Blok 5-imut tunngatillugu suliami eqqartuussut aalajangerneqarpoq
Angut 42-nik ukiulik Nuummi angummik inuusuttumik toqutsisimasutut pisuutinneqarluni tarnimikkut nappaatilinnut napparsimmavimmi Danmarkimiittumut inissinneqartussanngorlugu aalajangiiffigineqarpoq.
Nuummi eqqartuussineq uissuumminartoq ulluni tallimani suliarineqarpoq.
Assi: Morten Okkels
Blok 5-imi toqutsisoqarnikuuneranut unnerluutigineqartoq 42-nik ukiulik pillugu Eqqartuussisoqarfik Sermersuumi ulluni sisamani suliaq ilungersunartoq ingerlanneqareersorlu eqqartuussut marlunngornermi ualikkut aalajangerneqarpoq.
42-nik ukiullip oktobarimi 2024-mi angut 20-nik ukiulik Nuummi Blok 5-imi arlaleriarluni niaquagut, qularnanngitsumik ujaqqamik, anaalerlugu toqukkaa eqqartuussivimmit uppernarsarneqarsinnaasutut nalilerneqarpoq.
Tamatuma kingorna angutip maanna pisuutinneqartup toqutaasup timaa pequusivimmut qimappaa, taannalu toqungasoq oktobarip sisamaani 2024-mi ullaap tungaani siumorneqarluni.
Unnerluutigineqartoq pinngitsuunerarpoq, Blok 5-imili pequusiviup eqqaani aap seqqarnerani inuaasa ipai DNA-vatalu nassaarineqarnera eqqartuussisup eqqartuusseqataasullu marluk toqutsisimaneranut uppernarsaatissatut takussutissaanerat aalajangerpaat.
Toqutsisimasutut siusinnerusukkut pineqaatissinneqarnikoq
Angut 42-nik ukiulik Ilulissani 2016-imi peqqarniitsumik toqutsisimasutut ukiuni arfineq-marlunni pineqaatissinneqarsimasunut inissiisarfimmiittussanngorlugu eqqartuunneqarnikuuvoq.
Angut Danmarkimi tarnikkut nappaatilinnut napparsimavimmi piffissaligaanngitsumik inissinneqartussanngorlugu eqqartuunneqarmat maanna allaanerusumik aalajangiisoqarpoq. Unnerluussisussaatitaasup Aprilia Jespersenip tamanna piumasarinikuuaa.
Angut toqutsisimasutut siusinnerusukkut eqqartuunneqarnermi kingorna skizofrenertutut naliliiffigineqarnikuuvoq. Eqqartuussisoqarnissaa sioqqullugu Aarhusimi napparsimmavimmiitsitaavoq, maannalu tassunga uteqqittussanngorluni.
Suliarli una suli naammassivinngilaq. Angutip pineqaatissinneqartup illersuisuatalu, Marie Louise Frederiksenip, eqqartuussiviup aalajangernera Nunatta Eqqartuussisuuneqarfianut suliareqqitassanngortippaat.
Angut 42-nik ukiulik 2024-mi arnamut nakuusersimasutut aamma unnerluutigineqarpoq, kisianni ilisimannittut aggersarneqartut arlaannaalluunniit oqaaseqarsinnaanngimmat pinngitsuutinneqarluni.
