Ilulissani aalisarneq piniarnerlu pillugit saqqummersitsisoqalersoq

Aalisarnermi piniarnermilu atortut nutaanerpaat maannakkut suuppat? Apeqqut tamanna ilaatigut Ilulissaniikkuit akissutissarsisinnaalerpat. Illoqarfimmimi aalisartoqarfiusumi aalisarneq piniarnerlu pillugit oktobarip arfernannit arfineq-pingajuat ilanngullugu saqqummersitsisoqassaaq. Aaqqissueqataasut, Aalborg Kongres & Kultur Center, tusagassiorfinnut allapput.

Aalborg Kongres & Kultur Center Avannaata Kommunia suleqatigalugu aaqqissuisuupput. 

Saqqummersitsinermi tassani saqqummersitsisussat 50-init amerlanerusut, taakkualu Kalaallit Nunaanneersuusut, Islandimeersuusut, Savalimmiuneersuusut Danmakimeersuusullu, aaqqissueqataasut allapput.

Avannaata Kommuniani borgmesteri, Lars Erik Gabrielsen (S), Aalisarnermut Piniarnermut Nunalerinermut Imminullu Pilersornermut Naalakkersuisoq, Peter Borg (D) aamma Aalborg Kongres & Kultur Centerimi pisortaq, Nicolaj Holm ammaallutik oqalugiartuussapput. Takuniaarusuttunut matut ulluni taakkunani qulinut ammartassapput.

Piniutaarsiutit sillimaniarnerlu

Ulluni taakkunani saqqummersitsinerinnaq ingerlanneqassanngilaq. Oqallittoqarlunilu aamma saqqummiisoqartassasoq, aaqqissueqataasut allapput.

Aalisartut piniartullu ulluinnaanut ilaasut, piniutaarsiutit, ullormi siullermi aamma oqaluuserineqassapput. Pinngortitaleriffik, KNAPK, QAK, IAPP Naalakkersuisullu oqallinnermi tassani peqataatitaqassapput. Taassuma kingorna aamma Ocean North Kalaallit Nunaanninngaanniit Avannaata Kommunianiillu sammisaq pillugu saqqummiisoqassaaq. Oqallinnerni saqqummiinernilu taakkunani piniutaarsiutit ajornartorsiutaanerisa qanoq pitsanngorsarneqarsinnaanerat ilaatigut oqallisaassaaq.

Ullut aappaanni kingullermilu imaani angalanermi isumannaallisaaneq pingaarnertut qulequtaassaaq. Issittumi Sakkutooqarfik, Imarsiornermik Ilinniarfik, aalisartoq piniartorlu Axel Siegstad, O. S. Electronic, Furuno aammma Illit Forsikringit Agentur ulluni taakkuani saqqummiussissapput.

- QAK aamma KNAPK saqqummersitsineq naggaserlugu oqaloqatigiinnissamut qaaqqusipput. Aalisartut piniartullu kattuffiisa marluk qaleralinniarneq aallaavigalugu PNNP-mik aalisarnermi, 75 %-imik atuinissamut piumasaqaataasoq kiisalu TAC pillugit oqaloqatigiissapput. Soqutiginnittut tamarmik ataatsimiinnermut peqataasinnaapput, aaqqissueqataasut allapput.

Ullormut inersimasumut billetsi 100 koruuneqassasoq, ullunut pingasunut 250 koruuneqassasoq meeqqamullu arfineq pingasut 13-nillu akornanni ukiulimmut 50 koruuneqassasoq, aaqqissueqataasut nittartagaanni takuneqarsinnaavoq. Marlunngornermi qulinit unnukkut arfineq-marlup tungaanut, pingasunngornermi qulinit ualikkut tallimap tungaanut sisamanngornermilu qulinit pingasup tungaanut saqqummersitsisut takuniarneqarsinnaassapput.