Efterskolertut affai sinnerlugit maanaannaq unitsitsisarput

Assersuutigalugit efterskole Maniitsumiittoq, 70-inik atuartoqarsinnaasoq, aammalu efterskole Qasigiannguaniittoq 80-inik atuartoqarsinnaasoq, katillugit ukiumut 26 millionit koruuninik nunatta karsianiir ingerlatsinermut aningaasaliiffigineqartarput.

Taamaakkaluartoq maluginiagassaavoq kukkunersiuinermut ataatsimiititaliap isumaliutissiissutimini maluginiaqqummagu, efterskolini atuartut affaat sinnerlugit piffissaanngitsukkut atuarnertik unitsittaraat.

- Konto 40.10.06 Kalaallit Nunaanni efterskolit ingerlanneqarnerinut tapiissutit pillugu Kukkunersiuinermut Ataatsimiititaliap apeqqutaanut akissummi allaqqavoq, efterskolertartut akornanni uniinnartartut amerlasoorujussuusut. 

- Tamanna ataatsimiititaliamit ernumanartinneqarpoq kissaatigalugulu ajornartorsiut tamanna eqqumaniarfigineqassasoq. Naalakkersuisut akissutaanni allaqqavoq efterskolertartut affai sinnerlugit atuarnerminnik unitsitsisartut. 

- Taamaattumik aningaasanik immikkoortinneqartunik qanoq ingerlatsisoqartarnersoq ataatsimiititaliamit aamma tupigusuutigineqalaarpoq, aammalu pitsaanerusimassanngikkaluarnersoq aningaasat atuartut atuarnerminnik ingerlatsiinnarnissaannut atugassianngortinneqarnerusimagaluarpata, kukkunersiuinermut ataatsimiititaliamit kaammattuutigineqarpoq.

Campus Kujalleq kukkunersiuisunit suli misissorneqanngilaq

Nunatta karsiata 2021-mut naatsorsuutaani paasineqarpoq Campus Kujalleq aningaasaqarnikkut ajornartorsiuteqarsimasoq. Taamanili kukkunersiuinermut ataatsimiititaliamit sakkortuumik isornartorsiuisoqarpoq Campus Kujalleq aningaasaqarnikkut aqutsinerliortoqarnera pillugu.

Ullumikkut allappugut november 2025, kukkunersiuinermut ataatsimiititaliaq piumasaqarpoq aqutsinermut kukkunersiuineq aallartinneqartariaqartoq.

- Kukkunersiuinermut Ataatsimiititaliamit maluginiarneqarpoq naak Campus Kujallermi atuivallaartoqarsimanera oktobarimi 2024-mi Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmit paasineqarnikuugaluartoq. 

- Suliffeqarfimmut alakkarterinermit nalunaarusiap suliaralugu naammassineqarnissaa suli naalakkersuisoqarfimmit ingerlanneqarpoq, tamanna suliaralugu naammasseqqaartussaalluni ingerlatsinermik kukkunersiuilluni misissuinerup aallartinneqannginnerani. 

- Tamatuma aallartinneqarnissaa naatsorsuutigineqassaaq 2025-mi ukiap ingerlanerani pissasoq naammassineqassallunilu 2026-ip naalernerani imaluunniit 2027-p aallartinnerani. 

- Naalakkersuisoqarfiup suliamik aallartitsiniarnerata kigaappallaarsimanera kiisalu ingerlatsinermik kukkunersiuilluni misissuinissap qanoq sivisutigisumik ingerlanniarneqarnera ataatsimiititaliamit naammaginanngitsutut isigineqarpoq.

Naammagittaalliuutit nakorsaaneqarfimmiittut 130-niit 7-imut appariarput

Kukkunersiuinermut ataatsimiititaliaq naammagittaalliuutinik peqqinnissaqarfimmi katsorsarneqarnermut tunngasunik annertuumik pitsaasumik isornartorsiuivoq, suliassat annertuumik appariarsimammata. Piviusormi takusimasaat tassaavoq naammagittaalliuutit suliarineqanngitsut 130-t sinnerlugit amerlassuseqarsimagaluartut  arfineq marluinnanngortinneqarsimammata.

- Nunatta Nakorsaaneqarfianut naammagittaalliutit pillugit kukkunersiuinermut ataatsimiititaliap apeqqutaanut Naalakkersuisut akissuteqaataannut tunngatillugu ataatsimiititaliamit pitsaasutut maluginiarneqarpoq, suliat suliarineqarsimanngitsut suli amerlassusii 130-init arfineq marlunnut ikileriaateqarsimasut. Naammagittaalliutit piffissaq eqqorlugu suliarilluarneqartarnissaat qulakkeerniarlugu inatsit nutaaq naapertorlugu immikkut ittumik suliniuteqartoqarsimanera pitsaasumik kinguneqarsimasoq allaqqavoq.

Inatsisartut isumaqatigiipput - inaarutaasumik akuersissutigineqarpoq 

Inatsisartut ullumi oqallinnerminni landskassip 2024-mut naatsorsuutai akuersissutigineqarnissaani assortuuppallaaratik oqaloqatigiilluartutut oqaatigisariaqarput.

Partiit kingumut siumullu qiviaqattaaraluarput, kisianni naggataatigut 2024-mut naatsorsuutinut tunngasut uterfigeqqillugit sukumiisumik oqaluuseraat, nunattami karsia 2024-mi 257 millionit koruuninik amigartooruteqarpoq.

Oqallinnermi partiit isumaqatigiipput innuttaasut aningaasaataat paarilluarneqassasut, aammalu aningaasaqarnikkut patajaatsumik  inissisimaleqqinnissaq sulissutigineqartariaqartoq. 

Nunatta karsiata aningaasaatai tigoriaannaat nalinginnaasumik 800 millionit koruunit missaanniittussaagaluartut ullumikkut 300 millionit koruunit missaanniipput, partiit isumaqarput tamanna aarlerinartoq. 

AAMMA ATUARUK:

Nunatta karsia 2024-mi 250 millionit koruuninik amigartooruteqartoq

Taakku saniatigut pingaaruteqartinneqarpoq namminersorlutik oqartussanit pigineqartut ingerlatseqatigiiffiit arlallit aningaasaqarnikkut nukittorsarnissaat, taamaalillutik nunatta karsianut akiliutaasa nalinginnaasumik ingerlaqqilernissaat anguneqarsinnaassammat, tassani Royal Greenland aamma Royal Arctic Line immikkut taaneqarput.