VM 2026 – Nunatsinni arsaallammassuit illersukkatik ajugaassangatinngikkaat

Nunarsuarmi angutit isikkamik arsaallutik pissartanngorniunnerat VM 2026 ippassaq sisamanngornermi juunip aqqarngani Mexico City-mi (Mexicop illoqarfittut pingaarnersaani, aaqq.) aallartippoq.

Angutit nunatsinneersut isikkamik arsaatillammassuit pingasut Sermitsiap tusarniarfigisai, nunanik assigiinngitsunik illersugaqarput.

Aperineqartullu tamarmik aperineqaramik qulanngillat. Tassa namminneq illersungartik nunarsuarmi pissartanngornissaat qularigamikku.

Søren Kreutzmann

Kikkut illersorpigit?

- Uanga mikininniilli illersortagaraakka tapersersorlugillu Tuluit. Illersortakkakka Liverpoolimi klubeqartarnikuugamik, soorlu Steven Gerrardikkut, allallu tuluit pikkorissut. Piffissaq siulleq umamminissat apeqqutaallutik ingerlalluaqqaarnissaat ilimagaara, kisianni unammersuarnerup naajartornerani ilimagisinnaanngilakka ingerlalluassasut.

Piviusorsiussagutta kikkut pissartanngorsinnaasut ilimagivigit?

- Siullertut Frankrig, tulliatut Portugal ilimagisinnaavakka.

Niels-Erik Eriksen

Kikkut illersorpigit?

- Argentinakkut illersussavakka, mikillungali malinnaaffiginikuugakku Lionel Messi, ilimanarami naggataarluarsinnaassasoq.

Kingullermik nunarsuarmi pissartanngornikuupput, maanna qanoq inissinnissaat eqqoriarpiuk?

- Uanga ilimagisinnaavara pissartanngoqqissinnaasut, unammersuaassasut ilimagaara.

Piviusorsiussagutta kikkut ilimagivigit VM-imi ajugaanissaminnut periarfissaqarnersut?

- Spaniakkut, inuusuttunik aatsaat VM-eqataasunik arsartuginnermut taakkua, malinnaaffigilluarnikuullugit uanga isinni taamannak isigaakka.

Patrick O. Frederiksen

Kikkut illersorpigit?

- Portugalikkut illersussamaarpakka arsartugissaarmata, arsartui pissanganarnermut.

Cristiano Ronaldo Portugalimiuummat illersussamaarpigit?

- Aap, Cristiano Ronaldo immikkut nuannariuaannarnikuuara. Arsaaffimmi piginnaasai aammalu inuttut unammillernartut qaangerniarlugit pilliuteqarluni killiffini angunikuummagu isumassarsiorfigisarakku. Ronaldo takorusunnarpoq arlaanni nunarsuarmi pissartanngorniunnermi peqataanini naggaserluassagaa.

Lionel Messi nunarsuarmi pissartanngoqataanikuuvoq. Cristiano Ronaldo taamatuttaaq pissartanngoqataajumaartoq takorloorsinnaaviuk?

- Tassa taamatupajaaq, nunarsuarmi pitsaanerpaat ilaanniikkami. Angusai massakkumut eqqarsaatigigaanni angusarissaarnikuuvoq, kisianni taassuma VM suli qulakkeernikuunnginnamiuk, takorusunnarpoq nunarsuarmi pissartanngortoq.

Piviusorsiussagutta kikkut pissartanngorsinnaasut ilimagivigit?

- Franskit. Franskit taakkua pissanganarsinnaapput arsartorissaangaatsiaramik, målmandiminngaanniit arsartut tamaavimmik taakkua assut pitsaarpasinnermut. Taassuma saniatigut Brasiliamiut ilimagisinnaavakka.

Nunatsinnit isikkamik arsaattartut suli VM-imut peqataasinnaanngillat. Taamaattoq VM-ertoqartarnera inuiannik ataatsimoortitsisarmat, aamma nunatsinni pingaaruteqartutut nalilerneqarpoq.

- Politikkikkut isummat, isikkut aamma upperisaqarneq assigiinngikkaluartut, VM-ertoqartarnera inuiattut ataatsimoornermik pilersitsisarami pingaaruteqarpoq, Patrick O. Frederiksen, angutit isikkamik arsaallutik nunanut allanut unammisartut siukkaat naggasiivoq.