Angalasartut ukiaru arnanik spiralilersuinermik suliami ikiuutissasut

Angalasartut ukiap ingerlanerani Danmarkimit Kalaallit Nunaannukarlutik kalaallinik arnanik spiralilersuinermi suliami taarsiivigineqarnissamik qinnuteqarnermi ikiuutissapput.

Taama Patienterstatningi DR-imut nalunaarpoq.

Decembarimi 2025-mi arnat akuersitinneqaqqaarnatik 1960-p 1991-llu akornanni spiralilerneqarsimasut 300.000 kr-nik taartisisinnaanerat danskit naalakkersuisuisa oqaatigaat.

Nunamut namminermut peqqissutsimullu ministereqarfiup siusinnerusukkut arnat 4500 missaat taarsiivigineqarnissamut pisinnaatitaaffeqarsinnaanerat oqaatigaat.

Septembarip naanerani angalaneq siulleq aallartinneqassaaq. Angalasartut 2027-mi suli marloriarlutik angalanissartik pilersaarutigaat.

DR-p paasissutissiinera malillugu angalasartut illoqarfinni nunaqarfinnilu aalajangersimasuni saqqummiissapput.

Angalasartut inatsisilerituumik ataatsimik sygeplejersiutigisumik, kalaallimik psykologimik, nutserisumik ataatsimik eqqartuussisumillu soraarnermik inuttaqarput.

Aamma atuaruk

Spiralimik suliaq pillugu nassuiaat suli kinguaattoorpoq - immikkut ilisimasallit suleqatigiiviat isumaqatigiinnginneq pissutigalugu avissimasoq

Angalasartut peqatigisaanik arnanik suliamik tarnikkut innarlerneqaqqissinnaasunik ikorfartuissapput.

Taamattaaq kalaallit arnat Danmarkimi najugaqartut ikiorserneqarnissamik neqeroorfigineqartut, DR allappoq.

Angalasartut inatsisissatut siunnersuut Folketingimi akuerineqarpat pilersinneqassapput.

Naalakkersuisut angalasartut pillugit ”sapinngisamik piaarnerpaamik” inatsisissatut siunnersuummik taarsiissutissanullu  aaqqissuussinermik saqqummiiniartut, naalakkersuisut firkløvernik taaneqartut naalakkersuisooqatigiinnissamut tunngavigisaanni allassimavoq.

Taaguut spiralilersuinermik suliaq kalaallit arnartaasa niviarsiaqqallu 1960-kkunni aallartittumik naartunaveersaammik spiralimik ikkussuinermik pilersaarutaannut taaguugaavoq.

Arnat arlallit kingorna akuersisimannginnertik tusagassiorfitsigut oqaluttuaraat.

Ministeriuneq Mette Frederiksen (S) Naalakkersuisullu siulittaasuat Jens-Frederik Nielsen (D), siorna suliami utoqqatserput.

Tamanna Danmarkip Kalaallit Nunaanni peqqinnissaqarfimmik akisussaanerani kiisalu Kalaallit Nunaata akisussaaffimmik tigusinerata kingorna spiralilersuisoqarsimaneranik patsiseqarpoq.

Nalunaarut spiralilersuinermi suliap inuit pisinnaatitaaffiinut imarisaanik imaqartoq,  aggustusimi saqqummiunneqarnissaa ilimagineqarpoq. Nalunaarusiamik saqqummiineq arlaleriarluni kingunartinneqartarpoq.