Taekwondortartut nunanut allanut unammisartut Tjekkiami unammersuarnerni ujaminnattut

Taekwondortartut nunanut allanut unammisartuisa 2026-mi Czech Openimi peqataaniarlutik Tjekkia tikeraarpaat, marlunnillu ujaminnattoqarsimasoq kattuffik nalunaarpoq.

Pissartanngorniunnermi nunanit assigiinngitsunit 13-ineersut peqataapput, unamminerillu sakkortuut ingerlanneqarlutik, Kalaallit Nunaanni Taekwondortartut Kattuffiat tusagassiutitigut nalunaarummi allappoq.

Angutinnguaq J. Nielsen unamminerit arlallit kingorna ajugaaniutivinnermilu naligiiffiusumi pointimik ataatsimik ajorsartoq sølvinnattoq kattuffik oqaluttuarpoq.

Tamatuma saniatigut Arnaaluk Frederiksen unamminerni arlalinni ajugaasarpoq. Ajugaanniunnissamut anngunniunnermi kingorna kuultinnattumut ajorsarpoq, bronzennallunili.

Inukkuluk G. Lennert unamminermi siullermi naligiiffiulluinnartumik unammivoq, kingusinnerusukkulli sølvinnassimasumut 3-2-mik ajorsarpoq.

Maasi E. Davidsen unammeqataavoq, tassanilu Europami pissartaq unammivaa. Maasi unammilluarpoq, pitsaanerusumulli ajorsarluni.

Unammersuarneq iluaqutaangaarsimasoq nunanut allanut unammisartunut sungiusaasoq Louis Nielsen oqarpoq:

- Nunanut allanut unammisartut pikkorinnerulersimanerat ersarippoq. Ilinniarluarsimapput, maannalu pitsanngorsarnissaq ukkatarilluarpaat. Nunanut allanut unammisartut angerlarunik EM-imut piareersassapput, nunanut allanut unammisartunut sungiusaasoq Louis Nielsen oqarpoq.