Qeqqata Kommuniani innuttaasut erseqqissumik taasinermikkut nalunaaruteqarput, innuttaasummi 71 procentii akuersipput Sisimiut Maniitsorlu "avissasut".
Taamaalilluni kommuni aveqqinneqartussanngorpoq, naatsorsuutigineqarporlu tamanna pissasoq 2029-mi, aaqqissuussaanerup nutaap atuutilernissaa ilutigalugu.
Qeqqata Kommuniani innuttaasut erseqqissumik taasinermikkut nalunaaruteqarput, innuttaasummi 71 procentii akuersipput Sisimiut Maniitsorlu "avissasut".
Taamaalilluni kommuni aveqqinneqartussanngorpoq, naatsorsuutigineqarporlu tamanna pissasoq 2029-mi, aaqqissuussaanerup nutaap atuutilernissaa ilutigalugu.
- Maanna taasinerup inernera Naalakkersuisunut nassiutissavarput, tamatumalu saniatigut Naalakkersuisut oqaloqatigisariaqarpagut siunissami qanoq iliortoqassanersoq eqqarsaatigisatsinnik apuussivigalugit. Naggataatigullu Inatsisartut aalajangiisussaapput kommunit aaqqissuussinerat nutaaq 2029-p kingorna qanoq isikkoqassanersoq.
- Naatsorsuutigaarput Naalakkersuisut aamma Inatsisartut Qeqqata Kommuniani innuttaasut ersarissumik nalunaarutaat ataqqissagaat, kommunitsinnilu avinneqassasoq, borgmesteri Malik Berthelsen (S) oqarpoq.
Aaqqissuussaanermut ataatsimiititaliaq 2026-mi nalunaarusiaminik tunniussissaaq
Maanna aaqqissuussaanermut ataatsimiititaliaq, borgmesterit tamarmik Naalakkersuisut peqatigalugit politikkikkut ataqatigiissaarisut aqqutigalugit akuersissutigisaat, sulivoq. Ataatsimiititaliaq kommunit namminersorlutillu oqartussaaqataasut akornanni suliassat agguataarnerat siunissami qanoq isikkoqassanersoq siunnersuusiussaaq, kiisalu 2029-p kingorna kommunit aaqqissuussinerat nutaaq qanoq isikkoqassanersoq innersuussusiortussaallutik.
Aaqqissuussaanermut ataatsimiititaliap inassuteqaatini Inatsisartunut, kommuninut Naalakkersuisullu 2026-mi tunniuttussaavai. Taamaattorli Qeqqata Kommunianit toqqarneqarpoq aaqqissuussaanermut ataatsimiititaliap innersuussutigiumaagai utaqqinagit taasisitsineq ingerlanneqassasoq.
- Ilumoorpoq kommunit aaqqissuussaanerisa aaqqissuuteqqinnissaanut suliaqartoqartoq, maannalu kommunimi innuttaasutsinnut taasisitsereernitsinnut pissutaavoq kommunitta avissinnaaneranut piffissaqarluarluta kommunip avinneqarnissaa sioqqullugu piareersarsinnaaniassagatta. Maannalu innuttaasut taasinermikkut ersersitsipput kommunip marlunnut avinneqarnissaa kissaataasoq - uteqqissavaralu - tamanna ataqqineqassasoq naatsorsuutigigakku, borgmesteri Malik Berthelsen (S) oqarpoq nangillunilu:
Avinnissaq qajassuussilluni ingerlanneqassaaq
- Ullumikkut qinigaaffimmilu matumani kommune ataasiuvugut, taamaattumik kommunalbestyrelsimi nunaqarfinnilu aqutsisuni nangittumik 2029-p tungaanut suliagut ingerlaqqissavagut. Taamaattorli innuttaasut taasinermikkut pisinnaatitsissummik tunniussinerat aallaavigalugu, avinneqarnissaq piareersarlugu aallartissaagut, taamaalilluta qulakkeerniassavarput avinnissap qajassuussilluni ingerlanneqarnissaa.
Borgmesteri Malik Berthelsen innersuussivoq illoqarfiit nunaqarfittaasalu avinneqarnissaat avittunut namminerisamillu kommuninngoqqittunut akisussasoq ilisimagitsik, tassungalu tungatillugu Naalakkersuisut naammagisimaarinninnermut misissuisitsimanerat innersuuppaa, tassanimi ersersinneqarnikuummat innuttaasut amerlanerussuteqartut qanilaartumik ingerlatsinermik pisariitsumillu kommunit innuttaasuminik sullissisarnissaannik amigaateqartut.
Taamatuttaaq borgmesterip innersuussutigaa aqutsinermut aningaasartuutit pillugit nalunaarusiaq, kommunit siuliisa aaqqissuussaaneranut uteqqissagaluarpata tamanna aningaasatigut qanoq akeqassanersoq, tassanilu ersersinneqarpoq pingaartumik Maniitsoq nunaqarfiillu aningaasaqarnikkut annertuumik annaassaqassasut namminerisamik kommuninngoqqinnerminni.
- Kommunip avinneqarnera sapinngisamik mianersortumik qajassuussisumillu pinissaa qulakkeerniarlugu uanga nammineq borgmesteritut sulissutigissagiga qularineqassanngilaq. Taamaattuminguna pingaaruteqartoq siunissaq qanoq ilusilersorneqassanersoq aalajangereersimanissaa, taamaalillutalumi aamma periarfissaqalerpugut piareersassalluta avinnissap piviusunngortinneqannginnerani, borgmesteri oqarpoq nangillunilu:
- Kommunit marlunngortussanngorpugut, taamaattorli siunissami suleqatigiinnissarput qanoq ittuussanersoq aamma isumaliutigilereertariaqarparput. Assersuutigalugu isumaqarpunga suleqatigiinneq ataatsimoorussamik pilersissinnaagipput, assersuutigalugu kommunit marluullutik sulisut ataatsimoorussinnaasaat eqqarsaatigalugit, tassa atorfilittat innuttaasunik sullissinermik toqqaannartumik suliaqanngitsut, soorlu akissarsialerinermik suliaqartut, HR aamma qarasaasialerinermut tunngasut suleqatigiissutigilluarsinnaavagut. Qularinngilluinnarpara suleqatigiinnerup aqqutissiuussinnaagaa akikinnerusumik aaqqiissutissanik nassaarsinnaanissarput, taamaalillutalu kommunip avinneqarnerani aningaasartuutissatut ilimagineqareersut annikillisissinnaallutigit.
Allanut kommuninut piareersalereernissamik kaammattuivoq
Qeqqata Kommuniani kisimiinngilaq, qanimut demokratiimik innuttaasunillu qanittumik sullissinermik amigaateqarnerannik nalaataqartoq. Borgmester Malik Berthelsen kaammattuivoq 2029-ip kingorna kommunit nutaamik aaqqissuussaalernissaannut piareersartoqassasoq:
- Kommunit allat, kommunip avinneqarnissaanik kissaateqarnermut tunngappat imaluunniit pisortat akornanni suliassat nammagassallu pineqarpata, tamatta piareersartariaqartugut, nalunngilarpummi kommunit amerlanerusut avinneqarnissaat kommuninut nutaanut aningaasartuutaasussaasoq, tamannalu suleqatigiinnikkut anguniagaqarfigalugu sulissutigisinnaavarput aningaasaqarnikkut nassuiaatigisami tikkuarneqartutut aningaasartuutaanerulersussat annertutiginnginnissaat, Malik Berthelsen oqarpoq.
Kangaamiormiunut Atammimmiunullu immikkut inuulluaqqusineq
Kangaamiormiut Atammimmiullu kisimiillutik aalajangiisinnaatitaagaluarunik, taava kommune avinneqassanngikkaluarpoq, ullumikkullu aaqqissuussaanera nanginneqassagaluarluni. Tamatumunnga atatillugu borgmesterip oqaatigaa taasisitsinissamut piareersarnermi innuttaasunillu ataatsimeeqateqartarnermi Kangaamiuni Atammimilu innuttaasut avinnissaq pillugu ernumassuteqartut malugisimallugit:
- Innuttaasunik ataatsimiititsisarnitsinni nalunngilara, pingaartumik Atammimmi Kangaamiunilu innuttaasut ernumassuteqartut, aammalu kissaatiginerpaagaluaraat ullumikkut kommunip aaqqissuussaanera nanginneqassasoq. Paasisinnaavara ernumassuteqartut, taasinermilu inernerit naapertorlugit takusinnaavara ullumikkut aaqqissuussaanermut naammagisimaarinnittut.
- Maanna pissutsit eqqarsaatigalugit Sisimiut ataannarnissamik kissaateqartoqarnera pillugu oqaaseqarsinnaanngikkaluarlunga, neriorsuutigisinnaasatuara tassaavoq kommunip avinneqarnera sapinngisamik qajassuussilluni pissasoq qulakkeerniarumaaripput, Qeqqata Kommuniani borgmesteri, Malik Berthelsen (S) naggasiivoq.
