Angut inuusuttoq qatanngumminik toqutseriarsimasutut unnerluutigineqartoq

MALUGIUK: Pisimasut sakkortuut allaaserineqarput, taamaattumik mianersorluni allaaserisaq atuarneqassaaq.

Angut 21-nik ukiulik Tunumiu Eqqartuussisoqarfik Sermersuumi septembarimi eqqartuunneqarnissami tungaanut tigummigallarneqarpoq.

Angut toqutseriarsimasutut unnerluutigineqarpoq, taanna Tasiilami apriilip tallimaani 2025-mi qatanngumminik angumik sinittumik savimmik kapoorlugu toqutseriarsimasutut unnerluutigineqartoq, unnerluussummi atuarneqarsinnaavoq.

Angut qatanngutaasoq niaqqumigut timimigullu savimmik arlaleriarluni kapineqarsimavoq, puaatalu illua pullaarsimalluni. Qatanngutaasorlu piffissaq eqqorlugu katsorsarneqarnermini annappoq.

Marloriarluni pinngitsaaliisimasutut unnerluutigineqartoq

Angut 21-nik ukiulik 2022-mi, 16-inik ukioqarluni, sakkortuumik kannguttaatsuliorsimasutut aamma unnerluutigineqarpoq.

AAMMA ATUARUK

17-inik ukiulik savilersorluni toqutseriarsimasutut eqqartuunneqartoq

Unnerluussut naapertorlugu niviarsiaqqat 13-inik ukiullit marluk pinngitsaalillugit arneriffigisimavai, niviarsiararlu aqqanilinnik ukiulik aamma pinngitsaalisimallugu. Kiisalu inunnut allanut marlunnut nakuusersimasutut aamma unnerluutigineqarpoq.

Unnerluutigineqartoq pineqartuni taakkunani pinngitsuunnginnerassanersoq imaluunniit nassuerutiginnissanersoq suli ilisimanngilarput, maannamullu suli eqqartuunneqarnikuunngissami pisuusutut aalajangiiffigineqarnikuunngilaq.

Unnerluussutini eqqartuussivimmi pisuutinneqassappat, ukiuni arfineq-pingasuni pineqaatissinneqarsimasunut inissiisarfimmiittussanngortinneqarnissaa, unnerluussisussaatitaasup piumasaraa.

Toqutsinermut ikiaroornartunulluunniit tunngassuteqanngitsut taama sivisutigisumik pineqaatissiissutigineqartarnerat qaqutigoortuuvoq, unnerluussisussaatitaasulli pinerlunnerit sakkortuut assigiinngitsut pineqarmata suliami matumani tamanna tulluartuusoq nalilerpaa.

Suliaq Eqqartuussisoqarfik Sermersuumi septembarip 15-ianniit 17-iata tungaanut suliarineqassaaq.