Ujakkaartartut inuusuttut sisamat nunarsuarmi pissartanngorniuteqataassasut
Sisorartartut Kattuffiannit ujakkaarnermik piginnaasalinnik siuariartortsitsinissamik ukkataqarnerup kingorna, inuusuttuaqqat piukkunnartut sisamat Norgemi Lillehammerimi marsimi VM-ertoqarnissaanutmarsimi peqataasussanngorput.
Assi: Sisorartartut Kattuffiat
Kalaallit Nunaat sinnerlugu nunarsuaq tamakkerlugu pissartanngorniuunnermut Sasja Hendriksen, Marika Magnussen, Qunaaq Jensen aamma Elias Nordahl Wallbohm peqataasussanngorput.
Sisorartartut Kattuffiata “kalaallit ujakkaartartut pingaarutilimmik alloriarnerattut, inuusuttullu piginnaasallit ineriartortinneqarnerisa kinguneranik” angusaqarfiusoq nalunaarutigaa.
Kalaallit inuusuttut nunanut allanut unammisartut ulluni arfineq-pingasuni Østrigimi Saalfeldenimi sungiusarput, tassanilu sprintimi takisuumullu ujakkaarnermi Østrigimi pissartanngorniunnerni peqataapput.
“Sprintimi Qunaaq Jensen, Malik Olsen, Sasja Hendriksen Joelsen aamma Marika Magnussen semifinalinut anngupput – nunani tamalaani qaffasissumik unammisartulimmi angusarissaarneq nunanilu tamalaani unamminermi misilittagaqarfiulersussatut aqqut pingaarutilik”, kattuffimmit nalunaarutigineqarpoq.
Piumassuseqarluarneq imminullu piumaffigineq
Nunanut allanut unammisartunut sungiusaasoq Martin Møller ima oqarpoq:
"Arpattartut piumassuseqarluarput, imminut piumaffigisinnaallutik, teknikkikkullu eqqarsartaatsikkullu ineriartorlutik. Østrigimi angusat piginnaasalinnik ineriartortitsineq angusaqarluarnermik kinguneqartoq takutippaat."
Sisorartartut Kattuffiat Østrigimi misilittagarilikkat maanna piginnaanillit ineriartortinneqarneranni qitiusutut inissittut, inuusuttullu nunarsuarmi pissartanngorniunnissaat Kalaallit Nunaanni ujakkaartartut siunissaannut alloriarnerusoq pingaarutilik ilisimatitsivoq.
