Atuarferujussuaq oqallisaaqisoq nersornaammut innersuussaasoq

Maanna peqataasinnaanngorputit taasisitsinermut, taamaalillutit atuarfiup Kalaallit Nunaanniittup nersornaatisinissaanut Årets Skolebyggeri 2026-mut sunniuteqarsinnaavutit.

Aamma atuakkit

- kingullivillugu ammarneqarnissaa upperinngilarput

Atuarfik Inussuk, Nuup illoqarfiata qeqqaniittoq, meeqqanillu 1.300-nik atuartoqarsinnaasoq, atuarfinnik sanaartorluni suliniutit quliusut akornanni nersornaaserneqarnissaanut innersuunneqarpoq, taannalu atuarfik Danmark-ip avataaniittutuaavoq.

Taamak ilisimatitsivoq NøhrCon, nersornaammik aaqissuisuusoq.

- Atuarfik Inussuk Nuummiitoq Årets Skolebyggeri 2026-mut innersuunneqarpoq – atuarfiit qulit innersuunneqartut taanna ilagaat, kisiartaallunilu Danmarkip avataaniittuulluni. Nersornaasiisarneq taanna 2013-mili aallartikkami atuarfinnik sanaartornermik ukkatarinniffiuvoq, sanaartornermik suliaqartut sinnerisa isumassarsiorfigisinnaasaattut ilinniarfigisinnaasaattullu inissisimalluni, NøhrCon-imit ilisimatitsissutigineqarpoq.

Atuarfik taanna meeqqanut atuartunut 1.300-nut inissaqarpoq sananeqaatimigullu immikkoortortanut arfinilinnut imminnut ataqatigiittunut iluatungaanilu aqqusineeraqarluni ukioqatigiikkaat immikkut illulerlugit sanaajuvoq, tassa - ”atuarfiit atuarfimmiittutut” immikkut illutalersorneqarsimagamik.

Taaguut Inussuk isumaqarpoq ”nalunaaqutsiut inuttut isikkulik”, sumiiffiillu atuarfimmiittut ataatsimoorfissatut, timersorfissatut, silamiiffissatut sanaartorneqarsimasut Nuummiunit tamanit ukioq kaajallallugu atorneqarsinnaasutut eqqarsaataasimapput. Illussanik titartaasarfik KHR Architecture atuarfimmik titartaasuusimavoq, sanaartortitsisorlu tassaalluni Kommuneqarfik Sermersooq.

Sivisuumik utaqqisaavoq

Siunertarineqaqqaaraluarpoq atuarfik aggustimi 2024-mi atulersinneqassasoq. Taamaattorli isumannaallisaanermut tunngassuteqartut pissutaallutik atuarfiup atoqqaarfissiorneqarnissaa arlaleriarluni kinguartinneqartariaqarsimavoq, aatsaallu ukioq manna aggustimi atuartunit ilinniartitsisunillu atorneqarsinnaanngorluni atoqqaarfissiorneqarnissaanut matut ammarneqarsinnaalersimallutik.

Atuarfik nersornaaserneqartussatut ajugaatinniaqataaffigerusukkukku, UGGUUNA taaseqataasinnaavutit.