Suila-tapit pillugit kanngunartuliaq sualutsikkaluttuinnarpoq: Akiitsut 39,8 millionit koruuninut qaffapput

Innuttaasut 2025-mi Suila-tapisivallaarutaat katillugit 39,8 mio. koruuninut qaffapput. 

Tamanna aningaasaqarnermut naalakkersuisup, Aqqaluaq B. Egedep, Sermitsiamut allakkatigut akissuteqaataani atuarneqarsinnaavoq.

Akiitsut siusinnerusukkut nalunaarutigineqartut naapertorlugit 31,9 mio. koruuniugaluarput, naalakkersuisup akissuteqaataa kingulleq malillugu akiitsut taamaalilluni 7,9 mio. koruuninik qaffapput.

Innuttaasulli akiitsussaralui, Naalakkersuisut isumakkiigaat, sooq taama qaffatsigisimanersut Aqqaluaq B. Egedep nassuiaateqarfiginngilaa. Aamma aningaasat 40 mio. koruunit tungaanoortut sumit aaneqassanersut akissuteqarfiginngilaa.

Siusinnerusukkut nalunaarutigineqartutut Naalakkersuisut 2025-mut tunngatillugu akiitsut tamakkerlugit isumakkeerneqarnissaat aalajangiuppaat. Aalajangiineq arfininngornermi oktobarip qulingani nalunaarutigineqarpoq, ulloq taanna Suila-tapit pillugu suliap ingerlanneqarnera pillugu akerliussutsimik takutitsisoqartussaagaluarpoq.

Innuttaasulli akiitsui isumakkeerinnissutigineqartut naalakkersuisup akerliussutsimik takutitsinissamut nalunaaquttap akunnera ataasiinnanngortoq nalunaarutigereeraalu, akerliussutsimik takutitsinissaq taamaatiinnarneqarpoq.

Suila-tapit pillugit arlaleriarluni kukkusoqareersorlu akiligassiissutigineqaraluartut isumakkeerinnissutigineqarput.

Avataaneersut kukkunerit nassaarinissaannut ikiuutissasut

Naalakkersuisut maanna Suila-tapit pillugit kukkunerit nassaarinissaat anguniarlugu, aamma assingusumik kukkusoqaqqinnginnissaa anguniarlugu nalilersuisussanngorput.

AAMMA ATUARUK

Suila-tapinik pissarsivallaarsimasut utertitsinissaannik piumasaqaat Naalakkersuisut unitsiinnarpaat

- Naliliineq tamanna ilaatigut Grønlands Revisionimit, kukkunernik nassaarnissamik maalaarutinillu Akileraartarnermut Aqutsisoqarfimmut nassiunneqarsimasunik ikiuuttussatut suliakkerneqartunik, kukkunersiuisunit ikiorserneqarluta ilaatigut suliarissavarput, Aqqaluaq B. Egede allappoq. 

Naliliinermi Suila-tapinut aaqqissuussinermi teknikkikkut aaqqissuussaanermullu tunngasut ilanngullugit qulaajarneqassapput.

Taamaattorli naliliineq qaqugu naammassissanersoq suli nalunarpoq. Aqqaluaq B. Egedep oqarnera naapertorlugu, Suila-tapit pillugit naatsorsuinermi qarasaasiatigut ineriartortitsisut apeqqutaassapput.

Suila-tapit eqqornerusut ukioq manna tunniunneqarnissaat anguniarlugu Naalakkersuisut sulissuteqarput. Aqqaluaq B. Egedelli erseqqissaatigaa siunissami suli Suila-tapisinaartoqartarlunilu tapisinikippallaartoqartarsinnaasoq. Matumani innuttaasut sulisitsisullu isertitassatut naatsorsuutit paasissutissiissutaat aallaavigineqartarnerat tunngavilersuutigalugu.

Suila-tapit atorunnaarsikkusunngikkai

Suila-tapit imaalitsiaannaq atorunnaarsinneqarsinnaanngitsut Aqqaluaq B. Egedep aamma erseqqissaatigaa.

Sulinermut ilanngaat tunniunneqartartoq aningaasarsianit akileraarusiisarneq pillugu inatsimmi aalajangersarneqarnikuummat Inatsisartut akuersitinnagit atorunnaarsinneqarsinnaanngilaq.

- Suila-tapit qaammatikkaartumik akilerneqartartutut ilanngaataavoq aningaasarsianit akileraarusiisarneq pillugu inatsimmi aalajangersarneqartoq. Taamaammat Naalakkersuisut Inatsisartut akuliutseqqaarnagit imaasiallaannarlutik aaqqissuussamik atorunnaarsitsinissaq aalajangersinnaanngilaat. Ilanngaat taanna atorunnaarsikkaanni tamanna innuttaasunut peqatigisaanik akileraarutinik qaffaanermik peqqusinermut assingussaaq, taamaaliornerlu ingammik isertitakitsunut akunnattumillu isertitalinnut suliffilinnut kingunerluuteqassaaq.

- Taamaammat eqqarsarluarnissarput nukingerpallaartumillu aalajanginnginnissarput pingaaruteqarpoq. Kukkuneq nutaamik kukkunikkut aaqqissanngilarput, Aqqaluaq B. Egede Sermitsiamut akissummini allappoq.