Borgmesteriusimasoq pinerliivigineqarsimasut siunnersuisarfianni nutaami siullersaalluni kajumissutsiminik sulilerpoq

Pinerliivigineqarsimasut siunnersorneqarnissaannut neqeroorut pingasunngornermi nuna tamakkerlugu, aallartinneqassaaq. Siunnersuisarfik pingasunngornerit tamaasa nalunaaqutaq unnukkut arfineq-marluniit qulingiluat tungaanut ammassaaq, kajumissutsiminnillu sulisunit ilinniarsimasunit siunnersuisoqartassalluni.

Kajumissutsiminnik sulisut taakkua ikiorneqarnissamik pisariaqartitsisut oqarasuaatikkut qanoq ikiuussinnaanerannik ilinniartinneqarput.

Kalaallit Nunaanni Politiit taamatut tusagassiutitigut nalunaaruteqarput.

Siunnersuisarnerup siunertaraa eqqugaasut oqaloqatigisinnaasaannik toqqissisimasumik, tusarnaarsinnaasumik, tapersersuisinnaasumik pisariaqartunillu siunnersuisinnaaneranik, tamanna qulakkeerinninneruvoq.

Kommuneqarfik Sermersuumi borgmesteriusimasoq Asii Chemnitz Narup kajumissutsimik sulisut siulliit ilagaat, ikiuukkumatuullu allat peqatigalugit sianertut siulliit tigunissaannut pingasunngornermi piareersimassapput.

Kalaallit Nunaanni Politiit ikiortigalugit pinerliivigineqarsimasunik siunnersuisoqartassasoq, vicepolitiinspektør Katrine Sandgreen nassuiaavoq:

– Taamaammat piumassutsiminnik sulisut, inunnut atornartumi inissisimaneranni allanngueqataarusuttut, annertuumik qutsavigerusuppakka. Taakkumi sulinngippata siunnersuinissamik neqeroorut piunavianngimmat, Katrine Sandgreen oqarpoq.

Nuummi kommuunip allaffiani siunnersuisarfik pisortatigoortumik aggustip 26-ani ammarneqassaaq, tassanilu borgmesteri Avaaraq S. Olsen (IA) Meeqqanut, Inuusuttunut Inatsisinillu Atuutsitsinermut Naalakkersuisoq Mariane Paviasen Jensen (IA) peqatigalugu allaffik nutaaq atoqqaarfissiorlugu ammassavaat.

Siunnersuisarfimmut 801130 oqarasuaatigissavaa, nittartagarlu Ikiuiffik.gl aamma pilersinneqarpoq.