Aqutsisoqarfik: Suila-tapinut akiligassallit sapaatit akunnerisa marluk iluani isumakkeerneqassapput

Suila-tapit. Sammisaq taanna ulluni kingullerni oqallisaaqaaq. Tassungalu tunngatillugu Akileraartarnermut Aqutsisoqarfik tusagassiorfinnut ataasinngornermi ualilluinnartoq nalunaaruteqarpoq.

AAMMA ATUARUK:

Suila-tapinik pissarsivallaarsimasut utertitsinissaannik piumasaqaat Naalakkersuisut unitsiinnarpaat

- Akileraartarnermut Aqutsisoqarfiup naatsorsuutigaa Suila-tapit ukiumut isertitaqarfiusumut 2025-mut annertuallaamik tunniunneqarsimasut isumakkeerneqarsinnaassasut, ullumikkumiit sapaatit akunneri marluk qaangiutsinnagit.

- Innuttaasut ukiumut isertitaqarfiusumut 2025-mut Suila-tapinik annertuallaamik tunineqarsimanertik pissutigalugu tamakkiisumik ilaannakortumilluunniit utertitsisimasut, aamma naatsorsuutigissavaat akiliutigisimasamik NemKontoannut utertinneqarnissaat, ullumikkumiit sapaatit akunneri marluk qaangiutsinnagit, Akileraartarnermut Aqutsisoqarfik tusagassiorfinnut nalunaarpoq.

Suila-tapinik annertuallaamik tunniunneqarsimasunut isumakkeerinninneq aamma aningaasat utertinneqareersimasut tunniunneqarnissaat ilanngaassinertaqassanngitsut aningaasallu tamakkiisumik utertillugit tunniunneqassasut, aamma ilisimatitsissutaavoq.

Naalakkersuisut akiligassanik isumakkeerinnittut

Naalakkersuisut innuttaasut Namminersorlutik Oqartussat qarasaasiaatigut atortuini kukkuneq peqqutigalugu akiligassaqalersimasut, akiligassaat isumakkeerusullugit, Inatsisartut Aningaasaqarnermut Akileraartarnermullu ataatsimiititaliaa qinnuteqarfigaat. Qinnuteqaat ataatsimiititaliap arfininngornermi akueraa. 

– Paasissutissat pisortanit pissarsiarineqartut innuttaasutut tatigineqarsinnaasussaapput. Tamanna matumani pisimanngilaq, tamannalu utoqqatsissutigaarput. Innuttaasut ilaat kukkussuteqarnatik amerlavallaartunik aningaasanik tunineqarsimapput, tassungalu akisussaaffik innuttaasuni ataasiakkaaniinngilaq, aningaasaqarnermut naalakkersuisoq Aqqaluaq B. Egede arfininngornermi oqarpoq.

Siusinnerusukkut nalunaarutigineqarsimasut naapertorlugit innuttaasut 7.521-nik amerlassusillit aningaasanik pissarsitinneqarpallaarsimapput. Tamassuma kingunerisaanik katillugit 31,9 millionit koruuninik utertitsissasut piumasarineqaraluarpoq. 

Maannamut suli ilisimatitsissutigineqanngilaq aningaasat qanorpiaq amerlatigisut aningaasaqarnermut ataatsimiititaliamut Naalakkersuisunit qinnuteqaatigineqarnersut. Inatsisartut nittartagaanni, Aningaasaqarnermut Akileraartarnermullu ataatsimiititaliap aalajangiinerini, qinnuteqaat taassumalu suliarineqarnera aamma suli saqqummersinneqanngilaq.