Qeqqata Kommunia: Kommunip avinneqarnissaanut amerlanerussuteqangaatsiartut taasisut
Qeqqata Kommuniata avinnissaa pingasunngormat novembarip 26-ani innuttaasunit taasissutigineqarmat, innuttaasut 71 procentii akuersisut 29 procentii naaggaarput.
Borgmesterip Malik Berthelsenip kommunalbestyrelsi peqatigalugu Maniitsup Sisimiullu avinneqarnissaat pillugu kommunimi innuttaasunik taasisitsipput.
Assi: Leiff Josefsen
Qeqqata Kommuniani qinersisinnaasut affaat inorlugit kommunip avinneqarnissaa pillugu taasisitsinermut pingasunngornermi novembarip 26-anni taasiartorput.
6.583-init 2.886-it taasisimapput, tassa qinersisinnaasut 44 procentingajaat.
Kommunip Facebookimi quppernerani kisitsisini saqqummiunneqartuni takuneqarsinnaavoq.
Taasinerilli paatsuugassaangillat. Taasisut 71 procentiisa kommunip avinneqarnissaanut akuersisut, 29 procentillu Sisimiut Maniitsullu kommuneqatigiiginnarnissaat taasissutigaat.
Nunaqarfiit marluk allannguerusunngitsut
Kommunip avinneqarnissaata oqallisigineqarnera sivisuvoq. 2009-mi kommunit kommunerujussuanngorlugit kattussuunneqarnerisa kinguneranik innuttaasunik sullissinerup ajorseriarsimanera maannamut kommunip aaqqissuussaaneranik isornartorsiuisunit tikkuarneqartuarpoq.
Nunaqarfimmi Sarfannguimmi oqariartuut ersarippoq. Qinersisinnaasut tamarmik taasisimapput. 100 procentit avinnissaq kissaatigaat. Sarfannguit eqqaani nunaqarfinni pingasuni aamma taamaappoq, affaasa sinnerlugit Maniitsoq Sisimiullu kommuneqatigiitsikkunnaarusuppaat.
Maniitsup nunaqarfii marluk, Kangaamiut Atammillu, kommunip aaqqissuussaanera maanna atuuttoq attatiinnarusuppaat.
Kommunip avinneqarnissaa kommunip nammineq aalajangiiffigissanngilaa. Kommunalbestyrelsimi innuttaasunik taasisitsinerup inernera oqaluuserineqassaaq, tamatumalu kingorna kissaatigineqartoq Inatsisartunut ingerlateqqinneqassanersoq aalajangiiffigissallugu.
