Aalisarnermut ataatsimiititaliami siulittaasoq: 75 procentimik atuisussaatitaaneq TAC-lu annertuallaarput

Qeqertarsuup Tunuani, Uummannami Upernavimmilu, aamma aqutsiveqarfik 47-mik taaneqartartumi, qaleralittassanik niuerutigineqarsinnaasunik nammineq pigisanik pigisaqartut, pisassaatimik 75 procentii, aalisarnermut inatsit atuuttoq naapertorlugu aalisartussaatitaavaat. Tamanna pinngippat aappaagumit pisassanik nalilinnik Naalakkersuisoqarfimmit arsaarinniffigineqarsinnaanerat aarlerinartumiippoq. 

Taama inatsimmi allaqqasoqarnera sakkortuallaartoq, allanngortittariaqartorlu Inatsisartut aalisarnermut ataatsimiititaliaani siulittaasup, Atassummeersup oqariartuutigaa.

- Uagut partiitsinnit pingaartipparput 75 procentip peerneqarnissaa annikillineqarnissaaluunniit. PNNP-mik pisassaatillit ilisimasakka najoqqutaralugit ernumanartumik inissisimammata. Taamaammat apparnissaa peerneqarnissaaluunniit politikkikkut oqallisissaavoq, Bentiaraq Ottosen Sermitsiamut oqarpoq.

Kattuffiit qaqutigoortumik ataatsimoortut

AAMMA ATUARUK:

Aalisartut kattuffii: Atuinissamut piusaqaat atuukkunnaarallarlunilu qaleralittassiissutit oqilillik

Kalaallit Nunaanni aalisartut kattuffii tamarmik, tassa KNAPK, SQAPK aamma QAK, qaqutigoortumik ataatsimoorlutik, aalisarnermut naalakkersuisumut, Peter Borg-imut (D), ernumaatiminnik kissaatiminnillu sapaatit akunnerisa siuliani apuussipput. 

- 75 %-imik atuinissamik pisussaaffik ukiuni tallimani, maanna 2031 ilanngullugu, unitsinneqarallassaaq. Piffissami tassani atuinissamik pisussaaffimmik naammassinninnginneq kisimi pissutigalugu aalisartut pisassaminnut piginneqataassutiminnik annaasaqartinneqassanngillat, kattuffiit siulittaasui allapput.

Tamannalu Naalakkersuisup aamma qanillattorlugu Sermitsiamut sapaatit akunnerisa siuliani oqaatigaa.

- Aalisartut kattuffiisalu sumut ingerlarusunnerat ersarinnerusumik maanna ilisimasaqarfigilerpara. Naalakkersuisunit 75 procentimik qalluisussaatitaanermi apeqqummi aaqqiisariaqarnerput killiffigereerparput. Maannakkullu aaqqiissutissaq sorlerpiaassanersoq naniniagassarilerparput, Peter Borg oqarpoq.

Sumiiffinni taakkunani pisassaatilinni 694-ini 50-it, piumasaqaammik ukioq manna maannamut naammassinneqqasut, Sermitsiap paasivaa. Taamaalilluni aalisartorpassuit namminneq pigisaminnik pisassaqalersimasut pisassaatiminnik aappaagumit ilanngartuunneqarsinnaanerat ilimanaateqarluarsinnaavoq.

Siulittaasoq: Kattuffiitt kissaataat pingaarnerpaavoq

Aalisarnermut ataatsimiititaliami siulittaasup aalisartut kattuffiisa kissaataat pingaarteqalugu nassuerutigaa.

- Soorunami aalisartut kissaataat taanna pingaarnerpaavoq, Bentiaraq Ottosen oqarpoq.

Ataatsimiititaliami siulittaasup tulliata, Jens Napãtûp (N), kattuffiit ukiuni aalajangersimasuni unititsigallarnissamik kissaataat taperserlugu, Naleqqap Facebookkimi qupperneratigut, Naalakkersuisunut ammasumik sapaatiummat allagaqarnermini allappoq.

- Aalisartut pisassiissutinit pisassaminnit arsaagaasinnaassanngillat, piumasaqaammik naammassinninnissamut aporfiusut, tassunga ilanngullugit aningaasaqarnikkut atugaat, naammattumik eqqarsaatigineqaqqaartinnagit.

- Taamaattumik Naleqqamiit piumasaraarput pisassiissutinik 75 procentimik atuinissamik piumasaqaat unitsikkallarneqassasoq, atasinnaasumik naapertuilluartumillu aaqqiissutissarsisoqarnissaata tungaanut, Jens NapätôK’ allappoq.

Inatsisartunut ilaasortat septembarip 30-ni ataatsimiinnerminni aalisarneq pillugu Inatsisartut inatsisaata allanngortinnissaa pillugu Inatsisartut inatsisissaattut siunnersuut oqaluuseraat.

Oqallinnermi tassani amerlanerussuteqartut qaleralinniat 75 procenti angullugu tulaassuissasut kissaatigigaat oqariartuutaavoq. Tassa kattuffiit kissaataata akerlia, Naalakkersuisup maanna qanillattungaata akerlia aalisarnermullu ataatsimiititaliap siulittaasuata taassumalu tulliata isumaasa akerlia. 

Ataatsimiititalialli siulittaasuata naalakkersuisoqatini allatut isumaqalersinniarlugit qanoq sulissanerluni nalornisiginagu oqaatigaa.

- Piumasaqarsinnaassuseq annertooq pigisariaqarparput. Naalakkersuisoqatigiit politikkikkut oqallisissaat taanna pingaaruteqarluinnartutut isiginiarparput. 

- PNNP-mik pisassaatillit ernumasut paasisinnaalluarpakka. Ernumanerit paasinnilluarsinnaaninnut toqqammaviliisuupput, Bentiaraq Ottosen oqarpoq.

Pisassat pillugit isummat assigiinngitsut

Aqutsiveqarfik 47-mi sinerissap qanittuani qaleralinniarneq pisassiissutaasut eqqarsaatigalugit naapertuuppallaanngilaq. Sumiiffimmimi tassani qalerallit pisassiissutaasut ukioq manna 33.997 tonsiupput. Pisassiissutinit taakkunannga oktobarip aallartilaarnerani pisarineqartut 12.500 tonsit missaannaaniipput. Taamalilluni pisassat 37 procentiisa missaannaat maannamut aalisarneqarput.  

Pisassiissutit ukiuni tallimani ukiumut 15 procentimik ikilisittarnissaat aalisartut kattuffiisa aamma kissaatigaat. Tassa imaappoq, pisassat ukioq manna 34.000 tonsiusut 3031-imi 15.000 tonsinnanngornissaat kissaatigaat. Tamanna Atassummeersup nersulaarpaa.

- Paasissutissanik piviusunik aallaaveqarlutik taama siunnersuuteqarsimanerat nersugassaavoq, aamma tusarnaartariaqarpagut. 

- TAC qaffasippallaarujussuarpoq. Appaavigineqarnissaanut inissisimanissaq Atassummiit oqariartuutigaarput. Piujuaannartitsisumik aalisartitsinissaq pingaarnerpaagami, Bentiaraq Ottosen oqarpoq.

Jens Napãtûp tamanna allaanerusumik isumaqarfigaa. Pisassat oqilisinneqarnissaannut toqqaannartumik akuersaanngilaq.

- Pisassiissutit ikilisinneqassappata Naalakkersuisut sooq taamaaliortoqassanersoq ersarissumik nassuiassavaat. Aamma sinerissap qanittuani aalisartunut, taakkua ilaqutaannut kiisalu illoqarfinnut nunaqarfinnullu aalisarnermik inuuniuteqartunut qanoq kinguneqassanersoq nassuiassavaat, taanna allappoq.