Angerlarsimaffimmi paaqqinnittarfiusumi ukioq manna siusinnerusukkut saassusisoqarnerata kingorna, nukappiaraq 17-inik ukiulik tarnimikkut nappaatillit katsorsaavianniittussanngortinneqarneranik kinguneqarpoq.
Eqqartuussisup Stine Dana Lyngep eqqartuussut sisamanngornermi saqqummiuppaa.
Angerlarsimaffimmi paaqqinnittarfiusumi ukioq manna siusinnerusukkut saassusisoqarnerata kingorna, nukappiaraq 17-inik ukiulik tarnimikkut nappaatillit katsorsaavianniittussanngortinneqarneranik kinguneqarpoq.
Eqqartuussisup Stine Dana Lyngep eqqartuussut sisamanngornermi saqqummiuppaa.
Nukappiaraq ukioq manna marsip aallaqqaataani 16-inik ukioqarluni, Nuummi angerlarsimaffimmi najugaqatiminut inuusuttumut savimmik saassussivoq. Saassussineq pissuteqanngilluinnarunarpoq, aammali pinerluttoq imigassartorsimagunarneranik kinguneqarluni.
Saassunneqartoq sisamariarluni kapineqarpoq, ilaatigut siutaa eqqorneqarluni. Pisumili inuunera uloriarnartorsiunngilaq.
Pisimasoq pingasunngornermi eqqartuussivimmi sammineqarpoq, tassanilu pinerlineqartoq allallu ilisimannittut unnerluussisussaatitaasup Andrias Kjølbrop toqutseriaraluartoqarneranik unnerluussutaanik tapersiissut oqaluttuartinneqarlutik. Savik pinerlisup pisiarisimasaa saassussissutaasoq pillugu paasissutissat unnerluussisussaatitaasup aamma saqqummiuppaa, tassaavoq savik naasunik iganermi akoorutinik agguinermi atortoq.
Nukappiaqqap 17-inik ukiullip pisuunnginnerarluni pisoq eqqaamasimannginnerarpaa. Taanna Aarhusimi tarnikkut nappaatilinnut napparsimmavimminngaanniit internetsi atorlugu isiginnaarutikkut peqataavoq, aamma nukappiaqqap illersuisua ataataalu ilaapput.
Unnerluutigineqartoq niaqulaartutut nalilerneqartoq
Illersuisup Ulloriaq Grønvoldip sullitani pineqaatissinneqassappat nakuusersimasutut eqqartuunneqassasoq tunngavilersuutigaa. Toqutsinissaq siunertaasimappat savik allatut tigummineqarsimassagaluartoq illersuisup oqaatigaa, aamma ajoqusernerit inuunermik ulorianartorsiortitsisunnginnerat tunngavilersuutigalugu.
Eqqartuussisulli unnerluussisussaatitaasoq isumaqatigaa, tassa toqutseriaraluarnerarlugu. Pineqaatissiissullu qanoq ittuussanersoq apeqqutaalerpoq.
Nakorsap inuusuttuaraq pasineqartoq niaqulaartutut nalilerpaa, pinerlinerup nalaani maannalu. Taamaammat pineqaatisseeriaaseq nalinginnaasoq atorsinnaanngilaq.
Angut inuusuttoq piffissami killilimmi pineqaatissinneqassasoq Grønvoldip kissaatigaa. 2026-mi 18-ileereeruni Kalaallit Nunaannut uteqqissinnaanissaa angorusuppaa. Taamaattoqarunnanngitsorlo sisamanngornermi aalajangernermi paasinarsivoq.
Danmarkimiiginnassasoq
Eqqartuussiviup unnerluussisup piumasaa akueraalugu 17-inik ukiulik piffissaligaanngitsumik tarnimikkut napparsimasutut katsorsarneqarluni Danmarkimiittussanngortippaa. Pineqaatissinneqartup qanoq innera pissutigalugu piffissaliisoqarsinnaananilu, Kalaallit Nunaanni iluamik ikiorneqarsinnaanngitsoq tunngavilersuutigineqarpoq.
Taamaattumik 17-inik ukiulik Aarhusimiiginnarnissaa ilimanarpoq, tassanimi tarnikkut nappaatillit immikkoortortaqarfiat Kalaallit Nunaanneersunik immikkut ittumik immikkoortortaqarfeqarpoq.
Pineqaatissinneqartup eqqartuussiviup aalajangiinera Nunatta Eqqartuussisuuneqarfianut suliareqqitassanngortimmagu suliaq suli naammassinngilaq.
