Aalisarneq piniarnerlu pillugit ukiut marluk qaangiuppata saqqummersitsisoqaqqissasoq

Ilulissani aalisarneq piniarnerlu pillugit ulluni pingasuni saqqummersitsineq, PolarExpo, sisamanngornermi matuvoq. Saqqummersitsineq Aalborg Kongres & Kultur Centerip Avannaata Kommuniatalu suleqatigiillutik, Ilulissat timersortarfianni aaqqissuuppaat.

Avannaata Kommuniani borgmesterip, Lars Erik Gabrielsenip (S), aaqqissuussaq pineqartunut pitsaasutut nalilerpaa.  

- Inuussutissarsiortut niuertullu tuniniaasut, atortunuuppat pappiaqqatigulluunniit kiffartuussineruppat, naapinnerat tamanut pitsaasuummat allaanerusumik nalileruminaappoq. Peqqinnartuuvoq aamma uteqqiattumik ingerlanera taanna pitsaasuuvoq, borgmesteri Sermitsiamut oqarpoq.

AAMMA ATUARUK:

Ilulissani aalisarneq piniarnerlu pillugit saqqummersitsisoqalersoq

Aaqqissuussat taamaattut 2022-imi 2024-imilu Ilulissani aamma pipput. Ukioq mannalu aaqqissuussaq ukiunut siullernut sanilliullugu takuniaasoqarnerusoq, Aalborg Kongres & Kultur Centerip pisortaa, Nicolaj Holm, Sermitsiamut oqarpoq.

- Saqqummersitsinerni pingasuni ukioq manna saqqummersitsineq takuniarneqarnerpaavoq. Taamaattumik eqqortup tungaanut ingerlavugut, pisortaq oqarpoq.

Taassumali ulluni pingasuni takuniaasut qanoq amerlatiginerat kisitsisitalerlugu oqaasertalerusunngilaa. 

Aaqqissueqataasoq, Avannaata Kommunia, Facebookkimi quppernermi tallimanngornermi ima allappoq.

- Sapaatip akunnerani matumani Ilulissani timersortarfimmi saqqummersitsisut 45-t pulaartullu 2265-it sinnerlugit peqataapput.

Pisortap oqarnera naapertorlugu saqqummersitsinermi niueqatigiilluartoqarpoq.

- Saqqummersitsisut pitsaasunik isumaqatigiissusiorsimasut oqaloqatigaakka. Nuannisartoqaqaaq. Kikkut tamarmik qiimallutillu nuannaarput, Nicolaj Holm oqarpoq.

Naalakkersuisoq: Oqallinnerit pissarsiaqarfigaakka

Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg (D), ulluni pingasuni saqqummersitsinerni aamma najuuppoq. Taassuma naapitani aammalu saqqummersitsinerit avataasigut oqallinnerit sulinermini sakkussaminik pissarsiffigisimallugit, Sermitsiamut unnersiorpoq.

- Naapitakka oqaloqatikkalu eqqarsaatigalugit pissarsiaqarluarpunga. Aalisartut tatakkualu kattuffiisa akunneranni oqallinnerit tusarnaarlugit oqalliseqataaffigalugillu uannut pissarsiaqarnarpoq. Suleriaqqinnissannut sakkussatut atornissaat naatsorsuutigineqassaaq, Peter Borg oqarpoq.

Aaqqissuisut: Saqqummersitsinermik aaqqissuusseqqissaagut

Aalisarneq piniarnerlu pillugit saqqummersitsineq sisamanngornermi naammassineqarpoq. Tamannali pisoq kingulliussanngilaq. Aaqqissuisummi taama ittumik 2028-imi sapaatit akunneranni 41-mi aaqqissuusseqqinnissartik isumaqatigiissutigaat.

- Ukiut marluk qaangiuppata uteqqinnissarput isumaqatigiissutaavoq. Ukiut sisamat, arfinillit arfineq-pingasullu qaangiuppata aamma uteqqinnissarput eqqarsaatigaara, Nicolaj Holm oqarpoq.

Aaqqissueqqinnissamut isumaqatigiissut borgmesterip aamma iluarisimaarpaa. Taassuma oqarnera naapertorlugu aaqqissuussaq inuussutissarsiortut ikinngutigiillu aamma naapittarfigaat.

- Aalisarneq inuussutissarsiornermi initoorujussuuvoq. Kommunip ingerlanneqarnerani innuttaasut atugaannut tunngavoq, pisiniarfiillu ingerlanerinut. Aningaasarsiornermut kivitsisuunera annertuumik pingaaruteqarnera pissutigalugu aaqqissuusseqqinnissaq isumaqatigiissutigivarput, tamanna nuannaarutigaara, Lars Erik Gabrielsen oqarpoq.

Naalakkersuisuttaaq aaqqissuisut aaqqissuusseqqinnissamik isumaqatigiissuteqarnerat iluarisimaarpaa. 

- Tusarluarnaqaaq. Aalisartunut ataasiakkaanut saqqummersitsinerit ima ittut periarfissarpassuarnik nassataqartarput. Atortunik nutaanik takusaqarneq, paasissutissanik nutaanik oqallinnerillu aqqutigalugit ingerlariaqqinnissamik aalisarnerup silarsuaani, politikkikkut, kattuffiit aalisartullu ataasiakkaat eqqarsaatigalugit sumut ingerlasoqarnissaanik oqaloqatigiinnernik oqallinnernillu pilersitsivoq.

- Taamaammat pingaaruteqarpoq aalisartut ataasiakkaat taakku immersortuarneqartarnissaat saqqummersitsinerni ima ittuni pisarmat. Taamaammat taamatut ukiut marluk qaangiuppara aaqqissuusseqqittoqarnissaa tusarluarnartupilussuuvoq, Peter Borg oqarpoq.