KL

DK

Sikuki Nuuk Harbour pillugu siunnersuummi kommunit tusaaniarneqassapput

Naalakkersuisut Kalaallit Nunaata sinnerani umiarsualiviit niuernermut atorneqalersinnaanerat pillugit siunnersuutertik upernaakkut ataatsimiinnermi aappassaanik tunuartippaat. Siunnersuut annertusisamik tusarniaassutigineqassaaq.

Kalaallit Nunaata sinnerani niuernermik tunngavilimmik umiarsualivinnik ingerlatsinissaq pillugu inatsisissatut siunnersuummi, kommunit immikkut peqataatinneqassapput.
Hanna Hviid Hanna Hviid Tusagassiortoq
Saqqummersinneqarpoq

Naalakkersuisut Sikuki Nuuk Harbour nutaamik ateqalerlunilu Nuup avataani umiarsualivinnik ingerlatsisunngornissaanut tunngaveqalissasoq 2025-mi ukiakkut ataatsimiinnermi siunnersuutigaat. Siullermeerneqarnissaanut ulloq ataaseq sioqqullugu oqaluuserisassanit peerneqarpoq, taamaaliornerlu nassuiaateqarfigineqarani.

Siunnersuut upernaakkut ataatsimiinnermi oqaluuserisassanngortinneqaqqippoq. Tassani siullermeerneqareerluni tunuartinneqarpoq.

Sermitsiamiit siunnersuutip sooq tunuartinneqarnera paasiniarlugu ineqarnermut, attaveqaasersuutinut, isorliunerusunut upalungaarsimanermullu naalakkersuisoqarfimmut saaffiginippugut.

Siunnersuut pillugu annertusisamik tusarniaasoqaqqaarnissaa, tasaani kommunit ilanngunneqarnissaat ilaatigut Inatsisartut kissaatigineqarmat, upernaakkut ataatsimiinnermi tunuartinneqarsimasoq naalakkersuisoqarfimmiit paasissutissiissutigineqarpoq.

”Inatsisissatut siunnersuutip inaarutaasumik suliarineqannginnerani kommunit tusarniaanermi akissutaat pissarsiarineqarpata pitsaanerpaassasoq politikkikkut isumaqartoqarpoq, taamaaliornikkut inaarutaasumik aalajangiinissamut ilanngunneqarsinnaallissammata. Naalakkersuisut attaveqaasersuutit pillugit inatsimmik piareersaanerminni Inatsisartut suleqatigilluarnissaat kommunillu peqataatinneqarluartarnissaat pingaartippaat,” naalakkersuisoqarfik allappoq.

Inatsisissatut siunnersuut tusarniaassutigineqareerpat saqqummiunneqaqqikkumaartoq naatsorsuutigineqartoq aamma paasissutissiissutigaat. Inatsisissap suliarineqarnera pillugu naalakkersuisoqarfimmiit oqaaseqaqqittoqarsinnaanngikkallarpoq.

Namminersorlutik Oqartussat umiarsualiviutaata, Nuuk Sikuki Harbourip, niuernikkut isumaqatigiissuteqarluni Nuummiinnaq ingerlatsivoq, inatsisissatulli siunnersuut akuerineqarpat nunap sinnerani aamma taamaaliorsinnaanngussaaq.

Sikukip umiarsualiviit niuernermut atorsinnaanngorpagit, umiarsualivinnik ingerlatsineq aserfallatsaaliinerlu aningaasalersorneqarsinnaanngussapput.

naalakkersuisut umiarsualiviit sikuki nuuk harbour kommunit inuiaqatigiit inatsisissatut siunnersuut

Atorfiit tamaasa takukkit

PODCASTI

Powered by Labrador CMS