Brugsenip aamma Pisiffiup imigassanik aalakoortartortalinnik tuniniaasarnerminni allannguinertik iluatsilluaraat

Ulluinnarni nuioqqutinik tuniniaallutik pisiniarfiit marluk imigassamik aalakoornartortalimmik tuniniaasarnertik appariaateqartissinnaasimavaat assigiinngitsunik iliuuseqarnermikkut.

Ukioq manna siusinnerusukkut Brugseni aamma Pisiffik imigassanik aalakoornartortalinnik arfininngornikkut tuniniaasarnertik allanngortippaat. Siusinnerusukkut imigassanik aalakoornartortalinnik arfininngornikkut tuniniaaneq ammartaraluarpoq nalunaaqutaq qulinut, maannali aatsaat ullup qeqqanut ammartalernikuupput.

AAMMA ATUAKKAT

Nanortalimmeersoq Julius tassaavoq imigassanik aalakoornartortalinnik atuisimasoq maanna imerajuttuunngitsoq: Imigassanik aalakoornartortalinnik inerteqquteqarneq ataasiinnaq imerajuttunik imerajuttuujunnaarsitsisinnaanngilaq

Misiliineq taanna ingerlanneqaqqaarpoq, arfininngornerup ullaatungaani pisinianut allanut akornusersuutaasumik inuit aalakoortut unnuaammat fiisternertik nangiinnarlugu arfininngornerup ullaavaniilli nangigiarnerminnut atatillugu pisiniarfinni pineqartuni aalakoornartulinnik imigassaminnik pisiniaraangata.

Brugsenip aamma Pisiffiup misileraanertik nalilersorsimavaat, suliffeqarfiillu taakku marluullutik inerniliipput, kissaatigisartik malillugu allannguinertik sunniuteqarsimasoq. Taamaattumillu niuertarfissuit taakku marluullutik aalajangiuppaat aaqqissuussineq ataavartunngortinneqassasoq.

Taamak allapput Brugseni aamma Pisiffik ataatsimoorlutik tusagassiuutitigut nalunaarumminni.

Sermitsiamiit pisiniarfissuit taakku aperaagut, pisisartuminnut taamatut imigassanik aalakoornartortalinnik tuniniaasarnerminni allannguinertik qanoq sunniuteqarsimanersoq, aamma Kommune Kujalliup sapaatip akunnerata siuliani aalajangiummagu imigassamik aalakoornartortalimmik tuniniaasarneq unitsikkallarneqassasoq.

Pisisartut misissuiffiginerisa takutippaa tapersersuineq annertoorujussuusoq

Brugseni aamma Pisiffik pisiniartartuminnut misissuinikkut paasiniaaneq ingerlassimavaat, tassani ersarissumik takutinneqarpoq pisisartut annertuumik aaqqissuussinermut tapersersuisut. Misisssuinerni pisisartut tusind-it arlalissuit peqataasimapput.

Pisiffimmi pisisartut misissuinermi peqataasut 71 procentiisa akissutigaat pisiniartarnertik toqqissisimanarnerulersimasoq nuannernerulersimasorlu. Brugsenimi pisiniartartut 73,9 procentisa ammasarfiit nutaat siunissami atuutsiinnarneqassasut kissaatigigitsik.

- Assut pingaartissimavarput, misileraaneq ingerlatarput pisiniarfinni misilittagarilikkavut aallaavigalugit nalilersorneqassasut. Pisinartartutta aaqqissuussineq tapersersorpassuk, aammalu uagut nammineq takusinnaagutsigu, pisiniarfinni toqqissisimanerulersitsisoq, taava misileraataaginnarunnaarluni atuutsilivinnissaa isumaqarluartoq, taamak oqarpoq Pisiffiup pisortaanera, Per Steen Larsen.

Ilanngullugu taassuma tikkuarpaa, ulluinnarni nioqqutissanik pisiniarfiit allannguinernut pitsaasunut peqataasinnaasut aammalu qulakkeerinneqataasinnaasut peqqinnarnerusumik imigassanik aalakoornartortalinnik atuisarnermut kultureqalernissamut.

- Ulluinnarni nioqqutissanik pisiniarfittut pisussaaffeqarpugut akisussaaqataallutalu inuiaqatigiinnut peqataaffigisatsinnut pitsanngorsaataaqataassalluta. Aaqqissuusineq taanna aqqutigalugu pisiniarfinni toqqissisimanerulersitsiinnanngilagut, aammali inuiaqatigiinni aalakoornartortalinnik imigassartortarnerup akisussaassuseqarnerusumik kultureqarfigineqalersinnaasut peqataavugut.

Pisiffimmi pisiniartartut misissuinermi peqataasut akornanni amerlanerussuteqartut isumaqarput periaaseq atorneqalertoq aqqutigalugu nangigiartarnerit ikinnerulernissaannut aqqutissiuusseqataasoq.

Suli annertunerusumik iliuuseqartoqassaaq

Brugseni Kujataani pingasunik pisiniarfiuteqarpoq, iliuuserineqartorlu pisiniarfinni tamani atuutsinneqassaaq.

Brugsenip pisortaanera, Allan Kristoffersen, Sermitsiamut oqaluttuarpoq, imigassanik aalakoornartortalinnik nioqquteqartarnerup annikillisarneqarnissaanut maanna iliuuserineqartoq iliuusissat arlallit ilariinnaraat.

AAMMA ATUAKKAT

Neriniartarfiutiliit oqaloqatigiinnissaq ujartorpaat: Inuussutissarsiummik taamatut matooraaneq akuersaarneqarsinnaanngilaq

- Inuiaqatigiinni pingaarutilimmik inissisimavugut akisussaaffeqarlutalu, taanna oqarpoq.

Ilaatigut iliuuserineqartut ilagaat imigassat aalakoornartortaqanngitsut marloriaataa sinnerlugu amerlanerulersinneqarnerat, aamma nillataartitsivinniitinneqartut ilanngullugit. Taakku tunisaanerat annertusiartorpoq, taamaattorli aalakoornartortalinnit suli annikinnerusumik tunisaasarlutik.

Tamatuma saniatigut aamma arlalikkaaraluni akililliliisarnerit ussassaarutigineqartarnerat unitsinneqarnikuuvoq, taamaalillunilu ataasiinnarmik pisilluni akililliliivigitilluni pisisoqarsinnaalerluni. Tamatuma malitsigisaanik aamma piseriarluni allanut tuniniaaqqittarnerit killilersimaarniarneqarput, taamaallaallu inunnut nammineq atuisussanut tunisisoqartalerluni.

Allan Kristoffersen oqaluttuarpoq, Pisifffimmi Brugsenimilu imigassanik aalakoornartortalinnik tunisisarneq ataatsimut isigalugu ukiuni tallimani kingullerni 37 procentimik appariaateqartinneqarsimasoq.

Misileraalluni ammasarfinnik allannguineq majimi aallartimmalli, takusinnaanerarpaat imigassanik aalakoornartortalinnik tunisisarnertik 12-14 procentimik appariaateqarsimasoq.

- Iluaqutaavoq, taamaattorli suli peqatigiilluta aamma tamattaalluta iliuuseqassaagut. Tassa pitsaaqutaa: Malugisinnaalluarparput inuit amerlanerusut oqaluuserisaleraat, iliuusissat suli amerlanerusut kissaatigineqartut. Tamannami aamma sumi tamaani maanna oqaluuserineqartarpoq, Allan Kristoffersen oqarpoq.

Politiit: Iliuuserineqartoq pisiniarfinni toqqissisimanerulersitsivoq

Kalaallit Nunaanni Politiit pisortaanerat, Bjørn Tegner Bay, ammasarfiit allanngortillugit ulluinnarni nioqqutissanik pisiniarfinnit misileraaneq maanna ataavartunngortinniarneqarmat tapersersuisunut ilaavoq.

- Assorsuaq iluarisimaarparput, Brugseni Pisiffillu aaqqissuusinermik nangitsissallutik aalajangermata. Tungitsinnit misigisarput tassaavoq ammasarfiit allanngortinnerat pisiniarfiit iluini silataanilu arfininngornerup ullaatungaani eqqissisimanerunermik pilersitsisimasoq. Tamannami aamma ataatsimut isigalugu toqqissisimanarneruvoq pisiniartartunut pisiniarfinnilu sulisunut, taamaattumik aamma uagut nuannaarpugut misileraataasimasoq maanna ataavartumik atuutsinneqartussanngormat.

- Tamanna assersuutaalluarpoq, tamatta imigassamut aalakoornartumut tunngatillugu unammillikkatsinnut iliuuseqaqataasinnaasugut. Sumiiffinni iliuuseqarsinnaasut iliuusissanut nutaanut tapertaagaangata, tamanna pitsaasup tungaanut allannguinermik sumiiffikkaartumik aamma kinguneqartarpoq, taanna tusagassiuutitigut nalunaarummi pineqartumi oqarpoq.