Portugalimiu kokainimik hashimillu eqqusseriarsimasutut pinngitsuutinneqartoq — ukiuni qulini pineqaatissinneqassanngilaq

Portugalimiu 21-nik ukiulik pisunut assigiinngitsunut ilungersunartunut unnerluutigineqarpoq. Taanna Eqqartussisoqarfik Sermersuumi Nuummiittumi marlunngornermi juulip arfineq-aappaanni eqqartunneqarpoq.

Angut inuusuttoq 2024-mi 2025-milu kokainimik 500 gramimik hashimillu 10 kilomik Kalaallit Nunaannut anngiortumik eqqussisimasutut, marloriarlunilu eqqusseriarsimasutut unnerluutigineqarpoq. Unnerluussut naapertorlugu ukiuni qulini pineqaatissinneqarsimasut inissiisarfianniittussanngortinneqarnissaa piumasarineqarpoq.

Taamaattoqanngilarli. Eqqartuussiviup Portugalimiu kokainimut hashimullu tunngatillugu pinngitsuutippaa, aningaasanillu peqquserlunnikkut iluanaarutinik malunnarunnaarsaasimasutut pisuutillugu.

Ikiaroornartunik nassaartoqanngitsoq

Illersuisup Tobias Engbyp kokainimik hashimillu taama annertutigisumik, sullitaani sumiiffinniluunniit allani, politiit nassaarsimanngitsut Sermitsiamut ilisimatitsissutigaa. Unnerluussisussaatitaasoq oqarasuaatini nalunaarutit tunngavigalugit Portugalimiup ikiaroornartut pineqartut Kalaallit Nunaannut eqqussimagai imaluunniit eqqunniarsarisimagai ilimanaateqartoq isumaqarpoq.

Angut inuusuttoq ikiaroornartunut tunngasuni pineqaatissinneqarnissamut tunngavissaqanngitsoq eqqartuussivimmi aalajangerneqarpoq. Taamaattumillu aningaasanik peqquserluutinik malunnarunnaarsaasimasutut, nammineq nassueruteqarneratut, taamaallaat pisuutinneqarpoq.

Portugalimiup taassuma aningaasat 621.200 koruunit Kalaallit Nunaanniit Danmarkimut septembarip 22-ani 2025-mi anniseriaraluarpai iluatsinngitsumilli. Nuummi mittarfimmi annisseriaraluartut taamani paasineqarput.

Angut qaammatini tallimani pineqaatissinneqarsimasunut inissiisarfimmiittussanngortinneqarpoq, Nunatsinnullu ukiuni tallimani iseqqusaajunnaarsitaalluni.

AAMMA ATUARUK

29-nik ukiulik peqquserlunnikkut aningaasarsianik malunnarunnaarsaariaraluartutut nunamit anisitaasoq

Portugalimiu taanna septembarimi 2025-mili tigummigallarneqarami, pineqaatissinneqarnini sinnereerpaa. Taamaammat eqqartuussisoqarfimmi aalajangiineq suliareqqitassanngortinneqassanngippat taarsiivigineqarnissaminik qinnuteqarsinnaavoq.

Inuit pingasut aningaasanik peqquserluutinik malunnarunnaarsaasut

Portugalimiup eqqartuunneqarnera Nunatta Eqqartuussisuuneqarfianut suliareqqitassanngortinneqassanersoq suli paasinngilarput. Unnerluussisussaatitaasup ullut 14-it iluani qanoq iliorniarnermut aalajangernissamut atorsinnaavai.

Ukiut qulit pineqaatissinneqarsimasunut inissiisarfimmiittussanngortitsinissaq unnerluussisussaatitaasup suliami tamatumani annerpaamik piumasaqaatigisinnaavaa. Kalaallit Nunaanni pinerluttoq ukiuni 16-ini pineqaatissinneqarsimasunut maanna inissiisarfimmiittussanngortinneqarsinnaalernikuuvoq. Tamannali ukiortaami aatsaat atuutilerpoq, sulianilu pisoqaanerusuni atorsinnaanani.

Islandimiu 29-nik ukiulik aningaasanik 621.200 koruuninik annisseriaqataasimasutut novembarimi 2025-mi eqqartuunneqareerpoq. Assingusumik pineqaatissinneqarpoq, tassa pineqaatissinneqarsimasunut qaammatini tallimani inissiisarfimmiittussanngortinneqarluni nunatsinnut ukiuni tallimani iseqqusaajunnaarpoq.

Angut pingajuat aamma taamatut unnerluutigineqarpoq, suliarli tassunga tunngasoq immikkut suliarineqassaaq.