordahl-Walleuhm Nuummeersut kiisalu Sasja Joelsen Henriksen Sisimiuneersoq.

Elite Sport Greenland naapertorlugu nunani tamalaani unammisarneq eqqarsaatigalugu isumaqatigiissut ujakkaartartut ineriartornissaannut aalajangiisuuvoq.

- Ujakkaarneq timersuutaavoq pingaarutilinnik piumasaqaatitalik, soorlu sungiusarneq ataavartoq, nunani tamalaani unamminerit aammalu sungiusarnermi avatangiisit qaffasinnerpaaffianiinnerit pingaaruteqarluinnartut. Ujakkaartartut Ataatsimiititaliaata ukiuni tulliuttuni pilersaarutitik saqqummiuppaat, tassani piukkunnaatillit qitiutinneqarput. Suleqatigiinneq sinaakkuseeqataaffigissallugu Elite Sport Greenlandimiit qilanaaraarput, taamaalilluni kalaallit ujakkaartartui pitsaanerpaamik ineriartortinneqarsinnaallutillu nunani tamalaani unammilleqatigiinnermi nukittorsarneqassapput, Angutinnguaq Hegelund-Tittussen, Elite Sport Greenlandimi siulittaasoq tusagassiutitigut nalunaarummi allappoq.

Nunani tamalaani unammersuaqataasarnissaq

Isumaqatigiissut kalaallit ujakkaartartut nunani tamalaani misilittagaqarnerulernissaannik periarfissiissaaq. Ujakkaartartut juniorinik taaneqartartut nunarsuarmi pissartanngorniunnerannut, kingornatigullu nunarsuarmi pissartanngorniunnernut kiisalu ukiaanerani OL-ertoqarneranut annguttalernissaat anguniagaavoq.

Sisorartartut Kattuffianni Ujakkaartartut ataatsimiititaliaanni siulittaasup, Flemming Enequistip oqarnera naapertorlugu, isumaqatigiissut timersornermik ineriartortitsinissamut pingaaruteqarpoq.

- Elite Sport Greenlandimit tapersersorneqaratta nuannaarutigaarput. Isumaqatigiissut inuusuttunut piukkunnaatilinnut nunani tamalaani sungiusarsinnaanissaannut unammisinnaanissaannullu periarfissanik pitsaanerulersitsivoq, taakkulu tamarmik ineriartortitsinermi pingaaruteqarluinnartuupput. Suleqatigiinneq siunissami kalaallit ujakkaartartut pitsaanerusumik periarfissaqalernissaannut pingaarutilerujussuuvoq, taanna oqarpoq.

Massakkut siunissamilu timersortartunut pikkorivissunut ineriartornissamut periarfissiissasoq, taamaalillunilu kalaallit ujakkaartartut unammisinnaassusaannik qaffassaataassasoq isumaqatigiissuteqartut allapput.