Paaqqinnittarfiit pillugit iliuuseqarumaarluni kommuni maanna neriorsueqqippoq.
Aaqqiissutissat maannakkorpiaq suliarineqartut aamma siunissaq ungasinnerusoq eqqarsaatigalugu suliniutit suliarineqartut, kommuni tusagassiuutinut nalunaarummini allappoq.
Paaqqinnittarfiit pillugit iliuuseqarumaarluni kommuni maanna neriorsueqqippoq.
Aaqqiissutissat maannakkorpiaq suliarineqartut aamma siunissaq ungasinnerusoq eqqarsaatigalugu suliniutit suliarineqartut, kommuni tusagassiuutinut nalunaarummini allappoq.
Sermitsiap Kommuneqarfik Sermersuumi borgmesteri Avaaraq Olsen nassuiaatinniarsarigaluarpaa, tassa aaqqiissutissat suut maannakkut siunissarlu ungasinnerusoq eqqarsaatigalugit sulissutigineqarsimanersut, aamma kommunip ulluunerani paaqqinnittarfinni neqeroorutit pillugit ukiuni 20-ngajanni assingusunik unammilligassaqareerluni neriorsuutai nutaat qanoq allaanerussuteqarnersut paaserusullugit.
Borgmesterili apersorneqarusunngilaq, allakkatigulli akissuteqarluni.
Ajornartorsiutit aaqqinniarlugit nukinginnartumik qanoq iliortoqarpa?
- Ilaatigut radiukkut ussassaarummik paasissutissiinermillu ingerlataqarpugut utoqqalinersiallit, ilinniartut ilinniarsimasullu meeqqerivinni sulisinnaanissaat anguniarlugu. Tamatuma saniatigut ingerlatsivik immikkoortortaqarfimmilu pisortaq meeqqeriviit qanimut suleqatigisarpaat sulisunik ataqatigiissaarinissaq ajornanngippallu ikioqatigiittarnissamut periarfissat pillugit, Kommuneqarfik Sermersuumi borgmesteri Avaaraq Olsen allappoq.
Suliniutit arlallit borgmesterip maanna aaqqiissutissatut nukinginnartutut oqaatigisai siusinnerusukkut aallartinneqareersimapput. Kommunip utoqqalinersiallit 2024-mili paaqqinnittarfinni sulisussaaleqinermik ajornartorsiut qaangerniarlugu ikiuuteqqullugit kajumissaarpai.
Borgmesteri Avaaraq Olsen maajip aallaqqaataanni akerliussutsimik takutitsisunut oqalugiarpoq.
Assi: Oscar Scott Carl
AMIGAATEQARTORUJUSSUUSUT
Kommuneqarfik Sermersooq tusagassiuutinut nalunaarummini allappoq, marsimi 2026-mi naatsorsuinerit takutikkaat, kommunip meeqqeriviini atorfiit 79-it inuttalerneqarsimanngitsut. Ingammik perorsaasunik ilinniarsimasunik amigaateqarneq ilungersunartorujussuuvoq.
Kommunip Majoriaq suleqatigalugu suliffissaaleqisut 50-it angullugit amerlassusillit pikkorissarniarlugit aallartippai, taakkulu paaqqinnittarfinni sulisussatut piukkunnarsarneqassallutik, tusagassiuutinut nalunaarummi allassimavoq.
Majoriamik suleqateqarneq
Kommuni siunissaq ungasinnerusoq eqqarsaatigalugu sunik aaqqiissutissarsiornersoq, Avaaraq Olsen aperineqarami, suliniutini nutaani Majoriap aamma SPS-ip suleqatigineqarnissaat taavai.
- Kommuni Majoriaq suleqatigalugu suliffissaaleqisut 50-it angullugit amerlassusillit pikkorissartinneqarnissaannik suliniuteqarpoq, aamma SPS aqqutigalugu sulisussarsiorneq piginnaanngorsaanerlu suliarineqassallutik.
Kommunip suliffimmi avatangiisini atukkat sulisunillu tigumminniinnarsinnaaneq pingaartikkai, Avaaraq Olsenip allakkatigut akissummini aamma eqqaavai.
Kommuni sulisut sullivimminni atugarissaarnerunissaannik sulisunillu tigumminniinnarsinnaanissaq anguniarlugit sunik suliniuteqarnersoq, Avaaraq Olsenip allakkatigut akissutaani eqqaaneqanngilaq, tusagassiuutinulli nalunaarummi allassimalluni kommunip paaqqinnittarfinni aqutsisut nukittorsarnissaat sulisullu piginnaanngorsarnissaat pingaartikkai.
Taavami suna nutaartaagami?
Meeqqanut paaqqinnittarfinni sulisussaaleqineq nutaajunngilaq, oqaatsillu taakku allaannaraangakkit soorlulusooq allaqqiinnartarikka. Taamaalilluni neriorsuutit nutaat aamma ukiuni kingullerni 20-ni oqaatigineqartartut suut assigiinngissutigaat?
- Tamanna neriorsuinerinnaanngilaq. Ullumikkut ingerlatsivimmi nutaamik pilersaarusiorpugut, taannalu malittariaqarparput, tassanilu tunngavigineqarluni ulluunerani paaqqinnittarfinni unammilligassat siunissamut ungasissumut isigisumik iliuuseqarfigineqartariaqartut, Avaaraq Olsen allappoq.
Kommuni tusagassiuutinut nalunaarummi nangilluni allappoq, paaqqinnittarfinni ataasiakkaani pissutsit pillugit angajoqqaat saaffiginnittarnerat ernumassuteqarnerallu eqqumaffigineqartorujussuusoq. Saaffiginnissutit tamakku ilungersunartutut isigineqarput suleriaqqinnissamilu sulissutigineqassasut, allassimavoq.
