Avammut tunisakinneruneq saarulliit tunineqartut matussuseraat
Raajat avammut tunisat ikiliartorput, saarulliilli avammut tunisat ukiup qaammataani qulini siullerni 69,6 procentimik amerleriarput.
Umiatsiaararsortut Tasiilap eqqaani saarullinniartut.
Assi: Oscar Scott Carl
Aalisakkanik avammut tunisineq pillugu kisitsisaagallartut aalisakkat pingaarnerit ukiup qaammataani qulini siullerni tunisat amerleriaateqalaarsimasut takutippaat.
Naatsorsueqqissaartarfik allappoq:
- 2025-mi januaarimiit oktobarimut avammut tunisat nalingi katillugit 4.207 mio. koruuniusimapput. Ukiup siulianut sanilliullugit 185 mio. koruuninik annertunerupput, annertuseriarnerlu katillugu 4,6 procentiuvoq.
- Eqqaamaneqassaarli kisitsisit utaqqiisaagallaq naatsorsuinerummata taamaattumillu kingusinnerusukkut iluarsiiffigineqarsinnaallutik paasissutissat tamakkiinerusut pigineqalerpata, Naatsorsueqqissaartarfik allappoq.
Saarulliit tunisat 69,6 procentimik amerlisut
Saarulliit avammut tunisat pissutigalugit avammut tunisat ikileriaraluarnissaraluannit annaakkaat kisitsisit takutippaat.
Avammut tunisat pingaarnersaat, tassa raajat, siorna piffissamut tassunga sanilliullugu 12,9 procentimik ikileriarsimapput, tassa avammut tunisat nalingi 266 million koruuninik appariaatigalugu. Pisarineqartut ikileriarnerannik pissuteqarsinnaavoq.
Qalerallit avammut tunisat nalingi 1,1 procentimik apparialaarput, saarulliilli avammut tunisat nalingi 69,6 procentimik qaffariaateqangaatsiarsimallutik.
Amerleriarnerannut aalisakkat tunisat 48,0 procentimik amerlisimanerat kiilumullu akigitinneqartut 14,6 procentimik qaffanneqarnerat pissutaavoq.
Takussutissami tulliuttumi saarulliit avammut tunisat aalisakkanut pingaarnernut allanut sanilliullugit qanoq amerlisimatiginerat takuneqarsinnaavoq.
Takussutissaq: Naatsorsueqqissaartarfik.
