Arnanut angerlarsimaffeqanngitsunut unnuisarfik pillugu aalajangerneq ingerlatsivimmut uterteqqinneqarpoq

Nuummi angerlarsimaffeqanngitsunut unnuisarfiit ulikkaaqqammata Kommuneqarfik Sermersooq annertusaavoq unnuisinnaasut amerlineqarnissaannik siunertaqarluni, annertusaanermilu arnat nukingernartumik unnuiffissaminnik pisariaqarrtitsisut unnuiffissaliuunneqarput meeqqeriviusimasumi Umiami Nuussuarmiittumi. Arnat angerlarsimaffeqanngitsut unnuisarfittaavat arnanut 16-nut inissaqartitsivoq.

Unnuisarfiugallarfissaq pilersinneqarpoq siulittaasup aalajangerneratut taaneqartartoq tunngavigalugit, tamatumalu kingorna suliaq kommunip aningaasaqarnermut inuussutissarsiornermullu ataatsimiititaliaanut suliassanngortinneqarluni.

Ataatsimiititalialli toqqarpaa Umiap ukiuni tulliuttuni pingasuni utaqqiisaagallartumik arnanut unnuisarfittut atuutiinnarnissaanik akuerseqqusilluni innersuussut itigartissallugu, suliarlu aqqutsiveqarfimmut taamaalilluni utertinneqarpoq.

Borgmesteri Avaaraq Olsen (IA) Sermitsiap apeqqutaanut allakkatigut akissuteqarluni nassuiaavoq, innersuussut ingerlatsivimmut utertinneqartoq, Aningaasaqarnermut Inuussutissarsiornermullu Ataatsimiititaliap nalilermagu nutaamik naatsorsuusiortoqartariaqartoq aammalu aalajangernissamut tunngavissiaq erseqqinninngortinneqartariaqartoq.

Tassunga tunngatillugu borgmesteri erseqqissaateqarpoq, unnuisarfiugallartoq suliap nalilersoqqinneqarnerani atuuffimmitut ingerlaannassasoq:

– Arnat angerlarsimaffeqanngitsut unnuigallartarfianik pisariaqartitsineq matumani itigartinneqanngilaq. Arnat unnuigallartarfiat pilersinneqareerpoq siulittaasup aalajangerneratigut taamaaliornikkullu qulakkeerniagaavoq arnat isumaginninnikkut qajannartumik inissisimasut toqqissisimaffigisinnaasaminnik suiaassutsimillu immikkoortitsinertalimmik neqeroorfigineqarsinnaaniassammata. Tamannalu ingerlaannassaaq ingerlatsiviup suliamik kingumut nalilersuinerata nalaani aammalu aalajangiiffissatut tunngavissiamik nutaamik suliaqarnerani, Avaaraq Olsen ilisimatitsivoq.

Borgmesteri aamma nassuiaavoq, innersuussut nutaaq piareerneqarpat suliaq politikkikkut suliarineqaqqikkumaartoq:

- Uannut aalajangiisuuvoq, arnanut neqeroorummik atorfissaqartitsisunut aaqqiissummik attanneqarsinnaasumik aaqqiinissarput, tamatumalu ilutigisaanik aningaasaqarnikkut allaffissornikkullu tunngaviusut inissinneqarnissaat, Avaaraq Olsen oqarpoq.