Angut Kalaallit Nunaanni najugaqartutut nalunaarsorsimasoq cigarettiliorfimmut suliamut tunngatillugu tigummigallarneqartoq

Jyllandimi unioqqutitsilluni cigarettiliorfimmut tunngatillugu suliami annertuumi angut Kalaallit Nunaanni najugaqartutut nalunaarsorsimasoq Danmarkimi tigusanut ilaavoq.

NSK, National Special Crime Unit, taamatut paasissutissiivoq

Suliaq tamanna juunimi NSK-p oqartussat allat arlallit, ilaatigut Kalaallit Nunaanni Politiit, suleqatigalugit arsaarinnissuteqarnerata tigusarinninneratalu kingorna paasinarsivoq.

Jyllandip qeqqani cigarettinik tunisassiorfimmik pilersitsisimasutut, cigarettinillu unioqqutitsilluni nioqqutissiortutut, toqqorsivinnilu cigaretinik 32 millioninit amerlanerusunik uninngasuutilittut, inuit marluk taamanikkut tigusarineqarput.

Inuit allat, ilaatigut Litauenimiu ataaseq, cigarettinik toqqorsisimasutut assartuisarsimasullu aamma aningaasanik peqquserluttuliornermut atorneqartunik eqqussuisutut tigusarineqarput.

Angutit marluk suli tigummigallarneqarput, aappaalu Kalaallit Nunaanni najugaqarpoq.

AAMMA ATUARUK

Portugalimiu kokainimik hashimillu eqqusseriarsimasutut pinngitsuutinneqartoq — ukiuni qulini pineqaatissinneqassanngilaq

Angut taanna Kalaallit Nunaanneersoq suliami qanoq attuumassuteqarnersoq, aamma inuiaqatigiissutsikkut sorlermik tunuliaqutaqarnera NSK-mit qanoq nalilerneqarnersoq paasisaqarfiginngilarput.

NSK immikkoortortaavoq immikkut ittoq, politiinit unnerluussisussaatitaasunillu immikkut ilisimasalinnik inuttalik. Suliat pinerlunnermut tunngasut pisariunerusut, ilaatigut aaqqissuussaasumik pinerlunnerit, suliarisarpai. NSK nammineq suliaminik suliaqartarpoq aammali najukkami politeeqarfik ikiortarlugu, aamma Kalaallit Nunaanni.