Borgmesterit niuernermi umiarsualiviit tikilluaqquaat

Nunami umiarsualivinnik aserfallatsaaliinerit kinguaattoorfiupput, 2021-milu aserfallatsaaliinerit 3 milliarder koruuninik naleqarput.

AAMMA ATUARUK

Sikuki Nuuk Harbour pillugu siunnersuummi kommunit tusaaniarneqassapput

Tamanna aaqqiissuteqarfiginiarlugu Naalakkersuisut ingerlatseqatigiiffik Nuummi umiarsualivimmik piginnittoq, Sikuki Nuuk Harbour, nunami umiarsualiveqarfinnik allanik pisisinnaanera niuernikkullu atugassarititaasut naapertorlugit ingerlatsisinnaanera periarfissarsiorusuppaat.

Kommunillu siullertut tusarniaavigineqassapput. Taama Ineqarnermut, Attaveqarnermut, Nunap Isorliunerusunut Upalungaarsimanermullu Naalakkersuisoqarfik juulip aallartinnerani Sermitsiamut ilisimatitsivoq.

Naalakkersuisulli isumalluarnartumik bormesterinit ilassineqarnissartik naatsorsuutigisinnaavaat. Oqaatigilluaannarlugu Kujataaniit.

Malene Vahl Rasmussen (D), Kommune Kujallermi borgmesteri, inatsisissatut siunnersuummut isumalluarpoq.

- Kommune Kujallermi inuussutissarsiornerup ineriartortinnissaanut iluaqutaasinnaasut tamaasa tikilluaqquavut. Naalakkersuisut Sikukilu isumaqarpata maani Kujallermi umiarsualiviit niuernikkut atugassarititaasut malillugit ingerlanneqarsinnaasut, taava isumaqarpunga tamanna ajunngitsumik takutitsisoq, oqarpoq.

Kommuni imaatigut inerisaasoqarnissaa sivisuumik utaqqisimagaa, Namminersorlutillu Oqartussat umiarsualiviit ullumikkumut naleqqiullugit pitsaanerusumik unammillersinnaanerusumillu ingerlanneqarsinnaanissaat ukkatarigaat pitsaasuusoq, taanna oqaluttuarpoq.

Umiarsualiviit mikivallaalersut

Nunap ilaani niuernikkut umiarsualivimmik ingerlatsinermik eqqarsaateqarneq, nunap karsianut nanertuutaassanngilaq.

Sikukip niuernikkut umiarsualivinnik ingerlatsilernermigut umiarsualivimmi atuisut akiliuteqartalernissaannik periarfississavai, taamaalilluni angallannerup aserfallatsaaliuinerullu aningaasalersorneqarnissaat isumagineqarsinnaassalluni.

Umiarsualivinni akiliuteqartitsisoqartalernissaa qanoq isumaqarfigaajuk?

- Matumani apeqqutaavoq atuinermut akiliut qanoq annertutigissanersoq. Assersuutigalugu Qaqortumi ineriartorneq qiviariarutsigu, qularinngilara maani umiarsualivimmik ingerlatsinissaq imminut akilersinnaasoq, Malene Vahl Rasmussen oqarpoq.

Umiarsuarnut takornariartaatinut, aatsitassarsiortunut aamma kilisaatinut atorneqarsinnaalernissaa anguniarlugu alliliinissamik, Kommune Kujallermi sulissuteqartoqarpoq. Umiarsualivik allilerneqarnissaa, inuussutissarsiutitigullu atorneqarsinnaalernissaa aamma kajuminnartuunissaanik kissaateqartoqartoq taassuma oqaluttuaraa.

- Qaqortumi umiarsualivik mikigilersimavarput.

Borgmesterillu namminersortunngorsaaneq akornutissaqarsorinngilaat.

- Kisermaassillutik ingerlatsisut pisortallu aserfallatsaaliuineq attassinnaanngilaat, Malene Vahl Rasmussen oqarpoq.

Kikkut tamarmik aningaasalersuinermut ikiuutissapput

Kommune Kujalleq isumalluartuni kisiartaangilaq, Qeqqata Kommuniani borgmesteriata Malik Berthelsenip (S) Naalakkersuisut siunnersuutaat tunngaviatigut aamma isumaqatigaa.

- Umiarsualiviit inuussutissarsiornitsinni pilersuinitsinnilu isumalluutigaagut, umiarsualiviillu nunap aningaasaqarnerata ingerlannerani pinngitsoorsinnaanngilagut. Aammattaaq aserfallatsaaliuinerup tungaatigut kinguaattoorujussuarneq eqqarsaatigalugu isumaqarpunga maannakkut pissutsit illersorneqarsinnaanngitsut, Sermitsiamut allakkatigut akissuteqarluni oqarpoq.

Taanna isumaqarpoq sinerissami umiarsualiviit pitsaassutsimut isumannaatsuunermullu tunngatillugu Nuup umiarsualiviatut qaffasissumik inissisimalernissaat pingaarnerutinneqartariaqartoq.

- Aamma isumaqarpunga tamatta atuisutut aningaasalersuinermut peqataanissarput naleqquttoq, tassami takunikuuarput aningaasanut inatsimmi aserfallatsaaliuinermut aningaasaliissutit naammanngitsut, Malik Berthelsen allappoq.

Malene Vahl Rasmussen assigalugu atuisunut akiliutaasussaq naleqquttuusariaqartoq taanna isumaqarpoq.

- Akitsuutip qaffasissusaa assartuinermi akinut niuernermullu innarliisinnaasunngorlugu inissinneqannginnissaa, soorunami pingaaruteqarpoq.

Kommuneqarfik Sermersuumi borgmesterip Avaaraq Olsenip (IA) Naalakkersuisut inatsisissatut siunnersuutaat tusarniaassutigineqarnera nuannaarutigaa, tassungalu atatillugu siunnersuut kommunimullu qanoq kinguneqarsinnaanera isummerfigissavaa. Taamaattorli inatsisissatut siunnersuut maannamut oqaaseqarfigerusunngilaa.

Sermitsiap Avannaata Kommuniani Kommune Qeqertalimmilu borgmesterit attaveqarfiginiaraluarpai, piffissaliunneqartorli eqqorlugu akisinnaasimanngillat.