Atassut naalakkersuisoqataaginnassanerluni aamma apeqqusiivoq: Inatsisit eqqortumik atorneqarnersut paasiniaavunga

Naalakkersuisoqatigiit Demokraatit, Inuit Ataqatigiit, Siumut Atassullu ukioq ataasingajak ataatsimooreerlutik ajornartooqqapput. 

Naalakkersuisunut ilaasortat marluk, tassalu Demokraatineersoq Anna Wangenheim Inuit Ataqatigiinneersorlu Naaja H. Nathanielsen, naalakkersuisunut ilaasortaajutigalutik Folketingimut qineqqusaarnerat matumani peqqutaavoq. 

Siumut naalakkersuisoqatigiinniit aniniarluni siorasaarivoq. Naalakkersuisuujutigaluni Folketingimut qineqqusaarneq Atassummit aamma apeqquserpaat. 

- Siunertarinikuunngisaannaraluaratsigu aninissamik allaat oqalulernissarput, kisianni naalakkersuisut allaat marlunngorneri (Folketingimut qineqqusaartut aaqq.) aatsaat iluamik apeqqusernarsigami, Aqqalu C. Jerimiassen oqarpoq.

Inatsit unioqqutinneqarpa?

Inatsisartut Naalakkersuisullu pillugit Inatsisartut inatsisaat unioqqutinneqarnersoq paasiniarlugu Aqqalu C. Jerimiassen Qinersinerup Misilinneqarnissaanut Ataatsimiititaliap allattaanut allagaqarpoq. 

- Misissoqullugu allagaqarpunga. 

Inatsisartunummi qinersisoqalersillugu Naalakkersuisut atorunnaarlutik naalakkersuisuugallalertarmata matumani atuunnersoq Aqqalu C. Jerimiassenip paaserusuppaa.  

- Naalakkersuisutut massakkut angalaguni massakkut qineqqusaajutaa angalasassuaa? Aamma taanna apeqqusigassaagami, habilitet eqqarsaatigalugu. Taava uani Folketingimut qinersinissami atuutinngeriarmat atornerlunneqarsinnaava? Naalakkersuisutut angalanerit atorluarlugit. Tamakkorpaaluugamik, Atassutip siulittaasua oqarpoq.  

Sisamanngorpat ataatsimiinnissaq pissanganartoq

Nunatsinni politikkikkut ataqatigiissaarisut, Naalakkersuisunit aamma ilaaffigineqartoq, sisamanngorpat ataatsimiissapput. Tassanilu Atassutip siulittaasua anngussassaqarpoq. 

- Naammagisimaarinninnginnerput pinngitsoorata apissittussaavarput. Pisariaqavissorpoq. Siulersuisuma taanna pillugu naammagisimaarinninnerat appasittuaraararsuarmut inisseqqavoq. Killissamik qaangiinertut isigivaat. Naalakkersuisuuneq saniatigut suliffissiaannginnami, Aqqalu C. Jerimiassen oqarpoq. 

Naalakkersuisuujutigaluni saniatigut qineqqusaarniaraanni piffissartornassaqisoq siornatigut naalakkersuisuunikuugami nalunngilaa.

- Kusaginngilara naalakkersuisuuffitik taama ataqqinngitsigalugit inuiaqatigiinni sullissisussatut, inatsisiliornissannut allanullu tunngasut, taama pingaartigisumik inissisimallutik tunullinngorlugit inissinnerat. Oqaraluarpataluunniit suliassatik aallutiinnassallugit. Kisianni taamaanngilaq. Qineqqusaarnertik massakkut annerpaamik fokuseqarfigisussaavaat. Upernaakkullu ataatsimiinnerup aallartinnissaa aajunaralaanngortoq.

Partiit annerit marluk iluatigaatigut? 

Naalakkersuisoqatigiinni partiit annerit marluk, tassalu Demokraatit Inuit Ataqatigiillu, aamma naalakkersuisuutitaminnik Folketingimut sassartitaqartut naalakkersuisoqatitik allat iluatiginerlugit maanna nalilertussanngoraat Atassutip siulittaasua oqarpoq. 

- Paariinnarusuppaatigut? Suleqatigiinnerput iluatigivaat, imaluunniit Folketingimut suna tamaat akigalugu sassartitsiniarpaat? Namminneq taakkua assaanniippoq. 

- Pingaarnersiuinerminni peerusussimagunitigut peerusussavaatigut, taamannak uanga paasiinnassavara. Tusaanngikkunitigut isumaqaannarpoq soqutigisimanngikkaatigut naalakkersuisooqatitut naleqartilluta, Aqqalu C. Jerimiassen naggasiivoq. 

Naalakkersuisunut ilaasortaajutigalutik Folketingimut sassartut pisinnaatitaaffitsik atoraat Naalakkersuisut Siulittaasuata  Jens-Frederik Nielsen siusinnerusukkut oqaatigaa. Allaaserisaq taanna uani atuarsinnaavat.